Read Makassar Version – KITTA' MATANGKASA 1 SAMUEL 5 Bible Online

1 SAMUEL 5 - Makassar Version – KITTA' MATANGKASA bible

1 SAMUEL 5

¹Le'ba'na narampasa' tu Filistin Patti ParjanjianNa Allata'ala, naerammi ke'nanga battu ri Eben-Haezer mange ri kotana ke'nanga, iamintu Asdod.

²Anjoreng nierammi anjo pattia antama' ri balla' rewatana ke'nanga, iamintu niarenga Rewata Dagon. Anjorengi ri ampi'na patunna anjo rewataya nipadongko'.

³Ri wattunna pandudu'na Asdod battu ammukona bari'basa' ri anjo balla' rewataya, naciniki ke'nanga angkanaya tu'guru'mi tappatinompang naung ri buttaya anjo patung Dagon, ri dallekanna Patti ParjanjianNa Batara! Naangka'mi ke'nanga anjo patunga nampa napoterang ri pammantanganna.

⁴Mingka ammukona, ri bari'basa'na, naciniki ke'nanga tu'guru'moseng anjo patunga ri dallekanna anjo Patti Parjanjianga. Anjo wattua tassa'la'mi ulunna siagang rua limanna anjo patunga, ta'dongko' ri dallekanna pakke'buka. Kalenna mami anjo patunga kamma biasa. (

⁵Iaminjo saba'na, nasa'genna anne alloa nasikamma imanna Rewata Dagon siagang sikontu tau anynyombaya ri ia ri Asdod, nadakkai dallekang pakke'bu' pammantanganna Dagon, siagang tanaonjokai ke'nanga.)

⁶Nampa Nahukkung Batara sikontu pandudu' Asdod siagang tuniaka ri daera tammulilina, iamintu akkambu'-kambussuluki kalenna ke'nanga sangkamma puru.

⁷Nacini'na ke'nanga anjo apa kajarianga mae ri kalenna ke'nanga, nakanamo ke'nanga, “Nahukkungki' Allata'alana Israel, siagang nahukkung tongi Rewatata Dagon. Takkulleai tuli nilappassang anjo Patti Parjanjianga ammantang anrinni la'bi sallo.”

⁸Jari nakio'mi ke'nanga limaya karaenna tu Filistin sollanna asse're ke'nanga, nampa akkuta'nang ke'nanga angkana, “Laniapami anjo Patti ParjanjianNa Allata'alana tu Israel?” Appialimi anjo sikamma karaenga, angkana, “Paletteki mae ri kota Gat.” Jari nipalette'mi anjo pattia mange ri kota Gat, se'reang kota Filistin maraengannaya.

⁹Mingka battuna mange anjoreng anjo pattia, nihukkung tommi ri Batara anjo kotaya, sa'genna gegere' lompo taua anjoreng. Nihukkummi pandudu'na anjo kotaya, tau rungka yareka tau toa. Akkambu'-kambussuluki kalenna ke'nanga.

¹⁰Jari niantara'mi anjo Patti Parjanjianga mange ri Ekron, kotana Filistin maraenganga. Battuna anjo pattia anjoreng, ammarrammi panduduka anjoreng angkana, “Nierangi anjo Patti ParjanjianNa Allata'alana Israel untu' ambuno ngasengki'.”

¹¹Lanri kammana, nakio'mi ke'nanga sikamma karaenga ri Filistin untu' asse're. Nampa nakana ke'nanga, “Poterangi anjo Patti ParjanjianNa Allata'alana Israel mange ri tampa'na riolo, sollanna tena naNabunoki' siagang kaluargata.” A'jarimi karicuanga ri sikontu kotaya, lanri Nahukkungi Allata'ala pandudu'na, siagang hukkungang battala' sikalia.

¹²Tau tenaya namate, nitabai ri anjo garring akkambu'-kambussuluka, sa'genna ammarrang-marrang pandudu'na anjo kotaya mae ri rewata-rewatana ke'nanga, appala' tulung.