Read Makhuwa-Shirima Epacerero 15 Bible Online

Epacerero 15 - Makhuwa-Shirima bible

Epacerero 15

¹Vano, vahoolo wa yeeyo Yave aahiixoonihera wa Abraamu, anamweerela: “Muhoove Abraamu, Miyo ti yoowiixaakiheraanyu, ni munookhalano ntthuvelo ntokotoko.”

²Abraamu aamwaakhula: “Ii! Adonai Yave, heeni mungweraanyu okivaha miyo, woonaka weera nkinkhalanne mwaana? Ori murumeiyaaka Eliyezeri, a oDamasku paahi aneera akuxe mihakhusaka?”

³Abraamu aanyesera: “Khamukivanghe anamwane ni murumeiyaaka mmoha aneera akhale namahiyeriwaaka.”

⁴Vano Yave aamwaakhula: “Kharwa akhala yoowo namahiyeriwaanyu. Hoye, mwaana muneeraanyu mungyare aneera akhale namahiyeriwaanyu.”

⁵Muluku aamulamulela okhumela vaate, anamweerela: “Ngwehe wiirumu. Moone, mwawera, waalikela ithenyeeri. Niwoko hiiho oneeraaya okhale waatta wa atthu a ekhapiraanyu.”

⁶Vano Abraamu aamwaakhulela Yave, tivawo Muluku aamwaakhenlaawe ntoko oororomeleya.

⁷Muluku aamweerelatho: “Miyo ti Yave koovenxaleni wUri, mweelaponi ya aKaldeya, weera koovaheeni elapo ela ntoko yoohiyeriwaanyu.”

⁸Abraamu aamukoha: “Adonai, Yave, nkisuweleke hayi weera eyo eniikhale elapwaaka?”

⁹Yave aamwaakhula: “Mukiruuhele emombe exaana ethiyana emoha, epuri ethiyana emoha, nitho emombe elopwana emoha, sootheene sa iyaakha tthaaru, mpakatho nsiya nimoha ni ekhunda emoha.”

¹⁰Abraamu aamuruuhela axinama ale, anaameyanyiha eriyariru, anawiikaathi khula mpatta ohoolo wa mukhwaaya. Paahi ipalame iye ahaakawanyinghaawe.

¹¹Vano mattawo yaapacera omorela saaraaya inama iye, mene Abraamu aamoomolela.

¹²Wiilaka, Abraamu aakonaxa vancipale, ni yaamukhuneela ewiriphi etokotokoxa.

¹³Vano Muluku aamweerela: “Musuwele weera anamwane a ekhapiraanyu eniikhale ntoko anamarwa mweelaponi yoohikhala yawaya ni eniyeereke opuheriwa ni ohasuliwa wookwana ehuhu ya iyaakha macira maxexe.

¹⁴Miyo muneenaaka nkeereke waattaruxa yaawo eneera yoopuherekeni, ni vahoolowaya eniikhume ni mihakhu sincipale.

¹⁵Vano wa nyuwo, mmuuluvale mmuretteleni ni mmwivithiwe ni wuuluvala wooreera vamoha ni makholowaanyu.

¹⁶Mwa epuumba yanaaxexe, anamwane a ekhapiraanyu, eniihokoleele wenno, niwoko otakhala wa awAmori nlelo khoonaaye okwanela.”

¹⁷Mwa yeeyo waahiila ni yaakhala epiphi. Vano waahooniwa mooro otthuwaka mwiixi, ni onyaari ovarelaka oviraka eriyari ya axinama ookawanyihiwa.

¹⁸Nihiku nenenenne Yave aakhaliha wiiraana onttharelana ni Abraamu: “Kinoovaha ekhapiraanyu elapo ela, okhuma mukhwipi mwa wExipitu mpaka mooloko mutokweene Efratesi.

¹⁹Aani, kinoovaha elapo ya aKeni, aKenizi, aKadimoni,

²⁰aHiti, aPerizi, aRefayimi,

²¹mpakatho elapo ya awAmori, aKanaani, aGirgasi nitho aYebusi.