Read Makassar Version – KITTA' MATANGKASA 1 SAMUEL 9 Bible Online

1 SAMUEL 9 - Makassar Version – KITTA' MATANGKASA bible

1 SAMUEL 9

¹Nia' se're tau sanna' kalumanynyanna siagang sanna' nikangngalikanna battu ri suku Benyamin, iamintu niarenga Kish. Ia anggota kaluarga battui ri Bekhorat, tangke bijanna Afiah. Manggena niarengi Abiel na toana Zeror.

²Kish nia' ana'na bura'ne niarenga Saul, iamintu se're tau rungka gammara' na kassa' kalenna. Tena manna sitau battu ri sikontu Israel la'bi gammarangngang naia. Pakkaleanna la'bi tinggi tongi. Ia taua ri Israel samara' sa'ge salanggannaji tinggina.

³Ri se'reang wattu nia' siapa are keledaina Kish tappela'. Jari nakanamo Kish mae ri Saul, “Angngerangko sitau palayang, nampa a'lampako amboyai anjo keledai-keledaia.”

⁴Jari a'lampami Saul siagang palayanna antulakkangi daera pa'bulukanna Efraim siagang butta Salisa. Mingka tanagappayai anjo olo'-oloka. Nampa a'jappa tulusu' ke'nanga mange ri butta Sahalim, mingka tena tongi anjo keledai-keledaia anjoreng. Naboya tommi ri daera Benyamin, mingka sia-siaji.

⁵Ri wattunna battu ke'nanga mange ri butta Zuf, nakanamo Saul ri palayanna, “Umba kimmotere'mo, gassingka lussakangangi bapa' annawa-nawaki' naia anjo keledai-keledaia.”

⁶Appialimi anjo palayanga angkana, “Kitayangi rolong! Ri anne kotaya nia' sitau atanNa Allata'ala. Sanna' nipakala'biri'na ri taua, lanri anjo apa napaua, ma'nassa kajariang tojeng-tojengi. Umba ki'lampa mange ri ia, gassingka akkulleki' napauang kemaei anjo keledai-keledaia.”

⁷Nakanamo Saul, “Punna mangeki' ri ia, apa lanisareangi? Bokong nieranga la'busu'mi, na ikatte tenamo apa-apanta untu' lanisareangi anjo atanNa Allata'ala.”

⁸Appialimi anjo palayanga angkana, “Sitabang nia' ija ri nakke se're doe' pera'. Anjo lakupassareang mae ri anjo atanNa Allata'ala sollanna ero' ampauangki' angkana kemae anjo keledai-keledaia.”

⁹Appialimi Saul angkana, “Baji'mi! Umba ki'lampa.” Jari a'lampami ke'nanga mange ri kotaya, ri tampa'na anjo atanNa Allata'ala. Ri wattu angngambi'na ke'nanga ri bonto angngoloa mange ri anjo kotaya, assibuntulu'mi ke'nanga siagang siapa are tulolo, eroka anynye'ro' je'ne' ri bungunga. Akkuta'nammi ke'nanga mae ri anjo tuloloa angkana, “Apaka nia' pacini' anrinni ri kotaya?” (Anjo wattua se'rea na'bi nikanai pacini'; jari punna nia' tau ero' akkuta'nang se'reang apa-apa mae ri Allata'ala, kammaminne kananna, “Umba ki'lampa mange ri pacinika.”)

¹²Appialimi anjo sikamma tuloloa angkana, “Iye', nia', silalonna nia' a'jappa allaloi ikambe. Punna akkaro-karoki', nakulle akkullei kirapi'. Silalonna battu ri kotaya, nasaba' anne alloa irate ri tampa' pakkoro'bangnganga ri buluka, nia' passare koro'banna ra'yaka. Tena nalangnganre tau jaia punna tenapa nabattu, lanri musti nabarakkaki rolong anjo koro'banga. Punna a'lampaki' kamma-kamma anne, lakirapi'mi ri tenanapa nangngambi' ri bontoa untu' mange angnganre.”

¹⁴Jari a'jappami Saul siagang palayanna mange ri kotaya. Na ri wattu antama'na ke'nanga ri pakke'bu' lompoa, assibuntulu'mi ke'nanga siagang Samuel sitabang a'jappa mange ri tampa' passambayanganga ri bontoa.

¹⁵Siallo rioloanganna anjo, Appasammi Batara ri Samuel angkana,

¹⁶“Ammuko bari'basa' kira-kira ri wattu kamma-kammaya anne, nia' laKusuro sitau battu ri suku Benyamin battu angngagangko sibuntulu'. Minynyaki siagang angka'mi anjo taua untu' a'jari karaeng mae ri ummakKu Israel. Ia lallappassangi ummakKu battu ri tu Filistin. Kucini'mi kasessanna ummakKu siagang Kulangngere'mi karru'na ke'nanga appala' tulung.”

¹⁷Nacini'na Samuel anjo Saul, Nakanamo Batara ri ia, “Iaminne anjo tau Kupaua ri kau. Iami lammarenta ri ummakKu.”

¹⁸Na lalanna anjo wattua a'reppese'mi Saul mae ri Samuel ri ampi'na pakke'bu' lompoa, siagang akkuta'nang angkana, “Pammopporanga' Bapa', kemae balla'na anjo pacinika?”

¹⁹Appialimi Samuel angkana, “Inakkemi anjo pacinika. A'jappa riolo mako mange ri tampa' passambayanganga ri bontoa, nasaba' anne alloa lasipangnganreangko siagang inakke. Ammuko bari'basa' nampa kupiali ngaseng sikontu apa nupakkuta'nanganga. Punna le'ba'mo anjo akkulle mako ammotere'.

²⁰Ri passala'na anjo sikamma keledainu tappelaka tallungallo allaloa, tea' mako batai, nasaba' nibuntulu'mi. Na nampa pole, ia kaminang lompoa anggaranna ri sikontu Israel lanipassareangi mae ri kau siagang kaluargana manggenu.”

²¹Appialimi Saul angkana, “Inakke anne tau battua' ri suku Benyamin, suku kaminang ca'dia ri Israel, kammayatompa pole kaluarga kaminang tenaya anggaranna lalang ri anjo sukua. Jari angngapa nakiakkana kamma anjo mae ri nakke?”

²²Nampa nikio'mo Saul siagang palayanna ri Samuel antama' ri kamara' lompoa, nampa nasare tampa' kaminang bajika anjo ke'nanga ri dallekanna undanganga niaka kira-kira tallumpulo tau jaina.

²³Nampa nakana Samuel mae ri papallua, “Patalai anjo dageng kusareangako sumpaeng.”

²⁴Naallemi papallua dageng nipilea battu ri bageang bongga, nampa napatala ri dallekanna Saul. Nakanamo Samuel, “Anne bageang kupassareang mae ri kau sollanna nukanre ri kamma-kammaya anne siagang sikamma toana maraengannaya. Angnganre mako.” Jari angnganremi Saul. Angnganremi anjo alloa Saul siagang Samuel.

²⁵Le'baki anjo naummi ke'nanga battu ri tampa' passambayanganga nampa antama' ri kotaya. Nisaremi Saul katinroang irate ri pattongko'na ballaka,[4]

²⁶nampa attinro. Ri wattu ammumbana alloa, nikio'mi Saul ri Samuel niaka irate ri pattongkoka; nakana Samuel, “Ambangungko, maeko nakuantarakko a'lampa.” Ambangummi Saul, nampa a'lampa siagang Samuel.

²⁷Ri wattunna anrapi' ke'nanga ri birinna kotaya, nakanamo Samuel mae ri Saul, “Suroi anjo palayannu a'jappa riolo.” Jari a'lampami anjo palayanga. Nampa nakanamo pole Samuel ri Saul, “Ammantangko rolong anrinni sinampe', nia' pappasanNa Allata'ala lakupauangko.”