Read Makhuwa-Shirima Epacerero 2 Bible Online

Epacerero 2 - Makhuwa-Shirima bible

Epacerero 2

¹Hiiho yaamalihiwa opattuxiwa erimu ni etthaya ni sootheene siri mwemmo.

²Vanihukuni nanaathannameeli, hapo Muluku aamalihalaawe ovara mutekwaawe, nihuku nne aahiitthuuwa.

³Muluku aareeliha nihuku nanaathannameeli ni aatteeliha, niwoko nihuku nne aahiitthuuwa mwa miteko aavanraawe moopattuxanimwawe.

⁴Ola ori mwaha wa ephattuwelo ya erimu ni etthaya mweehuhuni sipattuxiwaaya: Yave aapankaawe erimu ni etthaya,

⁵nlelo neera nihinaaye ophuwa naari niphuwa nimoha na ntuphini, hata mwiri mmoha weera ohinaaye omela, niwoko Yave eera ahinaaye orupiha epula vatthayani nitho khaakhanle mutthu eera alimeke.

⁶Wa soothesene, yaakhuma etthabwe vatthayani ni yaahelela etthaya yootheene.

⁷Vano Yave Muluku aamoopa mulopwana avarelaka muteko ntthupi na etthaya ni aamwiiseelela mphulanimwawe ngwiya wa okumi ni mulopwana aathatuwa okhala ni okumi.

⁸Moone, Yave Muluku aahaala mmatta wEdeni wa mpatta ninkhuma nsuwa ni aamwiikaathimo mulopwana aamoompaawe.

⁹Vano, vatthayani Yave Muluku aameliha moota wootheene wa nyiri soosiveleya mmaithoni ni sooreera oca. Eriyari ya ematta waakhala mwiri wa okumi ni mwiri wa woosuweliha yooreera ni yoonanara.

¹⁰wEdeni waaphattuwa mooloko waahelela ematta. Vahoolowaya waakawanyeya mipatta mixexe.

¹¹Nsina na woopacera ti Pixoni. Vano owo onrukureera elapo yootheene ya Havila, eraayawo eyuuma yoorikaxa.

¹²Eyuuma yoorikaxa ya elapo ele ti yooreera. Iwe yaakhalatho ebwanyaasi yoowunkhelaxa eniitthaniwa budeliyo* ni makina aniitthaniwa onikisi*.

¹³Wanaaveeli ti Giyomi omvira elapo yootheene ya oKuxe.

¹⁴Wanaararu omvira mpatta ninkhuma nsuwa wa wAsiriya, nsinanawe Tigere ni mooloko wanaaxexe ti Efratesi.

¹⁵Vano, Yave Elohim aamukhaliha mulopwana mmatta ya wEdeni weera alimeke ni alamuleke.

¹⁶Yave Muluku aamulamulela mulopwana, amweerelaka: “Muceeke soowiima sa wakhalaru mwiri wEdeni,

¹⁷vaheera muhiceru sa mwiri onsuweliha yooreera ni yoonanara, niwoko nihuku muneeraanyu muce sa yoowo, vekhaikhai mmwikhwe.”

¹⁸Yave Muluku aaheera: “Khoohiyono wooreera mulopwana okhala meekhaawe; kinoompaka mukina weera amukhavihereke ni akhaleke mukhwaawe.

¹⁹Oopiyeene vatthayani inama sootheene sa ntuphini ni ipalame sootheene sa wiirimu. Yave Muluku aamuruuhela mulopwana ole weera oone moota heeni eeraawe attehe masinaaya. Ni khula nsina eeraawe attehe ikhalelo sootheene sa okumi sootheene — nno naarowa okhala nsinanaya.

²⁰Hiiho mulopwana aatteha masinaaya mihuwo sootheene; ipalame sa wiirimu ni inama sootheene sa ntuphini. Wa soothesene, khaaphwanyaneya wa mulopwana ole mukina eera amukhavihereke weera akhaleke mukhwaawe.

²¹Vano Yave Muluku aamuruuhela mulopwana ikhove weera akonaxe vancipale, ni akonaka hiihaale, aamvenxa niparari nimoha awalaka nipuro nne ni ethai ya erutthwaawe.

²²Yave Muluku aampaka muthiyana ni niparari aavenxalaawe mweerutthuni ya mulopwana ni aamuroihela ole.

²³Vanonto, mulopwana aaheera: “Aani, ola ti nikhuva na makhuvaaka ni erutthu ntoko erutthwaaka! Ola aniitthaniwe “muthiyana,” niwoko okhumihiwe mweerutthuni ya mulopwana.”

²⁴Tivawo, mulopwana anaahiye atithawe ni amayawe ni anaathukumane ni mwaariye ni awo eniithatuwe erutthu emoha paahi.

²⁵Mulopwana ni mwaariye yaakhala woohiwara, mene khaayuuliwaru muru.