Read Makassar Version – KITTA' MATANGKASA 1 SAMUEL 30 Bible Online

1 SAMUEL 30 - Makassar Version – KITTA' MATANGKASA bible

1 SAMUEL 30

¹ Ruangallo ribokoanganna, Daud siagang ana' buana ammotere'mi mange ri Ziklag. Ri wattunna battu ke'nanga mange anjoreng, narapikammi ke'nanga angkanaya nabundukimi tu Amalek bageang timboranna pa'rasangang Yehuda nampa nabunduki Ziklag. Tena nabunoi ke'nanga manna pole sitau. Mingka natunu ngasengi ke'nanga sikontu kotaya sa'genna la'busu', nampa napannarrusu' jappana ke'nanga na naerang sikamma tubai'-bainea, ana'-anaka siagang pandudu' maraengannaya. Najakkala' tommi ke'nanga kaluargana Daud siagang sikamma kaluargana ana' buana, kammayatompa ruaya bainenna Daud, iamintu Ahinoam siagang Abigail. Sanna'mi si'nana pa'mai'na Daud siagang ana' buana, nampa tenamo ammarina angngarru' ke'nanga sa'genna mangngang.

⁶Sanna' susana ana' buana Daud, lanri tena ngasemmi bainenna siagang ana'na ke'nanga. Lanri kammana ero'mi ke'nanga ansambilai batu Daud. Jari lalang kasusaang lompomi nasa'ring Daud, mingka nipakajarreki pa'mai'na ri Karaeng Allata'alana.

⁷ Nampa nakanamo Daud ri Imang Abyatar ana'na Ahimelekh, “Erangi anjo efodka mae anrinni!” Jari naerammi Abyatar anjo efodka mae ri ia.

⁸Nampa akkuta'nang Daud mae ri Batara angkana, “Apaka musti kuondangi anjo garombolanga? Maka akkulleji kurapi' ke'nanga?” Appialimi Karaeng Allata'ala angkana, “Iyo, ondammi; lanurapiki ke'nanga nampa nulappassang sikamma tau nijakkalaka.”

⁹A'lampami Daud siagang anjo annambilangnganga ana' buana. Ri wattunna battu ke'nanga mange ri Binanga Besor, napatulusu'mi jappana Daud siagang 400 tau jaina. Nampa 200 tau maraengannaya ammantangi anjoreng, lanri mangngang dudumi ke'nanga siagang tanakulleai nalimbang Binanga Besor.

¹¹Lalang ri anjo pa'jappana, assibuntulu'mi ana' buana Daud siagang sitau ana' bura'ne tu Mesir ri paranga, nampa naerang mae ri Daud. Nisaremi kanre siagang je'ne' inung,

¹²kammayatompa kanrejawa rappo ara, siagang ruang tangke anggoro' kalotoro'. Le'baki angnganre, gassimmi ammotere'. Ma'nassami angkana tallungallomi tangnganre tangnginung!

¹³Nampa akkuta'nammo Daud mae ri ia angkana, “Inai pinggawanu, siagang battu kemaeko?” Appialimi anjo anaka angkana, “Inakke tu Mesir, atanna tu Amalek. Nabokoia' pinggawaku tallungallo allaloa, lanri garringa'.

¹⁴Le'baki ikambe battu ambunduki tu Kreti ri bageang timboranna Yehuda siagang daera bijanna Kaleb, kammayatompa le'ba'mi nitunu sa'genna la'busu' kota Ziklag.”

¹⁵Nampa akkuta'nang Daud ri ia angkana, “Ero' jako angngantarakka' mange ri tampa'na anjo garombolanga?” Appialimi nakana, “Ero'ja', assala' a'janjiki' mae ri nakke lanri arenNa Allata'ala, angkanaya tena nalakibunoa' yareka kipassareanga' mae ri pinggawaku.”

¹⁶Jari niantara'mi ke'nanga mange ri tampa'na anjo garombolanga. Anjo wattua anjo garombolanga tassia'-siaraki ri sikontu anjo tampaka, sitabangi angnganre, angnginung siagang assua'-suara' lompo lanri jaina barang narampasa' naerang ke'nanga battu ri pa'rasangang Filistin siagang Yehuda.

¹⁷Ammukona, ri wattu ammumbana alloa, nibundukimi ke'nanga ri Daud, na sa'genna bangngi ke'nanga a'bundu'. Pantaranganna patambilangnganga tau rungka laria a'dongko' unta, tena manna sitau anjo musua akkulle ta'lappasa'.

¹⁸Akkullemi Daud allappassangi sikontu apa le'baka narampasa' tu Amalek, kammayatompa anjo ruaya bainenna Daud.

¹⁹Tena sikali apa-apa tappela'. Sikontu ana' bura'-bura'nea siagang bai'-bainea, kammayatompa sikontu barang nirampasaka naallea tu Amalek, naallei ammotere' Daud.

²⁰Pantaranganna anjo narampasa' tommi Daud, sikamma gimbala'na siagang olo'-olo' katuona ke'nanga. Sikamma anjo olo'-oloka niembami ri ana' buana Daud ri dallekang, tassa'la' battu ri sikontu barang-barang nirampasa' maraenga, nampa nakana ke'nanga, “Anne bageanna Daud!”

²¹Le'baki anjo ammotere'mi Daud mange ri anjo ruambilangnganga tau mangngang dudua untu' amminawang ri ia, iamintu nabokoia anjoreng ri birinna Binanga Besor. Naruppaimi ke'nanga Daud siagang ana' buana, nampa a'reppese'mo mange Daud a'barisallang ri ke'nanga.

²²Mingka ri ana' buana Daud niaka amminawang siagang ia, nia' ja'dalaki siagang angngoai. Nakana ke'nanga, “Anne ngaseng taua tena namminawang; jari tena ha'na ke'nanga anggappa apa-apa battu ri anjo barang-barang nirampasaka. Bainennaji siagang ana'naji bawang ke'nanga akkulle naalle, nampa a'lampa.”

²³Mingka appialimi Daud angkana, “Sikamma sari'battangku, teako appakammai mae ri apa Napassareanga Batara mae ri katte! Sai le'ba' maki' Nakatutui siagang Nasare pammetang mae ri anjo garombolang paellaka?

²⁴Jari manna sitau takkulleai nasitujui anjo napaua sumpaeng! Yangasenna musti anggappai bageang, sangkamma jaina: tau ammantanga untu' a'jaga barang-barang anrinni musti anggappai bageang sangkamma jaina siagang tau majua mange a'bundu'.”

²⁵Nampa nagaukammo Daud anjo a'jari paratorang, na nituruki ri Israel sa'genna kamma-kamma anne.

²⁶Ri wattunna ammotere' Daud mange ri Ziklag, nakirimmi sipa'gang anjo barang-barang nirampasaka mae ri sikamma pamimpinga ri kota-kota Yehuda le'baka ambantui, nanakana, “Iaminne hadia untu' ikau, iamintu barang-barang narampasaka ikambe battu ri musunNa Batara.”

²⁷Anjo kota-kotaya iamintu: Betel siagang Rama ri bageang timboranna Yehuda, Yatir, Aroër, Sifmot, Estemoa, Rakhal, kammayatompa kota-kotana tu Yerahmeel, kota-kotana tu Keni, Horma, Bor-Asan, Atakh siagang Hebron. Yangasenna anjo kotaya le'baki mange Daud siagang ana' buana a'lette' mange-mange; nakiringi ngasemmi Daud hadia.