Read Makassar Version – KITTA' MATANGKASA 1 SAMUEL 3 Bible Online

1 SAMUEL 3 - Makassar Version – KITTA' MATANGKASA bible

1 SAMUEL 3

¹Lalang kammana anjo, anjo Samuel, ana'-anaka ija, allayani ri Batara nipimping ri Eli. Anjo wattua langkara' sikali nania' pappasang siagang paccini' battu ri Batara.

²Ri se'reang bangngi, Eli ia sannakamo toana siagang la'biringamo buta, sitabangi attinro ri kamara'na.

³Na Samuel attinroi ri ampi'na Patti ParjanjianNa Batara, lalang ri Kema Matangkasaka. Ri wattu tenanapa nammumba alloa siagang a'rinrana ija lampua,

⁴nikio'mi Samuel ri Batara. Nampa appialimi Samuel angkana, “Iye' bapa'!”

⁵Nampa lari mange ri Eli na nakana, “Apa kutadeng bapa'? Apa kikiokanga'?” Mingka appialimi Eli angkana, “Tena nakukiokko, attinro poleang mako.” Jari a'lampami Samuel attinro poleang.

⁶Nampa nikio'mo pole Samuel ri Batara; mingka tanaassengai Samuel angkanaya Batara anjo angkioki, lanri tena le'bakapi a'bicara Batara siagang ia. Jari ambangummi nampa mange ri Eli nakkuta'nang angkana, “Apa kutadeng bapa'? Apa kikiokanga'?” Appialimi Eli angkana, “Tena nakukiokko na'; attinro mako ammotere'.”

⁸Nikio'mi pole Samuel ri Batara untu' makapintallunna. Jari ambangummi nampa mange ri Eli nakkuta'nang angkana, “Apa kutadeng bapa'? Apa kikiokanga'?” Iaminjo wattua nanaassemmo Eli angkanaya Batara angkioki anjo anaka.

⁹Jari nakanamo ri Samuel, “Attinro mako ammotere'. Napunna nikiokko pole, appiali mako angkana, ‘Appau maKi' Batara, nappilangngeri atanTa.’ ” Nampa a'lampamo pole Samuel mange ri katinroanna.

¹⁰Nampa battumo Batara, ammenteng ri anjo tampaka siagang akkio' angkana, “Samuel, Samuel!” Nappialimo Samuel angkana, “Appau maKi' Batara, nappilangngeri atanTa.”

¹¹Nakanamo Batara ri ia, “Nia' gau' malompo ero' Kugaukang mae ri tu Israel, sa'genna yangasenna tau allangngerekai lalingu ngasengi.

¹²Anjo wattua laKugaukammi sikontu apa le'baka Kupau laKugaukang mae ri kaluargana Eli battu ri uru-urua sa'genna kala'busang.

¹³Le'ba'mi Kupau mae ri ia angkanaya laKuhukkungi kaluargana sa'genna satunggu-tungguna, lanri le'ba'Ma nahina ana'-ana'na. Naassengi Eli dosa-dosana ke'nanga, mingka tena nakalarroi ke'nanga.

¹⁴Lanri kammana, assumpA' mae ri kaluargana Eli, angkanaya anjo dosana ke'nanga sannaka lompona, takkulleai nitangkasi siagang koro'bang apa-apa mamo sa'genna satunggu-tungguna.”

¹⁵Le'baki anjo attinromi pole Samuel. Na ri wattu bari'basa'na ambangummi siagang nasungkemi sikamma pakke'bu' Balla'Na Batara. Mallaki ampauangi Eli anjo apa le'baka nacini'.

¹⁶Mingka nikioki ri Eli, na nakana Eli, “Samuel, anakku.” Appialimi Samuel angkana, “Iye' Bapa'.”

¹⁷Akkuta'nammi Eli angkana, “Apa Napau Batara mae ri kau? Carita ngasemmi mae ri nakke. Punna nia' apa-apa nucokkoi, mattantu Nahukkungko Allata'ala.”

¹⁸Nampa napau ngasemmo Samuel mae ri Eli. Tena manna se're nacokkoi. Nampa nakanamo Eli, “Iami Batara, boli'mi kamma Nagaukang apa Nakanaya baji'.”

¹⁹Pila' katambammi lompona Samuel. Nirurungangi ri Batara, siagang Napa'rupami sikamma apa napaua Samuel kajariang tojeng.

²⁰Iaminjo saba'na na sikontu umma' Israel battua ri sikontu anjo pa'rasanganga namangakuimi angkanaya anjo Samuel na'biNa Batara. Kere-kere wattu na'bicara Samuel, sikontu bansa Israel mappilangngeri ngasengi. Tuli Napappicikikang iji KalenNa Batara ri Silo, ri tampa' uru NapappicinikanNa KalenNa mae ri Samuel Na'bicara siagang ia.