Read Makhuwa-Shirima Epacerero 18 Bible Online

Epacerero 18 - Makhuwa-Shirima bible

Epacerero 18

¹Yave aahiixoonihera wa Abrahaamu vakhiviru wa nyiri sa ikarivalyu* sa oMamre, akilaathiyeene vamulako wa eheemaawe, mwa ehuhu yoovihaxa ya othana.

²Abrahaamu aawoona asilopwana araru yeemenleene woorakamela vakhaani. Awoonakaru, aavenya vamulako wa eheemaawe, anaatthimakela weera aakumaneno, anuuramela vathi.

³Vano aaheera: “Asipwiyaka, mwakitthunela, muhivire wa murumeiyaanyu muheemenle.

⁴Kinooruma oroweliwa maahi vakhaani weera murapihe inaawo nitho weera mwiitthuuwe vakhaani vathi wa mwiri ola.

⁵Vano woonaka weera moophiya wa murumeiyaanyu, kinimooruuhelanitho yooca, weera mpwaherere weetta ni ikuru.” Awo yaamwaakhula: “Paahi, opakeke ntoko ohimalaawo.”

⁶Woowaakuveya Abrahaamu aavolowa muheemanimwawe anamweerela Sara: “Waakuveke — okuxe mipatta miraru sa ephepa ya etrigu yooreeraxa ni weetheye opake ipaawu.”

⁷Vahoolowaya aatthimakela omuhuwoni, anathanla emombe exaana yooneneva, anamvaha murumeiyaawe weera aakuvihe oreherera.

⁸Vano aaruuha emombe exaana yoorehereriweene, mukaka ni manteeka saarehereriwe, anaarumeela. Ecaaka, owo aaweemelela vathi wa mwiri.

⁹Vano yaamukoha: “Ari woowi amwaarinyu Sara?” Owo aawaakhula: “muheemani mmwe.”

¹⁰Mmoha a yaawo aaheera: “Mwaahiyu ehuhuweene yeela, kinimoohokoleelani. Vano Sara anaamuyare mwaana.” Sara eera iiwelelaka vamulako wa eheema, ottuli wa Abrahaamu.

¹¹Abrahaamu ni Sara yaahuuluvala vancipale, ni wa Sara, saavira misingu sooweera ayare.

¹²Tivawo Sara iitheyaawe uupuwelaka: “Hiyo nuuluvanleene, weeraka kinookhalano yooreera eyo?”

¹³Vano Yave aamweerela Abrahaamu: “Heeni Sara oniitheyaawe eeraka: ‘Vekhaikhai kinoowera omuyara mwaana hiiha kuuluvanleene?’

¹⁴Yookhala etthu yoohiwereya wa Yave? Mwaahiyu ehuhuweene yeela kinimoohokoleelani ni amwaarinyu anookhalano mwaana mulopwana.”

¹⁵Sara aahoova vancipale tivawo aarunnaawe eeraka ‘miyo nkitheiye.’ Vano owo aaheera: “Ohirune, weyo wootheya.

¹⁶Vano asilopwana ale yeemenlaaya weera epwaheke, yaaweha mpatta wa oSodoma, ni Abrahaamu aahaahoola weera eraxelane.

¹⁷Vano Yave aaheera: “Kinoomwiipithiha Abrahaamu yeeyo kihanlaaka vakhaani opaka?

¹⁸Abrahaamu anaakhale tiithi a muloko mutokotoko ni woolipaxa, ni mwaha wa yoowo miloko sootheene sa mweelaponi nsireelihiwe.

¹⁹Vano Miyo kimuthanlenle weera aweettihe anamwanaawe ootheene ni ikhapirasawe sootheene weera etthare ephiro ya Yave, epakaka yeeyo eri yoororomeleya ni yoowookowa. Hiiho Yave onoomukwaniherela Abrahaamu yeeyo aamuroromelinghaawe.”

²⁰Vano Yave aamweerela: “Soowootheriwa sa oSodoma ni oGomora sootepa waattaxa ni yootthekaaya eri yoowoopiha,

²¹moota wooweera kinookhuruwelawo weera koone seiyo ampakaaya saalikanaka ni yeeyo kiiwalaaka.”

²²Asilopwana ale yaarowa mpaka oSodoma, mene Abrahaamu aapwaherera okhala vamaithoni wa Yave.

²³Abrahaamu aamwaattamela, amweerelaka; “Weeraka munrowa waaphwata atthu oohikhala ni nthowa vamoha ni yaawo ari ni nthowa?”

²⁴Noone ha: “Yakhala atthu miloko mithanu oohikhalano nthowa esidadeene yeele, munrowa ophwata? Khamunrowa wuurela nipuro nno niwoko na waasivela atthu miloko mithanu yaale ari mwemmo?

²⁵Khoongwereya wa Nyuwo opaka etthweene yeeyo omuthorihela okhwa mutthu oohikhalano nthowa vamoha ni mutthu orino nthowa. Mooteene yoowo khoongwereya wa Nyuwo waapakela moota mmoha atthu oohikhalano nthowa ni ookhalano nthowa. Nyuwo muri Mphuki a elapo ya vathi yootheene, ontthuneya othoriha nnene.”

²⁶Yave aamwaakhula: “Miyo kaaphwanya miloko mithanu oohikhalano nthowa oSodoma, nkuurele esidade yootheene niwoko na waasivela yaawo.”

²⁷Vano Abrahaamu aapwaherera wuuluma: “Koosuwela weera kootaphuwa woowuuluma ni Adonai, kiroohipwaharu etthaya ni ettuura.

²⁸Ankha yahaleela athanu okwana miloko mithanu oohikhalano nthowa? Munophwata esidade niwoko na ohaleela athanu?” Owo aaheera: “Kaaphwanya atthu miloko mixexe naathanu oohikhalano nthowa, nkinrowa ophwata.”

²⁹Abrahaamu aanyesera: “Ankha mwaaphwanya atthu miloko mixexe paahi?” Owo aamwaakhula: “Mwaha woowaasivela atthu miloko mixexe, nkinrowa ophwata.”

³⁰Vano Abrahaamu aapwaherera: “Adonai, muhinyoonyiwe, mene mukitthunihere wuulumatho. Ankha mwaaphwanya atthu miloko miraru paahi?” Owo aamwaakhula: “Kaaphwanya atthu miloko miraru, nkinrowa ophwata.”

³¹Abrahaamu aapwaherera: “Vano hapo kootaphuwa woowuuluma ni Yave, kinookoha: Ankha mwaaphwanya atthu miloko miili paahi?” Yave aamwaakhula: “Niwoko na waasivela atthu miloko miili, nkinrowa ophwata.”

³²Vano Abrahaamu aaheera: “Muhinyoonyiwe, Adonai, mene mukitthunihere wuuluma emaara emoha paahi. Ankha mwaaphwanya paahi muloko?” Owo amwaakhula: “Niwoko na waasivela atthu muloko, nkinrowa ophwata.”

³³Amalihaka Yave wuuluma ni Abrahaamu, aapwaha ni Abrahaamu aahokoleela oheemaniwawe.