Read Makhuwa-Shirima Epacerero 24 Bible Online

Epacerero 24 - Makhuwa-Shirima bible

Epacerero 24

¹Abrahaamu aahuuluvala vancipale, ni Yave aamureeliha mwa sootheene.

²Vanonto aamweerela murumeiyaawe mutokweene aawehaweha sootheene aarinaawe sa vaatevawe: “Wiikaathi ntatanawo vatakhwiniwaka

³ni omulipele Yave Muluku a wiirimu nitho a elapo ya vathi weera ohimwaasere muthiyana mwanaka variyari wa anamwane asithiyana a oKanaani, eriyari ya yaawo miyo kimankaaka.

⁴Vano ontthuneya weyo orowa elapwaaka weera waamuthanlelewo mwanaka Isaki muthiyana eriyari ya asinaangolowaaka.”

⁵Murumeiyi ole aamukoha: “Ankha muthiyana owo aahitthuna okitthara elapweene yeela? Kimuroiheke mwaninyu elapo yeeyo mukhumelenlaanyu?”

⁶Abrahaamu aamwaakhula: “Nnene! Ohimuhiye mwanaka ahokoleelaka weiwo.

⁷Yave Muluku a wiirimu, aakivenxale vaate wa atithaka ni elapwaaka kiyariwaaka ni aakiroromelinghe ni nlipelo weera aarwa ovaha elapo ela ekhapiraaka, anaamurumihe ndyelowaawe ohoolowawo, weera weiwo wamuruuhele muthiyana mwanaka.

⁸Vano muthiyana owo aahitthuna orwa wenno, weyo khoonono mulattu ni nlipelo, mene ohimuhokoloxere mwanaka wuuwu.”

⁹Murumeiyi aahiikaathi ntatanawe vatakhwini wa Abrahaamu, apwiyaawe, analipela weera anaakwanihere masu ale.

¹⁰Vanonto, murumeiyi ole aavenya ni ahaaci muloko a apwiyaawe, akuxakatho itthu sikina sooreeraxa sa apwiyaawe. Aavenya arowaka oMesopotamiya, mpatta wa esidade Nahori aamankaawe.

¹¹Vano, wiilaka, aahaakokhoriha aahaaci muxerexere wa ehime ya ottuttuwani yaari okhwipi wa esidade ele. Yaari ehuhu emoharu yeeyo asithiyana a esidade ele yaakhovolenlaaya orika maahi ohimeni.

¹²Vano aavekela: “Yave, Muluku a apwiyaaka Abrahaamu, mukivahe nihuku nna etthu yooreeraxa, ni mukhale ni murima wooreera mwaakhalelaka apwiyaaka Abrahaamu.

¹³Ntoko munoonaanyu, kiri va mukhwipi wa ehime ela ni asimwali a muloko wa esidade ela anrwa orika maahi.

¹⁴Muntthunihere weera kamweerela mwaamwali: ‘Okivahe maahi’ ni owo aneera: ‘Ngwure ni kinimwaavaha akamelowaanyu maahi,’ vano, akhale yoowo munthanlenlaanyu murumeiyaanyu Isaki. Hiiho, nkisuwele weera mohaareerela murima apwiyaaka.”

¹⁵Owo ahinaaye omaliha ovekela, aakhumelela Rebeka iireiyeene mwaapu. Owo aari mwaana muthiyana a Betuweli, mwaana mulopwana a Milka, mwaara a Nahori, munneiye Abrahaamu.

¹⁶Mwaamwali ole aari ooreeraxa ni oowiikosoopa, hata mulopwana mmoha kaatonke okonano. Rebeka aakhuruwela vahimeni, anarika maahi, anarowa.

¹⁷Vano murumeiyi ole aarowa woowaakuveya omukumanano, anamweerela: “Dyoontte mukivahe maahi vakhaani a mmwaapunimwanyu.”

¹⁸Owo aaheera: “Ngwureke apwiyaaka,” ni woowaakuveya aarula mwaapu anamurumeela.

¹⁹Vano amvahakaru owura maahi, aamweerela: “Nkaavahetho maahi akamelowaanyu weera ewureke mpaka waakwana.”

²⁰Woowaakuveya aahiittha maahi iitthelaka nipuro na owura, anatthimakela ohimeni weera ariketho maahi ookwana owuriha ikamelu* sootheene.

²¹Vanonto, murumeiyi a Abrahaamu aangwehexexa ole amaanleene, weera oone Yave aariki akwanihere otthuna wa apwiyaawe.

²²Ikamelu* iye simalihakaru owura maahi, mulopwana ole aamvaha mwaamwali ecipini ya ebeka* emoha olemelawaya, anangwariha mmoononimwawe ipangiiri piili sa eyuuma yoorikaxa, ixekeli* muloko olemelawaya.

²³Vanonto aamukoha: “Weyo mwaana awani? Dyoontte okileele naariweene nipuro vaate wa atithawo weera miyo ni asikhwaaka nakonewo.”

²⁴Ole aamwaakhula: “Miyo ti mwaana a Betuweli, mwaana a Milka ni a Nahori.

²⁵Vano owannyihu nookhala nipuro nookwana wa nyuwo okhalawo, nitho nookhalano malaxi ni yooca yincipale yookwana oca axinama.”

²⁶Mulopwana ole aahuurama amulapaka Yave, eeraka:

²⁷“Ooreelihiwa ti Yave, Muluku a apwiyaaka Abrahaamu, ohihiyerenre owoonihera apwiyaaka oreerawawe murima ni ororomeleyawawe. Wa mpattaaka, Yave aakeettiha akihoolaka mphironi mpaka vaate wa asinaangolowaaya apwiyaaka.”

²⁸Vano, mwaamwali ole aatthimakela owannyawe, anaathalihera soothesene amusaaya amayawe.

²⁹Rebeka aakhalano acimweenaawe yiitthaniwa Labani. Awo yaavenya woowaakuveya erowaka ohimeni weera yamusuwele mulopwana ole.

³⁰Yoonakaru ecipini ni ipangiiri mmoononi mwa murokoraya, ni emwiiwakaru Rebeka athalihaka sootheene mulopwana ole aamuleenlaawe, aavenya, anamphwanya mulopwana ole eemenleene vahimeni mukerekhere wa akamelowaawe.

³¹Vano yaamweerela: “Ngweeke ooreelihiwa a Yave. Mukhalenle heeni okerekhere iwo? Kooreherera empa ni nipuro na ikamelu*.”

³²Vanonto murumeiyi aarowa owaani ni Labani aalamulela okuruxiwa mirindi vakameluni. Aavaha malaxi ni yooca ikamelu* iye ni maahi wa mulopwana ole vamoha ni yaawo yaari ni yoowo weera erapihe inaawo.

³³Vahoolowaya yaangwiihera yooca, mene murumeiyi aaheera: “Nkirwa kica kihinaaye wooleelani etthu kirinaaka.” Labani aamweerela: “Hayaka, muulumeke.”

³⁴Vano owo aaheera: “Miyo ti murumeiyi a Abrahaamu.

³⁵Yave aamureeliha vancipale ni owo aakhalano mihakhu sincipale. Oomvaha ikhondoolo, imombe, iyuuma soorikaxa, arumeiyi alopwana ni athiyana, ikamelu* ni abuuru.

³⁶Sara, mwaara a apwiyaaka, ngwuuluvalanimwawe aahaayarela mwaana ori namahiyeriwa a soothesene Abrahaamu orinaawe.

³⁷Vano apwiyaaka yaakilipeliha, yeeraka: ‘Weyo khoorwa omwaasera muthiyana mwanaka variyari wa asithiyana a oKanaani a elapweene yeela kimankaaka.

³⁸Orowe wa emusi ya atithaka, wa nihimonaka noohaasaasiwa weera wamwaasere mwanaka muthiyana.’

³⁹Vanonto kaahaakoha apwiyaaka: ‘Ankha muthiyana owo aahitthuna okitthara’

⁴⁰Awo yaakaakhula: ‘Yave Yoowo kinimurumeelaaka anoorumihele ndyelowaawe, nitho anoowerihe weera weyo weette nnenesene ni mukwaahaawo, weeratho omuruuhele mwanaka, muthiyana a nihimonaka, aani a emusi ya atithaka.

⁴¹Vano, waaphiyaka wa asinaangolowaaka ni awo yakhootta omvaha mwanaka muthiyana, weyo onuukhale ootaphuweene ni nlipelo nna. Aani, vamwaheene yoola, weyo khootthukiwa ni nlipelo nna.’

⁴²Olelo kiphiyakaru ohimeni koovekela: ‘Yave, Muluku a apwiyaaka Abrahaamu, waari weera mukwaahaaka ti otthunawanyu, mwiiwe nivekelonaka nna:

⁴³Va miyo kiri yeemelelo ohoolo wa ehime ela. Vano, arwa mwaamwali orika maahi ni miyo kamweerela: ‘Dyoontte okivahe maahi weera kiwure a mmwaapunimwawo,’

⁴⁴ni owo akaakhula: ‘Ngwureke, nitho kinimwaavaha maahi akamelowaanyu,’ vano, akhale yoowo Yave omuthanlalaawe weera akhale mwaara a mwanaya apwiyaaka.’

⁴⁵Vanonto kihinaaye omaliha ovekela mmurimanimwaka, aakhumelela Rebeka iireiyeene mwaapu. Aarowa vahimeni anarika maahi, ni miyo kinamweerela: ‘Dyoontte okivahe kiwure.’

⁴⁶Woowaakuveya aarula mwaapwaawe, aneera: ‘Ngwureke. Ni kinimwaavahatho maahi akamelowaanyu.’ Miyo koowura, ni owo aahaavahatho owura maahi akamelowaaka.

⁴⁷Vahoolowaya kaamukoha: ‘Weyo, mwaana awani?’ Owo aakaakhula: ‘a Betuweli, mwaana a Nahori ni Milka.’ Vano kaangwariha ecipini ni ipangiiri mmoononimwawe.

⁴⁸Kaahuurama kimulapaka Yave. Kaamutthapela Yave, Muluku a apwiyaaka Abrahaamu, aakihoonle mphironi ya ekhaikhai weera kamwaasere mwanaya musulwaaya munnaya apwiyaaka.

⁴⁹Vano mwatthuna owoonihera ororomeleya ni oreera murima apwiyaaka, mukileele, ni mwaahitthuna mukileeletho, weera miyo kilakele etthu yoopaka.”

⁵⁰Labani ni Betuweli yaamwaakhula: “Eyo engweela wa Yave. Kheewo nneeraahu nooleele yooweera aani naari hoye.

⁵¹Rebeka ti yoola. Omukuxeke ni ola akhale mwaara a mwaana a apwiyaawo ntoko Yave eenraawe.”

⁵²Vano murumeiyi a Abrahaamu iiwakaru yeeyo yaahimalaaya, aahuuramela vathi ohoolo wa Yave.

⁵³Murumeiyi ole aamvaha Rebeka itthu sa iyuuma soorikaxa ni soowara. Anaavahatho itthu soorikaxa acimweenaawe ni amayawe.

⁵⁴Vahoolowaya owo ni asilopwana ale yaamuhoonle yaahooca, enawura ni iwe yaaviriha ohiyu wootheene. Oxaawaya murumeiyi a Abrahaamu aaheera: “Mukihiye kihokoleele wa apwiyaaka.”

⁵⁵Acimweenaawe ni amayawe Rebekatho yaamwaakhula: “Omuhiye mwaamwali akhaletho ni hiyo wookwana mahuku muloko. Vahoolowaya apwaheke.”

⁵⁶Mene aawaakhula: “Muhicerewihe ohokolowawaka, niwoko Yave oheettiha mukwahaaka nnenesene. Mukihiye kirowe weera kihokoleele wa apwiyaaka”

⁵⁷Awo yaamwaakhula: “Nrowe nimwiitthane mwaamwali weera noone aneeraawe ahime.”

⁵⁸Vano yaamwiitthana Rebeka, enamukoha: “Weyo wootthuna orowa ni mulopwana ola?” Owo aawaakhula: “Aani, kinoorowa.”

⁵⁹Amusi yaaraxelana ni acimweenaawe Rebeka, murumeiyaawe, murumeiyi a Abrahaamu ni asilopwana yaamuhoonle.

⁶⁰Yaamureeliha Rebeka emweerelaka: ”Wunnuwe murokorihu mpaka okhale maayi a atthu ancipalexa! Ekhapiraawo ewine isidade sa amwiittanaawo.”

⁶¹Vahoolowaya Rebeka ni arumeiyaawe yaahiireherera, enawela ikamelu*, enamutthara murumeiyi a Abrahaamu. Ni hiiho aamukuxa Rebeka, anapwahano.

⁶²Vano, Isaki eera awaaka oBeher-Lahi-Royi, niwoko aamanke oNegeba.

⁶³Oxekuwa omoha, aavenya akelaka omatta weera atthokelele. Attukhulaka maitho, aahoona ikamelu* saattamelaka.

⁶⁴Rebekatho aattukhula maitho ni aamoona Isaki. Owo aakhuruwa wakameluni,

⁶⁵anamukoha murumeiyi a Abrahaamu: “Mulopwana taani yoole ongweela omatta aniciceeraka?” Owo aamwaakhula: “Ti apwiyaaka.” Vano Rebeka aakhuneela ekhovaawe ni ekuwo.

⁶⁶Vahoolowaya, murumeiyi aamuthalihera Isaki sootheene seereiye.

⁶⁷Isaki aamuroiha Rebeka muheemani mwa amayawe Sara. Aamuthela ni aamusivela. Ni hiiho Isaki aapepeseya okhwa wa amayawe.