Read Makhuwa-Shirima Epacerero 23 Bible Online

Epacerero 23 - Makhuwa-Shirima bible

Epacerero 23

¹Saara aakhala ni okumi iyaakha ncira ni miloko miili niithannapiili.

²Aakhwenle oKiriyate-Arba, ori oHeberoni, elapo ya oKanaani ni Abrahaamu aarowa olalamika ni omwiinlela yoowo.

³Vahoolowaya Abrahaamu aahiya muttembo wa mwaariye, anarowa wuuluma ni aHiti aweerelaka:

⁴“Miyo kiri paahi namarwa variyariwanyu. Mukithumihere nipuro weera kipake nihiye weera kimvithe mwaaraka.”

⁵Vano aHiti yaamwaakhula Abrahaamu:

⁶“Muniiwe apwiya, nyuwo ti mutokweene mmoha a Muluku variyariwahu. Mumvithe mwaarinyu variyari wa mahiyaahu, muthanlaka nipuro muntthunaanyu. Khawowo hata mutthu mmoha aneera ookhoottiheni omvitha mwaarinyu.”

⁷Abrahaamu aaheemela, anaarukunuwela atthu a elapo ele ya aHiti.

⁸Vanonto aaweerela: “Vano mwakitthunihera omvitha mwaaraka, mumvekele Efroni mwaana a Zowari,

⁹weera akivahe nikhuku na Makipela, nri nawawe, nimphwanyaneya mukerekhere wa emattaawe. Miyo kinooliva muneeraanyu mukilamule. Hiiho nkikhale muneene a nihiye nimoha mweelaponimwanyu.”

¹⁰Vano Efroni, muHiti, eera akilaantheene variyari wa mulokwaawe ni aamwaakhula Abrahaamu, iiwiwaka ni aHiti ootheene yaawo yaavira vamulako wa esidade:

¹¹“Hoye, apwiya, mukiiwe. Miyo kinoovahani ematta, nitho nikhuku nri mwemmo. Kinoovahani vamaithoni wa mulokwaaka, mwaavitheke amwaarinyu.”

¹²Emaara yanaaveelitho Abrahaamu aarukunuwela muloko wa elapo ele.

¹³Aamweerela Efroni iiwiwaka ni atthu ootheene: “Dyoontte, mukiiwe. Nkilive hiiho muntthunelaanyu. Mwaakhulele, weera kivithe muttembo wa amwaaraka.”

¹⁴Vano Efroni aamwaakhula Abrahaamu:

¹⁵“Mukiiwe, apwiyaaka: Mpatta wa etthaya ele, omphwanela othumihiwa ixekeli* macira maxexe. Yoopwattheleya eheeni variyariwahu? Mwaavithe amwaarinyu.”

¹⁶Vano Abrahaamu aahaakhulela oliva yeeyo Efroni aalamunlaawe, anamvaha vamaithoni wa atthu ootheene ixekeli* macira maxexe, yeeyo yaahimalaaya anamathumiha.

¹⁷Hiiho ematta ya Efroni eri oMakipela ohoolo wa oMamre, nitho nikhuku ni nyiri sootheene saarimo aathumiheriwa Abrahaamu.

¹⁸Aavahiwa Abrahaamu okhala sawawe vamaithoni wa aHiti ootheene yaarwiiye vamulako wa esidade.

¹⁹Vahoolowaya Abrahaamu aamvitha mwaariye Sara munikhukuni mwa ematta ya oMakipela, vakhiviru wa oMamre, ori oHeberoni, elapo ya oKanaani.

²⁰Hiiho ematta ni nikhuku na mwemmwe aavahiwa Abrahaamu ni aHiti, weera mwemmo aavitheke atthwaawe yaakhwaaka.