Read Makassar Version – KITTA' MATANGKASA 1 SAMUEL 8 Bible Online

1 SAMUEL 8 - Makassar Version – KITTA' MATANGKASA bible

1 SAMUEL 8

¹Ri wattunna toamo Samuel, naangka'mi ana'-ana'na a'jari haking ri Israel.

²Ana'na toaya niarengi Yoël, na makaruaya niarengi Abia. A'jari hakingi ke'nanga ri Bersyeba.

³Mingka tena naturuki panggaukanna manggena ke'nanga, passangalinna kaparalluang kalennaji bawang tuli naondang. Annarimai ke'nanga doe' pacoco', siagang tena naadele' ke'nanga angngadeli ra'yaka.

⁴Lanri kammana a'rappungang ngasemmi sikontu pamimpinna tu Israel, nampa mange andallekang ri Samuel ri Rama,

⁵ nampa nakana ri ia, “Pilangngeri bapa'. Ikatte toa maki', nampa ana'-anatta tena naturuki panggaukanta. Jari bajikangngang angngangka' maki' sitau karaeng, sollanna nia' karaenna ikambe kamma bansa-bansa maraenga.”

⁶Mingka tena nasannang pa'mai'na Samuel ri anjo pappala'na ke'nanga. Jari appala' doammi mae ri Batara.

⁷Na Nakanamo Batara, “Turukiammi sikontu pappala'na anjo bansaya mae ri kau. Nasaba' teai ikau nasorongboko ke'nanga, mingka iNakke. Tenamo naero' punna iNakke a'jari karaenna ke'nanga.

⁸Ri Kueranna ke'nanga assulu' battu ri Mesir, nabokoiMa' ke'nanga nampa anynyomba ri rewata-rewataya. Na apa anjo nagaukanga ke'nanga mae ri kau, iatommi anjo le'ba' nagaukang ke'nanga mae ri Nakke.

⁹Lanri kammana anjo, turukiammi pappala'na ke'nanga; mingka pakainga' tojeng-tojengi ke'nanga, siagang pauangi angkanaya antekamma sallang lanigaukangi ri karaenga.”

¹⁰Sikontu anjo kananNa Batara napabattu ngasengi Samuel mae ri anjo tau appalaka sitau karaeng ri ia, angkana,

¹¹“Kamma anne sallang batena karaenga anggaukang mae ri kau. Lanapassai ana'-ana'nu antama' tantara; sipa'gang ke'nanga a'jari tantara ri karetaya, sipa'gang a'jari tantara a'jarang, na maraengannaya a'jari tantara a'jappa bangkeng.

¹²Sipa'gang naangka' a'jari perwira mae ri sisa'bu tau, na sipa'gang maraenganga mae ri limampulo tau. Anjo karaenga lanapassai ana'-ana'nu appa'jeko ri koko-kokonna, ampasse'rei wassele' kattoanna, appare' sanjata-sanjata siagang pakkakasa'-pakkakasa' untu' kareta pa'bundukanna.

¹³Ana'-ana'nu bainea lanasuroi appare' minynya' bau' siagang anjama a'jari tukang appallu kammayatompa tukang appare' roti.

¹⁴Lanaallei kokonnu, koko anggoro'nu, siagang koko zaitunnu kaminang bajika, nampa napassareang mae ri sikamma pagawena.

¹⁵Kokonnu siagang koko anggoro'nu lanapitabai sima, iamintu bage sampulona battu ri wassele'na, nampa napassareang mange ri sikamma perwira tantarana siagang sikamma pagawena.

¹⁶Lanaallei atannu, olo'-olo'nu kaminang bajika siagang keledainu na napake untu' anjamai jamanna.

¹⁷Bage sampulona battu ri yangasenna bembenu siagang gimbala'nu lanaallei. Nampa ikau ngaseng kalennu la'jari atannako.

¹⁸Punna narapi'mo wattunna anjo kammaya, lakkunrareng mako lanri anjo karaeng nupilea, mingka taerokai Batara ampilangngeri kunrarennu.”

¹⁹Mingka taerokai anjo bansaya anjampangi kananna Samuel. Ba'lalo nakana ke'nanga, “Boli'mi kamma! Manna pole antekamma eroki ikambe karaeng.

²⁰Eroki ikambe sangkamma bansa-bansa maraenga. Karaenna ikambe musti ammarentai siagang napimpingi ikambe lalang ri pa'bundukanga.”

²¹Nalangngere'na Samuel anjo kananna ngaseng ke'nanga, napabattumi anjo passalaka mae ri Batara.

²²Appialimi Batara Angkana, “Pinawang mami ero'na ke'nanga. Angngangka'mako sitau karaeng untu' ke'nanga.” Jari nasuromi Samuel anjo tu Israel massing ammotere' mange ri balla'na.