Read Makhuwa-Shirima Epacerero 26 Bible Online

Epacerero 26 - Makhuwa-Shirima bible

Epacerero 26

¹Vano yaakhala etala mweelaponi ele ntoko yaakhumelenlaaya mweehuhuni ya Abrahaamu. Tivawo Isaki aarongwaawe oGerari weiwo Abimeleki aaraawe mwene a aFilisti.

²Yave aahiixoonihera wa Isaki anamweerela: “Muhirowe wExipitu, mene murowe elapo yeeyo Miyo kineeraaka koothoonyereni.

³Mpwaherereke okhala elapweene yeela mahuku vakhaani. Miyo nkikhale ni nyuwo, nitho nkooreeliheni. Nkoovaheeni, nyuwo vamoha ni ekhapiraanyu yootheene elapo yootheene ela ni nkikwanihere nlipelo kaapakenlaaka atithinyu, Abrahaamu.

⁴Vano nkaandyeerere ekhapiraanyu ntoko ithenyeeri sa wiirimu, nitho nkivahe ilapo sootheene iya. Mwaha wa ekhapiraanyu miloko sootheene sa elapo ya vathi nsireelihiwe,

⁵niwoko Abrahaamu aahiiwelela, anakwanihera kaamurumalaaka sootheene, malamulo ootheene, ikano sootheene ni soolamulasaka sootheene.

⁶Vanonto Isaki aamaka oGerari.

⁷Atthu a elapo ele yaamukohakohaaya mwaha wa mwaariye, owo eera weera aari murokoriye, oovaka weera, eera mwaariye, yaammwiiva weera emuthele Rebeka eenre areeraxaka.

⁸Isaki areene ehuhu yincipale oGerari, nihuku nimoha Abimeleki, mwene a aFilisti areene vaxanelani, aamoona Isaki apakaka orottolo ni mwaariye Rebeka.

⁹Vanonto Abimeleki aamwiitthana Isaki, anamweerela: “Vekhaikhai ola mwaariyo, heeni okeerenlaawo weera ola murokoraka?” Isaki aamweerela: “Kuupuwela weera nkiiviwe niwoko na yoowo.”

¹⁰Abimeleki aaheera: “Eheeni yeela onipankaawo? Mukina a muloko ola aangwera okonano mwaariyo, ni weyotho waankhala ni nthowa wa yoonanareene yeeyo.”

¹¹Vano Abimeleki aalamulela mulokwaawe wootheene: “Akhalaru mutthu aaneera amutave mulopwana ola naari mwaariye, vekhaikhai anaakhwe.”

¹²Isaki, mweelapweene yeele, aahaala mmatta ni aahepha eyaakheene yeele miringosene ncira sa seiyo aanlaawe, niwoko Yave aamureeliha.

¹³Vanonto, owo aathadyireya ni weera waandyeerereyaka, mpakatho anakhala thadyirixa.

¹⁴Aakhalano mihuwo sincipale ni arumeiyi ancipale, moota wooweera aFilisti yannamukhalela nrima.

¹⁵Awosa yaahuuheela ihime esarihaka etthaya. Saari ihimesene seiye saathimpwe ni arumeiyi a Abrahaamu, atithawe Isaki, mweehuhuni ya Abrahaamu.

¹⁶Vanonto Abimeleki aamweerela Isaki: “Othaame elapwaahu, niwoko weyo woothatuwa oolipaxa oniphwaha hiyo.”

¹⁷Tivawo Isaki aathaammaawewo, anamaka vareyareyani na oGerari ni iwe aahiitekiha.

¹⁸Isaki aahuuhulatho ihime saathimpwe mweehuhuni ya atithawe Abrahaamu, mwa seiyo aFilisti yuuheelenlaaya vahoolo wa okhwa wa Abrahaamu. Aahokoloxera masina wa khula ehime nsinanaya naarinaaya mweehuhuni ya Abrahaamu.

¹⁹Vano arumeiyi a Isaki ethipaka ehime vareyareyani, yaamuttemula naattuuttu a maahi.

²⁰Akukhuli a oGerari yaapacera onyakulihana ni akukhuli a Isaki, yeeraka: “Maahi ala ti awihu.” Tivawo Isaki aattenghaawe ehime ele Eseki, niwoko waakhumelela onyakulihana mwaha wa ehimeene yeele.

²¹Yaathipatho ehime ekina, onakhumelelatho onyakulihana mwaha wa yeeyo, tivawo aattenghaawe Sitina.

²²Isaki aathaama iwe, anathipa ehime ekina ni khayaanyakulihanne mwaha wa yeeyo, tivawo aattenghaawe Rehoboti, eeraka: “Vano Yave oonunnuwihera nipuro weera naandyeereraneke mulaponi.”

²³Vahoolowaya Isaki aarowa oBerxeba.

²⁴Ohiyuweene yoole Yave aahiixoonihera wa yoole, anamweerela: “Miyo ti Muluku a atithinyu Abrahaamu. Muhoove, niwoko Miyo kiri ni nyuwo. Nkooreeliheni, ni nkaandyeerere ekhapiraanyu niwoko na omusivela murumeiyaaka Abrahaamu.”

²⁵Vano aahaatekawo altaari*, aniitthana Nsina na Yave, anakunga eheemaawe ni arumeiyi a Isaki yaathipawo ehime.

²⁶Nihuku nimoha, Abimeleki aavenya oGerari, vamoha ni namalakaawe Ahuza, nitho ni Fikoli, mutokweene a anakhottwaawe, weera uulume ni Isaki.

²⁷Isaki aamukoha: “Nyuwo muhikitthunaka, mpaka mookoomola elapwaanyu, vano heeni mungwaanyu wuuluma ni miyo?”

²⁸Awosa yaamwaakhula: “Hiyo nohoona weera Yave ori ni nyuwo ni nohuupuwela weera fataari wiiraana ni nyuwo. Nintthuna weera okhale wiiraana variyariwahu.

²⁹Onuukhale ha: Weera muhinipakele etthu yoonanara, ntoko hiyo nihoopakenlaahuni, mene noopakelani yooreera paahi, ni naahoohiyani murowaka mmuretteleni. Noosuwela weera Yave ohooreelihani.”

³⁰Isaki aahaarehererela efesta, enaca, enawura.

³¹Vanonto oyaaka ni oxa yaalipela mukina ni mukhwaawe. Vahoolowaya yaalaxerana, enapwaha mmuretteleni.

³²Nihuku nenenenne yaahoorwa arumeiyi a Isaki, ni yaamuthalihera mwaha wa ehime yaathimpaaya emweerelaka: “Noottemula maahi!”

³³Isaki aatteha ehime ele Xiba. Tivawo mpaka olelo esidade ele eneeriwaaya Berxeba.

³⁴Esawu areeneno iyaakha miloko mixexe, aamuthela Yudite, mwaana muthiyana a muHiti Beeri, ni Basemati mwaana muthiyana a muHiti Eloni.

³⁵Asithiyana ale yaamutannyera itthu soopwexiha muru Isaki ni Rebeka.