Read Makhuwa-Shirima Epacerero 21 Bible Online

Epacerero 21 - Makhuwa-Shirima bible

Epacerero 21

¹Vano Yave aamuxekura Sara ni aampakela ntoko aamuroromelinghaawe.

²Sara aarupala, anamuyarela mwaana mulopwana Abrahaamu ngwuuluvalanimwawe, mweehuhuni aahimalaawe Muluku.

³Abrahaamu aamutteha nsinanawe Isaki, mwaana aamuyarenlaawe Sara.

⁴Isaki aarinaawe mahuku mathannamararu a oyariwawawe, Abrahaamu aamwiinela ntoko Muluku aamulamulenlaawe.

⁵Amuyaraka Isaki, Abrahaamu eera akhalanneene iyaakha ncira.

⁶Vano Sara aaheera: “Muluku ookisariha ni otheya, ni ootheene asuwenle yeeyo anootheya vamoha ni miyo.”

⁷Vano aaheera: “Taani aahovela wa Abrahaamu weera Sara anaamwaamwihe mwaana? Wa soothesene, miyo koomuyarela mwaana mulopwana orookhalaru oowuuluvaleene.”

⁸Vano mwaana ole aahunnuwa, anahiihiwa waamwa. Ni nihuku aahiihiwaawe waamwa, Abrahaamu aapaka efesta etokotoko.

⁹Wa soothesene, Sara aahoona weera mwaana a Hagari, ngwExipitu, aamuyarenlaawe Abrahaamu aamutthebwa Isaki.

¹⁰Vano aarowa wuuluma ni Abrahaamu: “Moomole epottha ela vamoha ni mwanaya. Nkintthuna weera mwanaya akhale namahiyeriwa vamoha ni mwanaka, Isaki.”

¹¹Vano Abrahaamu khaahakalalenle masu ale, niwoko aahimmwa mwanawe.

¹²Vano Muluku aamweerela Abrahaamu: “Muhithanane mwaha wa mwaana ni epottha. Mwaakhuleleke yeeyo oovekenlaaweni Sara, niwoko epuumbaanyu eniyaalikeleliwe mwa Isaki yoowo.

¹³Vano mwaana a epottha kinoomukhalihatho muloko, niwoko owotho mwaninyu.”

¹⁴Oxaawaya Abrahaamu aakuxa yooca ni ekacikhi yoosareya maahi, anamvaha Hagari. Vano, amuthatelihakaru mmakhatani, aamulaxera vamoha ni mwaana. Owo aapacera weetta amakamakaka munikareni na oBerxeba.

¹⁵Vano emalakaru maahi aahenlaawe mukacikhini, aamuhiya mwaana vaniphuwani.

¹⁶Vano aarowa okilaathi ottai vakhaani, moota onkotaaya wuumpha wa muupa, niwoko uupuwela: “Nkintthuna omoona mwaana akhwaaka.” Akilaathiyeene vathi aahiinla vancipale.

¹⁷Vano Muluku aamwiiwa mwaana iinlaka, ni ndyelo a Yave aamwiitthana Hagari wiirimu eeraka: “Enoothananiha eheeni Hagari? Ohoove, niwoko Muluku ohiiwa nsu na mwaana weiwo weyo omuhiyalaawo.

¹⁸Ovenye, omukuxe mwaana omvareleke ni ntata, niwoko mwa yoowo kinookhaliha muloko mutokotoko.”

¹⁹Muluku aamoonihera Hagari ehime. Aarowawo, anasariha maahi mukacikhini, anamvaha owura mwaana.

²⁰Muluku aamukhavihera mwaana ole ni owo aahunnuwa. Aamanke munikareni ni aathatuwa namawera olatha ni muupa.

²¹Aakhala munikareni na oParani ni amayawe yaamutheliha muthiyana a wExipitu.

²²Vano wa ehuhuweene yeele Abimeleki ahooliwaka ni Pikoli, mutokweene a anakhottwaawe, aamweerela Abrahaamu: “Muluku ori mpattaawo mwa sootheene seiye ompakaawo.

²³Vano kinoovekela weera vaanaanova omulipele Muluku weera khoorwa onilokottha hata miyo, naari anamwanaaka mpaka ekhapiraaka yootheene. Opwatthe muloko owaakhelenle ntoko namarwa ni oreerawene murima weiwo miyo koonihenraaka.”

²⁴Abrahaamu aamwaakhula: “Miyo kinoolipela!”

²⁵Wa soothesene, Abrahaamu aahuuluma ni Abimeleki sa ehime arumeiyaawe Abimeleki yaakamenlaaya.

²⁶Vano Abimeleki aamwaakhula: “Nkaasuwenle taani yaapanke yeeyo. Khoonatoko okileela etthu. Olelonto kimmweera osuwela.”

²⁷Vano Abrahaamu aaruuha ikhondoolo ni imombe, anamvaha Abimeleki, ni ooweeli awo yaahiiraana.

²⁸Abrahaamu aamwalamwaliha ikhondoolo ithannapiili ithiyana sa muhuwaawe.

²⁹Vano Abimeleki aamukoha: “Entaphulela eheeni ikhondoolo ithannapiili ithiyana omwalamwanxaawo ni iyo sikina?”

³⁰Vano owo aamwaakhula: “Mwaakhelele ikhondoolo iya ithannapiili ithiyana sawaka ntoko onamoona weera musuwele weera ti miyo kaathimpe ehime ele.”

³¹Tivawo nipuro nne niitthaniwaaya oBerxeba, niwoko iwe ooweeli yaahiiraana.

³²Vano yaakhulelaka wiiraana iwe oBerxeba, Abimeleki ni Pikoli, mutokweene a anakhottwaawe, yaahokoleela elapo ya aFilisti.

³³Abrahaamu aaphatteya oBerxeba tamargira*, aniitthana Nsina na Yave, Muluku oohimala.

³⁴Vano, Abrahaamu aamaka elapo ya aFilisti mweehuhuni yincipale.