Read Makhuwa-Shirima Epacerero 17 Bible Online

Epacerero 17 - Makhuwa-Shirima bible

Epacerero 17

¹Abraamu arinweene iyaakha miloko mithannamixexe niithanniixexe, Yave aahiixoonihera wa yoowo, anamweerela: “Miyo ti Muluku a ikuru sootheene, mweette vamoha ni Miyo ni mukhaleke ookwaneleene.

²Miyo kinookhaliha wiiraana variyariwahu ni nkaandyeerere ekhapiraanyu moota woowaattaxa.”

³Abraamu aahuuramaxa ni Muluku aamweerelatho:

⁴“Vano mwa mpattaaka kimpakaaka wiiraana ni nyuwo ti wu: Mmwithatuwe tiithi a miloko soowaatta.

⁵Nsinananyu khaneeriwaka Abraamu, mene Abrahaamu, niwoko kohookhalihani tiithi a miloko sincipale.

⁶Kinimoovahani ikhapira soowaattaxa ni wa nyuwo nseereke okhumelela miloko soohiyanahiyana, aani, eniikhumelele mamwene variyari wa ekhapiraanyu.

⁷Kinookhaliha wiiraanawaka ni nyuwo, ni ekhapiraanyutho ya muhoolo, ntoko wiiraana woohimala. Miyo nkikhale Mulukwaanyu, ni Muluku a ekhapiraanyu.

⁸Vano elapo yootheene ya oKanaani, weiwo nyuwo vaanaano muraanyu namarwa, kinimoovahani ni wa ekhapiraanyu ntoko yawinyuweene yoohimala, ni nkikhale Mulukwaaya.”

⁹Muluku aamweerela Abrahaamu: “Wa mpattaanyu muthokorore wiiraanyihawaka, okhuma nyuwo mpaka ekhapiraanyu yootheene.

¹⁰Wu ti wiiraanyihawaka ni nyuwo ni ekhapiraanyu, wiiraana ontthuneya othokororiwa: asilopwana ootheene yiineliweke.

¹¹Eniyiineliwe mwa elopwanaaya ni wiineliwa iwo onuukhale eneneero ya wiiraana variyariwahu.

¹²Okhuma epuumbaanyu mpaka ya muhoolo, anamwane asilopwana ootheene a mahuku mathanamararu a oyariwawaya yiineliweke, yaawo ooyariwa vaatewanyu, mpakatho yaawo eneera ethummweke ilapo sikina, mwa yaawo eneera ehikhale a ekhapiraanyu.

¹³Hata ekhalaka a vaatewanyu, naari oothummwa, ontthuneya wiineliwa. Wiiraanyihawaka wiikaathiwe mweerutthunimwanyu onuukhale wiiraana woohimala.

¹⁴Akhalaru mwaana mulopwana aneera aahiineliwe, oomoliweke munlokonimwawe, niwoko khiiwelenle wiiraanyihawaka.”

¹⁵Vano Muluku aamweerelatho Abrahaamu: “Okhuma vanaano vaava mpaka ohoolo, amwaarinyu kheerwa yiitthaniwatho Sarai; nsinanaya nnikhale Sara.

¹⁶Vano Miyo nkimureelihe, nitho mwa yoowo kinimoovahani mwaana. Aani, Miyo nkimureelihe, ni mwa yoowo nsikhumelele miloko ni mamwene a miloko.”

¹⁷Abrahaamu aahuuramela vathi, anatheya, aniixeerela: “Mulopwana a iyaakha ncira onoowera omuyara mwaana? Sara onoowera oyara areene ni iyaakha miloko mithannamixexe?”

¹⁸Vano Abrahaamu aamweerela Muluku: “Eya! Iximayeli akhaleke namahiyeriwaaka!”

¹⁹Muluku aamwaakhula: “Vekhaikhai Sara onimooyarelani mwaana mulopwana ni nyuwo mmunttehe Isaki. Nkikhalihe wiiraanyihawaka ni yoowo ni ekhapiraawe ya muhoolo ntoko wiiraana woohimala.

²⁰Vano mwaha wa Iximayeli, kohiiwa nivekolonanyu. Nkimureelihe ni nkimuvahe ekhapira etokotoko. Anaakhale tiithi a mahimo muloko ni meeli, ni mwa yoowo nkikhalihe muloko mutokotoko.

²¹Vano wiiraanyihawaka Miyo nkikhalihe mwa Isaki, mwaana a Sara aneeraawe amuyare mwaahiyu mwa ehuhuweene yeela.”

²²Muluku amalihakaru wuuluma ni Abrahaamu, aavenyawo.

²³Nihuku nenenenne Abrahaamu aamukuxa mwanawe Iximayeli, ootheene ooyariwa vaatewawe, mpaka oothummwa ootheene a vaatewawe, aani, asilopwana ootheene a vaatewawe, anawiinela, ntoko Muluku aamuleelenlaawe.

²⁴Abrahaamu iineliwe areeneno iyaakha miloko mithannamixexe niithanniixexe.

²⁵Mwanawe Iximayeli aarino iyaakha muloko ni tthaaru iineliwaawe.

²⁶Abrahaamu vamoha ni mwanawe Iximayeli yiineliwe nihuku nenenenne.

²⁷Vano, vamoha ni Abrahaamu yaahiineliwa ootheene a vaatewawe, ooyariwa weiwe mpaka oothummwa a ilapo sikina.