Read Makhuwa-Shirima Epacerero 13 Bible Online

Epacerero 13 - Makhuwa-Shirima bible

Epacerero 13

¹Abraamu aavenya wExipitu vamoha ni mwaariye ni Loti ni sootheene aarinaawe arowaka oNegeba.

²Abraamu aari namapuha vancipale akhalanaka mihuwo sincipale, mpakatho iyuuma soorikaxa sincipale.

³Owo aavenya oNegeba athaamathaamaka mpaka ophiya oBeteli weiwe aamankaawe khalayi, eriyari ya oBeteli ni wAi.

⁴Aarowa weiwo aatenkaawe altaari* ni vaavaawo aamwiitthana Yave.

⁵Mpakatho Loti aarongwe vamoha ni Abraamu aakhalano mihuwo ni iheema.

⁶Tivawo wahaawereyaaya omaka vamoha niwoko khanaariwo nipuro nookwana mihakhu sa ooweeli yaarinaaya.

⁷Vano waakhumelela onyakulihana variyari wa akukhuli a Abraamu ni a Loti. Ehuhuweene yeele aKanaani ni aPerizi yaamanke elapweene yeele.

⁸Tivawo Abraamu aamweerenlaawe Loti: “Khoontthuneya weera okhaleke ohiiwanana variyariwahu naari wa akukhulaahu, niwoko hiyo nri emusi emoharu.

⁹Ohoolowanyu yookhala elapo yincipale. Kinoovekelani weera nimwalamwale. Mwarowa moono muthiyana, kinoorowa mulopwana; mwarowa moono mulopwana, kinoorowa muthiyana.”

¹⁰Vano Loti aaweha anoona oreyareyani wa Yordaanu: Yaakhala maahi mancipale ni waakhala ntoko muttimbeni mwa Yave, olikanaka ntoko wExipitu, hiihaawo mpaka elapo ya oZowari. Yeeyo yeereiye Muluku ahinaaye ophwata oSodoma ni oGomora.

¹¹Hiiho Loti aathanla mpatta wa oreyareyani wa oYordaanu ni aarowa mpatta ninkhuma nsuwa. Vano yaamwalamwala mukina ni mukhwaawe moota ola:

¹²Abraamu aahanle elapo ya oKanaani vaheera Loti aatthaama arowaka isidade saari mukerekhere wa oYordaanu, ni aakunga iheemasawe mpatta wa oSodoma.

¹³Vanonto atthu yaamanke oSodoma yaari ooxilili ni anamattheka evirikanyihaka otthuna wa Muluku.

¹⁴Emwalamwanleene Loti ni Abraamu, Yave aamweerela Abraamu: “Vaavaawo nyuwo muraanyu, ngwehe mipatta sootheene.

¹⁵Elapo yootheene ela munoonaanyu, Miyo kinimoovahani nyuwo ni ekhapiraanyu yootheene wa mahuku ootheene.

¹⁶Nkaandyeerere ekhapiraanyu yootheene weera ekhale ntoko ntthupi na vathi. Khaawo ongwera waalikela mihaava sa ntthupi na etthaya. Mooteene yoowo khaawo aneera awere waalikela ekhapiraanyu.

¹⁷Vano mweetteette elapo yootheene ela mipatta sootheene, niwoko kinimoovahani.”

¹⁸Vano Abraamu aaceendya nipuro aamankaawe, arowaka omaka vakhiviru wa nyiri sa ikarivalyu* oMamre, vakhiviru wa oHeberoni, weiwo aamutekenlaawe altaari* Yave.