Read Makhuwa-Shirima Epacerero 31 Bible Online

Epacerero 31 - Makhuwa-Shirima bible

Epacerero 31

¹Wa soothesene, Yakobe aahiiwa yuulummwaka weera anamwane a Labani yeera: “Yakobe ookuxa sootheene seiye yaarinaaya atithihu anathukumanyiha mihakhu seera sikhaleke sa atithihu.”

²Yakobe aapacera woona weera mweettelo wa Labani waamvirikaneela.

³Yave aamweerela Yakobe: “Muhokoleele elapo ya anatithinyu ni wa amusaanyu, ni Miyo nkikhale ni nyuwo.”

⁴Yakobe aarumiha wiitthaniwa Rakheli ni Leya weera erowe ntuphini saaraayamo mihuwosawe.

⁵Vano aaweerela: “Kinoona weera mweettelo wa atithinyu wa miyo khoohiyono yoole wa khalayi. Muluku a atithaka ori ni miyo.

⁶Vano nyuwo moosuwela nnenesene weera kohaavarela muteko atithinyu moota kaaweraaka.

⁷Mene awo yaakipaka nsikini eceendyaka nlivonaka imaara muloko. Wa soothesene, Muluku khaatthunihenre weera ekihasule.

⁸Awo yeeraaya: ‘Mihuwo sa malepa nikhaleke nlivonawo,’ vano saayariwa paahi samalepa, vaheera yeeraayatho: ‘Vano paahi sooriipa ti nlivonawo’; saayariwa paahi sooriipa.

⁹Ti hiiho Muluku owaankhaawe muhuwo atithinyu akivahaka miyo.

¹⁰Nihuku nimoha, ehuhu saawelanaaya, kaaloha weera anapunci ootheene yaawenle ithiyana yaari ooriipa, a mitthaalala ni a malepa.

¹¹Vano ndyelo a Yave aakiitthana moolohani: ‘Yakobe!’ Miyo kaamwaakhula: ‘Miyo kiri va!’

¹²Owo aakeerela: ‘Moone, anapunci ootheene angwelana ni ithiyana ari ooriipa, a mitthaalala ni a malepa, niwoko kohoona sootheene Labani oopankaaweni.

¹³Miyo ti Muluku a oBeteli, mwa weiwo nyuwo mwaamiinenlaanyu makhura vanlukuni ni mwalipenlaanyuwo. Tivawo, mvenye elapweene yeela, muhokoleele elapo muyareliwaanyu.’”

¹⁴Rakheli ni Leya yaamwaakhula: “Weeraka nookhalano nlelo mpatta wa yoohiyeriwa vaate wa atithihu?

¹⁵Vano awo annoona ntoko anamarwa. Yeenre enithumihaka, aananariha musurukhu yaaphwannyaaya mwa hiyo.

¹⁶Vekhaikhai, mihakhu sootheene Muluku owaakhiyaawe atithihu ti sawihu vamoha ni anamwanaahutho. Vanonto, mpakeke sootheene Muluku oolamulenlaaweni.”

¹⁷Yakobe aahaakhavihera anamwanaawe ni axaariye owela ikamelu*.

¹⁸Attimulihaka muhuwaawe wootheene ni sootheene ole aaphwannyaawe ehuhu aaraawe oPadan Aram, aarowa oKanaani weera akhale vaate wa atithawe Isaki.

¹⁹Labani arongweene omettha muhuwaawe, Rakheli aawiiyera icaambulo sa miluku soolokottha sa nihimonawe.

²⁰Ti hiiho Yakobe aamulokontthaawe Labani ngwArami, atthawaka vaatewawe ahimuleelaka etthu.

²¹Yakobe aathawa ni sootheene owo aarinaawe. Alapuwaka mooloko Efratesi, aarowa mpatta wa nyaako sa oGiliyade.

²²Eviraleene mahuku mararu, Labani aaleeliwa weera Yakobe ootthawa.

²³Labani aahaakuxa asilopwana a emusaawe, anamutthimakela Yakobe wa mahuku mathannameeli, anamphwanya onyaakoni sa oGiliyade.

²⁴Muluku aahiixoonihera wa Labani ngwArami moolohani, mweehuhuni ya ohiyu, anamoopopiha, eeraka: “Mwiipasoope weera muhimweere etthu Yakobe. Muhimuroromelihe etthu naari muhimoopopihe.”

²⁵Labani aamphwanya Yakobe aakonenlaawewo vanyaakoni sa oGiliyade. Vano Labani vamoha ni amusaawe aakonenle vaavaale.

²⁶Labani aamukoha Yakobe: “Opanke eheeni? Khookitthangwe paahi, mene wohaakuxatho anamwanaaka ntoko oovariwa ni ekhotto.

²⁷Okilokotthenleni otthawaka ni mwiitiho ohikileelaka? Kaasuwenle, saano kipakihaleene efesta yooraxelana ni wiipa, ikoma ni amakita.

²⁸Khookitthunihenre waabeeca anamwanaaka asilopwana ni asithiyana hata axisuluwaaka weera kaaraxele. Woheetta ololo!

²⁹Ikuru saakhala mmatatanimwaka weera koohasule, mene ohiyu ovirale Muluku a atithawo ohuuluma ni miyo akoopopihaka: ‘Mwiipasoope weera muhimweere Yakobe etthu. Muhimuroromelihe etthu naari muhimoopopihe.’

³⁰Vanonto, weyo ottimulenle niwoko noowunkhela vaate wa atithawo, vano wiiyenreni milukusaka?”

³¹Yakobe aamwaakhula: “Miyo kaamoova wooleelani, niwoko kuupuwela weera nyuwo mwaankaakha ni ikuru anamwaniinyu.

³²Vanonto mwaha wa milukusanyu, akhala mukina va muneeraanyu mumphwanyeno, iiviweke. Vamaithoni wa amusaahu ootheene, muwehaweheke muneenaanyu yaareene vaava ni miyo yakhalaru etthu eri yawinyu. Yakhala, muhokolowekeno.” Yakobe khaasuwenle weera ti Rakheli iiyale.

³³Labani aavolowa muheemani mwa Yakobe, mwa Leya, ni mwa arumeiyaawe eeli asithiyana woohiphwanya etthu. Vahoolowaya avolowa muheemani ya Rakheli.

³⁴Rakheli iiyaathiye miluku iye mmaahotthani yaari vasulu wa ekamelu*, anakilaathela. Labani aatholathola muheemani moothemwene, mene khaaphwannye etthu.

³⁵Rakheli aaweerela atithawe: “Muhikinyoonyeriwe apwiyaaka kiheemenlaaka vamaithoniwanyu, niwoko kirookhalano mpingu wa athiyana.” Ni hiiho Labani aapwaherera waasaasa icaambulo sa milukusawe, mene khaaphwannye.

³⁶Yakobe aanyoonyiwa, anamurukunuwela Labani, anamukoha: “Yoonanara heeni koopakenlaakani? Yoottheka heeni koopakenlaakani nyuwo munkittharattharaanyu hiiha?

³⁷Mootholathola itthusaka sootheene. Moophwanya eri yawinyu? Mwaphwanya, mwiikaathi sootheene ohoolo wa amusaahu, weera awosa enithorihe hiyo eelaahu.

³⁸Iyaakha miloko miili kiri ni nyuwo. Ikhondoolosanyu ni ipurisanyu ithiyana khasinatoko orihakasa iyaasisaya, hata nkinakhuure naari enamaanyu emoha ya muhuwaanyu.

³⁹Nkinooruuheleni mwaamunama oowiiviwa ni axinama ooluwa; miyo muneenaaka kannavilela ohaawa wootheene. Ni nyuwo mwannakivekela nlivo na axinama oowiiyiwa, othana naari ohiyu.

⁴⁰Vano othana, kaahaawa oviha, ohiyu, oriira; imaara sincipale ohiyu nkaakona.

⁴¹Ti hiiho kikhanlaaka owannyinyu iyaakha miloko miili. Kohoovarelani muteko iyaakha muloko niixexe naakakhanyihaka ni anamwaniinyu eeli asithiyana ni iyaakha ithannamosa ni muhuwaanyu. Imaara muloko mwaaceendya nlivonaka.

⁴²Ahaakhanle Muluku a apwiyaaka, Abrahaamu ni woopiha wa atithaka Isaki, vekhaikhai nyuwo mwaankihiya matataru. Vano Muluku aahoona ohaawawaka mutekwaaka woovihaxa, ni ohiyu ovinre Owo ohoonihera olakelawawe.”

⁴³Labani aamwaakhula Yakobe: “Axaarawo ti anamwanaaka, osuulu ti wawaka, mihuwo ti sawaka, sootheene iya va onoonaawo ti sawaka. Vano nkeere hai ni anamwanaaka, ni axisulwaaka?

⁴⁴Tivawo, hiyo ooweeli nrowe niiraane weera okhale onamoona variyariwahu.”

⁴⁵Yakobe aakuxa nluku aneemexa ntoko nrimbu.

⁴⁶Owo aaweerela amusaawe: “Muukele maluku makina,” ni awo yaapaka hiiho. Yaattottela maluku nduu. Vahoolowaya yaahooca vaavaale muxerexere wa maluku ale.

⁴⁷Labani aatteha nipuro nne oYegari Sahaduta, vaheera Yakobe aatteha oGalehedi.

⁴⁸Vano Labani aaheera: “Maluku ala nuukenlaahu olelo ti onamoona variyariwahu.” Tivawo nitteehiwaaya oGalehedi.

⁴⁹Noottehiwatho oMizepa, niwoko aaheera: “Weera Yave aniwehawehe hiyo ooweeli, nimmwalamwala mukina ni mukhwaawe.

⁵⁰Waahasula anamwanaaka, hoye hoye waahaapwattha waathelaka athiyana akina, hata ohooniwaka, osuweleke weera Muluku onookhala Namoona variyariwahu”

⁵¹Nlelotho Labani aamweerela Yakobe: “Va aakhala maluku ala ni nrimbu nna keemenxaaka variyariwahu.

⁵²Maluku ala ari anamoona weera miyo kihilapuwele iwo weera koohooxe hata weyo ohilapuwele nno weera okihooxe.

⁵³Muluku a Abrahaamu ni a Nahori, Muluku a asitithaya akhale Mphukaahu.” Yakobe aalipela mwa nsina na woopiha wa atithawe Isaki.

⁵⁴Vano Yakobe aapaka yooveleela vamwaakoni, anaalattula amusaawe yaari vaavaale weera eceno. Vano ecaakaru, yaakonelawo.

⁵⁵Oxaawaya, Labani aavenya, anaabeeca axisulwaawe ni anamwanaawe, anaareeliha ni vahoolowaya aahokoleela elapwaawe.