Read Makhuwa-Shirima Epacerero 20 Bible Online

Epacerero 20 - Makhuwa-Shirima bible

Epacerero 20

¹Vano Abrahaamu aavenya weiwe arowaka elapo ya oNegeba, anarowa omaka eriyari ya oKade ni oXuri. Vano, aakhala wa mahuku makina oGerari.

²Owo eera weera maariye Sara aari murokoriye. Vano Abimeleki, mwene a oGerari, aarumiha oroweliwa Sara, anamukuxa.

³Wa soothesene, Muluku aahoowa wa Abimeleki moolohani, anamweerela: “Weyo onimookhwa! Muthiyana omukuxalaawo ootheliwa.”

⁴Vano, Abimeleki nlelo eera ahinaaye okonano ni aaheera: “Yave munoophwata muloko woohikhalano nthowa?

⁵Khahiyono yoowo okeerenle: ‘Ola murokoraka’? Ni muthiyana munenaawe eenre: ‘Ala acimweene’? Yeeyo kipankaaka, kipanke ni murima wootteeleene ni matata ooreereene.”

⁶Vano Muluku aamwaakhula moolohani: “Aani Miyo koosuwela weera weyo opanke yeeyo ni murima wootteela. Miyo muneenaaka koowooceeliha weera ohikitthekele Miyo, tivawo kihootthunihenraaka omutava.

⁷Vano, omuhokoloxere mwaneene a muthiyana owo. Owo mprofeeti, onimoovekelela weera weyo ohikhwe. Mene waahimuhokoloxera, osuwele nnenesene weera weyo vamoha ni amusaawo onimookhwa.”

⁸Oxaawaya Abimeleki aahaalattula anamalakaawe ootheene ni aathaliherakaru yeeyo yaamukhumelenle, yaahoova vancipale.

⁹Vahoolowaya Abimeleki aamwiitthana Abrahaamu, anamweerela: “Onipankeni? Kootthekenle eheeni okiruuhelaka nthowa ntokotoko miyo vamoha ni omwenaaka? Yeeyo okipankaawo kheehiyono etthu yooreera omupaka mukhwaawo.”

¹⁰Vano Abimeleki aamukoha Abrahaamu: “Eweeringhe eheeni opakaka yeela?”

¹¹Abrahaamu aamwaakhula: “Miyo kohiixeerela mwaneenaaka: ‘Vekhaikhai khaawo ammoova Muluku nipuro nna, ni eniikiive mwaha wa mwaaraka.

¹²Ohiya toko yeeyo, vekhaikhai owo murokoraka wa mpatta wa atithaka ohikhanle mpatta wa amaayi, anakhala mwaaraka.

¹³Vano Muluku aakivenxaawe vaate wa atithaka, miyo kaamweerela: Wiixoonihereke onnenaawo moota ha: mmapuroni moothemwene nneeraahu niroweke, weereke: ‘ala acimweene’.’“

¹⁴Vano Abimeleki aakuxa ikhondoolo, ni imombe, ipottha ilopwana ni ithiyana, anamvaha Abrahaamu, anamuhokoloxera mwaariye Sara.

¹⁵Vano Abimeleki aamweerela: “Elapwaaka eri ohoolowawo — omakeke ontthunaawo.”

¹⁶Vanonto, aamweerela Sara: “Koomvaha murokoriyo ixekeli* macira muloko weera kiwoonihere awawo ootheene weera khoonono nthowa ni ahikhale aneera awoothere etthu.”

¹⁷Abrahaamu aamvekela Muluku ni Owo aamulamiha Abimeleki, amwaariye ni mpaka ipotthasawe ni hiiho yaaweratho oyara.

¹⁸Vano, ehinaaye, Yave aahaakhaliha asimwali eekupa asithiyana ootheene a vaate wa Abimeleki mwaha wa Sara, mwaara a Abrahaamu.