Read Makhuwa-Shirima Epacerero 28 Bible Online

Epacerero 28 - Makhuwa-Shirima bible

Epacerero 28

¹Isaki aarumiha wiitthaniwa Yakobe, anamureeliha, anamuleela: “Ohimuthele muKanaani.

²Oroweke oPadan Aram, owannyawe Betuweli, apwiyaawo, ni wamuthanlewo mwaarawo variyari wa anamwane asithiyana a atatawo Labani.

³Muluku a ikuru sootheene ooreelihe ni oovahe ekhapira yoowaatta, moota wooweera mwa weyo siphattuwe miloko sincipale.

⁴Ekhale ni weyo ni ekhapiraawo mareeliho aareelihiwaaweno Abrahaamu, weera weyo olamule elapo yeela onkhalaawo ntoko namarwa, aani elapweene yeela Muluku aamvanghaawe Abrahaamu.”

⁵Isaki aamulaxera Yakobe anarowa oPadan Aram, vaate wa Labani aari mwaana a Betuweli ngwArami, acimweenaawe Rebeka, amayawe Yakobe ni Esawu.

⁶Esawu aahiiwa weera Isaki aamureeliha Yakobe ni aamurumiha orowa oPadan Aram weera amuthele muthiyana a wuuwu, nitho weera amureelihaka, aamulamulela eeraka: “Ohimuthele muKanaani.”

⁷Aasuwelatho weera Yakobe aawiiwelela atithawe ni amayawe, anarowa oPadan Aram.

⁸Vano Esawu aasuwela weera Isaki khaatthuna anamwane asithiyana a oKanaani.

⁹Esawu aarowa wa Iximayeli ni, waahiya toko axaariye akina, aamuthelatho Mahalati, munneiye Nebayothi ni mwaana a Iximayeli, mwaana a Abrahaamu.

¹⁰Yakobe aavenya oBerxeba arowaka oHarani.

¹¹Aaphiya vanipuroni nimoha ni wiilaka, aaheemela weera akone. Aakuxa nluku nimoha na nipuro nenenenne, anaphiteera waamuruwawe, anakona.

¹²Vano moolohani aahoona makweelelo yeemexiweene vathi, ni osulu wa makweelelo waatava erimu. Vanonto andyelo a Muluku yeera ekhuruwaka, akina ewelaka vamakweeleloweene yaale.

¹³Yave aari mukhwipimwaya, aneera: “Miyo ti Yave, Muluku a Abrahaamu apwiyaanyu ni Muluku a atithinyu Isaki. Elapweene yeela mukonnaanyu kinikoovaheeni, vamoha ni ekhapiraanyu yootheene.

¹⁴Ekhapiraanyu eniikhale ntoko ntthupi na etthaya ni eniimake okhuma ninkhuma nsuwa mpaka ninkela nsuwa, nitho oottuttuwani mpaka ohitto wa elapo, ni mwa miloko sootheene sa mulaponi nsireelihiwe niwoko na nyuwo ni ekhapiraanyu.

¹⁵Vano Miyo kiri ni nyuwo, ni nkookosoopeni mpaka weiwo muneeraanyu murowe, ni nkoohokoloxereni elapweene yeela, niwoko nkirwa koohiyaani mpaka eneeraaya epakeye yeeyo koororomelinghaakani.”

¹⁶Yakobe avenyakaru, aaheera: “Woohihovela, Yave ori nipuro nenenenna ni miyo nkaasuwenle.”

¹⁷Vano oovaka aapwaherera: “Nipuro heeni noowoopiha ntoko nna! Nna khanihiyono nipuro nikina ehikhanle Empa ya Muluku. Ola ti mulako wa wiirimu.”

¹⁸Waaxiiye oxeexelo Yakobe aakuxa nluku aaphiteenraawe waamuru, aaheemexa ntoko nrimbu, anamiinela makhura vasuluwaya.

¹⁹Aatteha nipuro nenenenne Beteli yaari mweeraru esidade ele khalayeene yiitthaniwa Luzi.

²⁰Vano Yakobe aalipela muneenaawe eeraka: “Muluku akhala ni miyo, akikosoopa ni mukwaheene yoola kimpakaaka, akivaha epaawu weera kice ni soowara weera kiwareke

²¹ni akihokoloxera oocekendeyeene vaate wa atithaka, vano Yave anaakhale Mulukwaaka.

²²Nluku nna keemenxaaka olelo ntoko nrimbu nnikhale Empa ya Muluku, ni sootheene muneeraanyu mukivahe, miyo kinimoovahanitho yanaamuloko.”