Read Makhuwa-Shirima Epacerero 14 Bible Online

Epacerero 14 - Makhuwa-Shirima bible

Epacerero 14

¹Ehuhuweene yeele Amrafel, mwene a oXineyari, Ariyokhe mwene a wElasari, Kedorlawomeri mwene a wElami, ni Tidali mwene a oGoyimi

²yaarowa owana ni Bera mwene a oSodoma, Birxa mwene a oGomora, Xinabi mwene a wAdema, Xemeberi mwene a oZeboyimi ni mwene a oBela ori Zowari.

³Ootheene ookisera awo yaahaatakansa anakhottwaaya oreyareyani wa oSidimi, eraayawo ephareiya ya maakha.

⁴Wa iyaakha muloko ni piili yaamurumeela Kedorlawomeri, mene wa eyaakha yanaamuloko ni tthaaru yaarukunuwelana.

⁵Vano mwa eyaakha yanaamuloko niixexe Kedorlawomeri ni mamwene yiiraanne ni yoowo, yaahaawina aRefayimi a wAsterote-Karnayimi, aZuzi a oHami ni awEmiti a oXave-Kiriyatayimi,

⁶ni aGori okhuma nyaako sa oSeyir mpaka wEli-Parani, vakhiviru wa nikare.

⁷Vahoolowaya yaahokolowa, enarowa wEni-Mispate, ori oKadexi, ni yaawinawo elapo yootheene ya awAmaleki ni ya awAmori yaamanke oGazezoni-Tamari.

⁸Vanonto mamwene a ilapo sa oSodoma, oGomora, wAdema, oZeboyimi, ni oBela, ori oZowari, yaaheetta erowaka okhottoni, enawana oreyareyani wa oSidimi

⁹ni Kedorlawomeri, mwene a wElami, Tidali, mwene a oGoyimi, Amerafel, mwene a oXineyari ni Ariyokhe, mwene a wElasari. Wa ootheene yaari mamwene maxexe ewanaka ni mamwene mathanu.

¹⁰Oreyareyani wa oSidimi waasareya ni soowiixera soopakiwa ni ettoko, ni vano, etthawaka mamwene a oSodoma ni oGomora, yaavuluwela mwemmwe. Vano atthwaaya akina yaahanle yaatthawela omwaako.

¹¹Anamawina yaakuxa mihakhu sootheene sa oSodoma ni sa oGomora nitho soocasene, enarowa.

¹²Yaamukuxatho musulwaawe Abraamu, Loti, ni mihakhusawe sootheene, niwoko Loti aakhala oSodoma.

¹³Vanonto, mmoha oopongwe, aarowa omuthalihera Abraamu, muHeberi, yeele yeereiye. Owo aakhala vakhiviru wa nyiri sa ikarivalyu* oMamre. Vano Mamre ori munna a Eskoli ni a Aner, mwa yaawo Abraamu iiraanannaaweno.

¹⁴Abraamu iiwaka weera musulwaawe ootthukiwa, aahaakuxa arumeiyaawe ootureene yaayariwe vaatewawe, wookwana macira mararu ni muloko mmoha ni athannaararu, anaattharelela amwiittana mpaka oDani.

¹⁵Moohiyuni aahaakawanyiha anakhottwaawe mipatta-mipatta, anaawanano ni aahaawina. Vano yaapwaherera waattharelela mpaka oGoba, ori wookela mpatta wa ottuttuwani wa elapo ya oDamasku.

¹⁶Aawera ohokoloxa mihakhu sootheene, anamoopola musulwaawe Loti ni mihakhusawe, vamoha ni asithiyana ni anamatthukiwa akina.

¹⁷Abraamu ahokolowaka vahoolo wa owana ni Kedorlawomeri ni mamwene oowiiraananaawe, mwene a oSodoma aavenya weera akumaneno oreyareyani wa oXave, ori oreyareyani wa Mwene.

¹⁸Vanonto, Melkisedeki, mwene a oSalemi, aari musaserdoti* a Muluku Musulusulu, aahiixoonihera akuxaleene yooca ni eviinyu.

¹⁹Aamureeliha Abraamu ni masu ala: “Ooreelihiwa akhale Abraamu ni Muluku Musulusulu, Yoowo opattunxe erimu ni elapo ya vathi.

²⁰Ooreelihiwa akhale Muluku Musulusulu, ooweringhe waawina amwiittanaawo. Vano, Abraamu aamvaha mpatta wanaamuloko sa sootheene.

²¹Mwene a oSodoma aamweerela: “Okivahe paahi atthu, mene sooreela ti sawawo.”

²²Abraamu aamwaakhula mwene a oSodoma: “Kinlipela ni ntata kimweemexeraka Yave, Muluku Musulusulu, opattunxe erimu ni elapo ya vathi,

²³weera yeeyo eri yawinyu nkintthunaru. Vekhaikhai, nkintthuna hata eciikhwe, naari muramba weera kitthukele ikwakwaatta. Nkintthuna weera nyuwo mweere: ‘Ti miyo kimpuhinghe Abraamu.’

²⁴Vano wa miyo, kintthuna paahi yeele arumeiyaaka aciiyaaya ni mpatta ophwanenle wa yaale yiitakansale ni miyo, eyo tiiyo Aner, Eskoli ni Mamre. Yaakhele mpattaaya.”