Read Makhuwa-Shirima Epacerero 22 Bible Online

Epacerero 22 - Makhuwa-Shirima bible

Epacerero 22

¹Vano eviraka mahuku makina, Muluku aamoota murima Abrahaamu amweerelaka: “Abrahaamu!” Owo aamwaakhula: “Miyo kiri va!”

²Vanonto Muluku aamweerela: “Munkuxe mwaninyu mmoharu, Isaki yoowo nyuwo munimusivelaanyu, ni murowe elapo ya oMoriya. Mwampake yooveleela yoohisa mwaako yoowo Miyo kineeraaka koothoonyereni.”

³Vano oxaawaya Abrahaamu aahiireherera, anatthukelela murindaawe vabuuruni. Vamoha ni yoowo aahaakuxa eeli a arumeiyaawe nitho mwanawe, Isaki. Vahoolo wa othikila ikhuuni wa yooveleela, aavenya arowaka mpatta ole Muluku aamuthoonyenraawe.

⁴Nihuku nanaararu na mukwaahaawe, Abrahaamu aaweha, anoona ottaiwene nipuro nne.

⁵Vanonto owo aaweerela arumeiyaawe: “Muhaleke vaava ni buuru ola. Miyo ni mmiravo ninrowa mpaka iwe. Vahoolo wa omulapa Muluku, nimmoophwanyani.”

⁶Abrahaamu aakuxa ikhuuni sa yooveleela, anamuthateliha mwanawe. Owo muneenaawe aakuxa mooro ni mwaalo. Erowaka vamoha ooweeli ale,

⁷Isaki aamweerela Abrahaamu: “Tiithi?” Ni owo aamwaakhula: “Okileele mwanaka.” Isaki aamukoha: “Hiyo va, mooro nookuxa, ikhuuni nookuxa, vano eputtiputthi ya yooveleela eri woowi?”

⁸Abrahaamu aamwaakhula: “Mwanaka, Muluku muneenaawe onooruuha eputtiputthi ya yooveleela.” Yaapwaherera ooweeli weetta ni mukwaahaaya.

⁹Ephiyakaru vanipuroni Muluku aamuthoonyenraawe, Abrahaamu aahaateka altaari*. Aahuukela ikhuuni vasuluwaya, anamutthuka mwanawe Isaki, anamwiikaathi vasulu ikhuuni wa altaari*.

¹⁰Vano aahookola moonowaawe, anakuxa mwaalo weera amwiive mwanawe.

¹¹Vanonto, ndyelo a Yave aamwiitthana wiirimu: “Abrahaamu! Abrahaamu!” Owo aamwaakhula: “Miyo kiri va!”

¹²Ndyelo eenre: “Muhimutave mmiravo owo! Muhimpake etthu. Vano koosuwela weera nyuwo munnimoova Muluku, niwoko khamukikhoottihenre mwaninyu mmoharu.”

¹³Abrahaamu aattukhula maitho, anoona eputtiputthi yooneneva yaangihiweene manyaka muniphuwani. Vano aarowa, anakuxa, anapaka yooveleela vanipuroni na mwanawe.

¹⁴Abrahaamu aatteha nipuro nne Nsina na “Yave anaavahe.” Tivawo mpaka olelo eneeriwaaya: “Vamwaakoni wa Yave, eniivahiwe”

¹⁵Vanonto, emaara yanaaveeli ndyelo a Yave aamwiitthana Abrahaamu wiirimu, aneera:

¹⁶“Kiniilipela Miyo muneenaaka: Mweenre mpakaka yeeyo, muhikikhoottiheraka mwaninyu mmoharu,

¹⁷vano vekhaikhai Miyo nkooreeliheni. Ekhapiraanyu eniikhale yoowaattaxa ntoko ithenyeeri sa wiirimu ni muhaava wa mukerekhere wa ephareiya. Aani, ekhapiraanyu eniiwine isidade seiyo sineera siittane ni yeeyo.

¹⁸Vano mwaha wa yeeyo miloko sootheene sa elapo ya vathi nsireelihiwe niwoko nyuwo mookiiwelela.”

¹⁹Abrahaamu aahokoleela wa arumeiyaawe, anarowa vamoha ni yaawo oBerxeba mwa weiwo aamankaawe.

²⁰Eviraka ehuhu ekina, aaheereliwa Abrahaamu weera Milka aamvaha anamwane asilopwana munneiye Nahori:

²¹Uzi, mutokweenexa, munneiye Buzi, Kemuweli tiithaawe Arami,

²²Kesedi, Hazo, Pilidaxi, Yidelafi ni Betuweli,

²³atithawe Rebeka. Ala yaari anamwane athannaararu Milka aamuyarannaawe Nahori, munneiye Abrahaamu.

²⁴Vano ekuxowaawe yaari epottha yiitthaniwa Rehuma, aakhalano anamwane ala: Teba, Gahami, Tahaxi ni Mahaka.