Read Makhuwa-Shirima Epacerero 19 Bible Online

Epacerero 19 - Makhuwa-Shirima bible

Epacerero 19

¹Wiilaka, andyelo eeli ale yaaphiya oSodoma, ni Loti eera akilaantheene vamulako wa esidade. Awoonakaru, aaheemela, anarowa owaakhelela, anuuramela vathi.

²Vano aaheera: “Asipwiyaka, dyoontte, mukihoole vaate wa murumeiyaanyu weera mwarapihewo inaawosanyu, ni mmwavirihe ohiyu wootheene weiwo. Omaalo oxeexelo mwapwaherereke ni mukwaahaanyu.” Awo yaamwaakhula: “Hoye, hiyo nnivirihe ohiyu munseweni.”

³Loti aahaanyesereriha vancipale, ommaleloniwaya yaamuhoola, enavolowa mpaanimwawe. Loti aalamulela weera ereherereliwe yooca, ni yooxeriwe epaawu yoohikhala eferementu ni awo yaahooca.

⁴Vano nlelo yeera ehinaaye orowa okona, atthu ootheene a esidade ya oSodoma, okhuma asimiravo mpaka asitokweene, yaarukurera empa.

⁵Yaamwiitthana Loti enamweerela: “Ari woowi asilopwana awiiye ohiyuweene yoola vaatevawo va? Oniruuhele hiyo vaate va — nintthuna okonano yaawo.”

⁶Loti aakhuma mpaani, anawala nsele ottuli ottuli.

⁷Vano aaheera: “Hoye asinthamwenaaka, muhipake etthu yootakhala eyo.

⁸Moone ha, miyo kookhalano asinamwane eeli nlelo axaaruusi. Kinimooruuhelani weera mwaapake yeeyo nyuwo muntthunasaanyu. Muhaapake etthu asilopwana ala, niwoko aaphiya vaatevaka ni amphwanela waakihawaka.”

⁹Vano yaakhuwela: “Ovenye vamulako!” Eneera: “Mulopwana ola oophiya nno ntoko namarwa, vano ontthuna wiipaka mphuki! Nnimoopaka weyo wootepaxa waapwaha yaawo.” Yaamukakha Loti yeerelaka okakharula nsele.

¹⁰Vano aletto eeli ale yaamvara Loti, enampurulela mpaani, enawala mulako.

¹¹Vahoolowaya atthu yaari vamulako yaakhalihiwa evaasi, okhuma asimiravo mpaka asitokweene, moota wooweera yaahooceela woona mulako.

¹²Asilopwana eeli ale yaamukoha Loti: “Nyuwo mookhalano mutthu mukina musidadenimu — ntoko asikamwene, anamwane asilopwana ni asithiyana, naari mmusi mukina? Mwaakhumihe mu,

¹³niwoko nihanle vakhaani ophwata nipuro nenenenna. Soowoothera sipakeleiye muloko ola sootepa waatta moota wooweera Yave onirumihenlaawe ophwata esidade.”

¹⁴Vano Loti aarowa wuuluma ni asikamwenaawe yeera yaatheleke anamwanaawe weera evenye woowaakuveya nipuro nne, niwoko Yave aahanle vakhaani ophwata esidade. Aletho yuupuwela weera ole oopa mwaha.

¹⁵Oxaaka, andyelo yaamunyeserera Loti, yeeraka: “Mwaakuveke, mwaakuxeke amwaarinyu, ni anamwaniinyu eeli weera muhikhwe Yave aattaruxaka esidade ela.”

¹⁶Vano owo nlelo ahovelaka, asilopwana yaamvara ni matata vamoha ni mwaariye nitho anamwanaawe asithiyana eeli, enaakhumiha mmwe yaanyesereraka, enawiikaathi okerekhere wa esidade, niwoko Yave aahaamorela ikharari.

¹⁷Yaavenxaka musidadeni, mmoha a yaale eeli aamweerela Loti: “Mutthawe weera muurele okumi! Muhiwehe ottuli, hata muheemele vamuhawalawani. Mutthaweleke onyaakoni mwaaheera hiiho munimookhwa.”

¹⁸Wa soothesene, Loti aaweerela: “Hoye, apwiyaaka!

¹⁹Murumeiyaanyu oovuluwa ni oreerawanyu murima niwoko Yave aareera murima wa miyo, uurelaka okumaaka. Nkingwera otthawela onyaakoni, niwoko nkiphwanyiwe ni nttaruxo nno kikhweeke.

²⁰Vano, vakhiviru va, yookhala esidade emoha ekhaanene. Yookhuveelaxa, wookwana otthawelawo. Mukihiye kitthawelewo erimweeraru ereene ekhaanene, nkavuluwewo.”

²¹Owo aamwaakhula: “Paahi, kinoowaakhulelani nivekelo nno. Nkinrowa ophwata esidade mwa yeeyo nyuwo munghimaanyu.

²²Mutthaweke mwaakuveke, niwoko nkingwera opaka etthu nyuwo muhinaaye opwahawo.” Tivawo esidade ele yiitthaniwaaya Zowari.

²³Loti aphiyakaru oZowari, nsuwa naakhuma mweelaponi yootheene.

²⁴Vano Yave muneenaawe aarupihela oSodoma ni oGomora enxofre ni mooro okhumelelaka wiirimu.

²⁵Hiiho Owo aaphwata isidade piili iye ni mukhwipimwaya moothemwene, vamoha ni atthu oottheene yaamanke isidade iye, nitho sootheene saamenle mwemmwe.

²⁶Vano amwaariye Loti yaaweha ottuli, enathatuwa pontto a maakha.

²⁷Oxaawaya Abrahaamu aavenya, anahokoleela nipuro nenenenne aaraawewo ohoolo wa Yave.

²⁸Awehaka oSodoma ni oGomora ni oreyareyani wootheene, aahoona mwiixi mwincipale otthuwakawo ntoko niikho ntokotoko.

²⁹Muluku aphwatakaru isidade iye sa elapo ele, aamuupuwelela Abrahaamu, anamvenxa Loti mwa ophwata iwe waaphwante isidade piili iye Loti aamankaawe.

³⁰Loti aavenya oZowari ni anamwanaawe eeli asithiyana, anarowa omaka onyaakoni, niwoko aamova opwaherera omaka oZowari. Owo vamoha ni anamwanaawe eeli yaakhala munikhukuni nimoha.

³¹Vano nihuku nimoha, mwaana mutokweene aamweerela mukhaani: “Atithihu ahuuluvala. Vano khanaattamanne ni atthu akina weera enithele ntoko akhovelenlaaya atthu ootheene a elapo ya vathi yootheene.

³²Nrowe, naavahe eviinyu atithihu, naakonaneke weera enivahe ekhapira.”

³³Ohiyuweene yoole yaahaavaha eviinyu atithaya ni mwaana muthiyana mutokweene aavolowa, anaakonano. Vano awo khayaasuwenle weera ole aakonawo naari aavenyaawe.

³⁴Oxaawaya mwaana muthiyana mutokweene aamweerela mukhaani: “Osilo ohiyu kookonano atithaka. Nrowe naavahetho eviinyu, ni weyotho okonaneke, weera nipwahereriheke ekhapira ya atithihu.”

³⁵Vano emaara ekinatho yaahaavaha eviinyu atithaya ohiyuweene yoole, ni mwaana muthiyana mukhaani aakonano, owo ahisuwelaka weera ookonano naari aavenyaawe.

³⁶Hiiho anamwane eeli ale a Loti yaarupalihiwa ni atithaya.

³⁷Mwaana muthiyana mutokweene aamuyara mwaana mulopwana, anamutteha nsinanawe Mowabe. Owo ti tiithi a aMowabe ari mpaka olelo.

³⁸Mwaana muthiyana mukhaani aamuyara nave mwaana mulopwana, anamutteha nsinanawe Ben-Ami. Owo ti tiithi a awAmoni ari mpaka olelo.