Read Makhuwa-Shirima Epacerero 33 Bible Online

Epacerero 33 - Makhuwa-Shirima bible

Epacerero 33

¹Yakobe oonaka weera Esawu aneera akhuveelaka ni asilopwana macira maxexe, aahaakawanyiha asinamwane a Leya, Rakheli ni arumeiyi eeli asithiyana.

²Aawiikaathi arumeiyi ni anamwanaaya ohoolo, Leya ni anamwanaawe, vahoolowaya, ni Rakheli ni Yoseefe woomalihera.

³Owo muneenaawe aarowa ohoolo ni, awaattamelaka amunnawaawe, aahaakokhorela imaara ithannapiili.

⁴Esawu aamutthimakela Yakobe, anamukhubaara muxikomwawe, anambeeca. Vano awosa yaahiinla.

⁵Esawu aahula maithwaawe, anawoona asithiyana ni asinamwane, anamukoha: “Alesa taani?” Yakobe aawaakhula: “Alesa ti anamwane Muluku omvanghaawe murumeiyaanyu.”

⁶Arumeiyi asithiyana ni anamwanaaya yaamukhuveela enamukokhorela.

⁷Vahoolowaya Leya ni anamwanaawe yaahoorwa, enamukokhorela. Wookisera, aaphiya Yoseefe ni Rakheli, enamukokhorelatho.

⁸Esawu amukoha: “Entaphulela eheeni muhuwo wootheene ole kiphwannyaaka mphironi?” Yakobe aamwaakhula: “Weera kaakheleliwe nnenesene ni nyuwo, apwiya.”

⁹Wa soothesene, Esawu aaheera: “Munnaka miyo kookhalano mwincipale. Wiithokororele yeeyo eri yawawo.”

¹⁰Mene Yakobe aanyeserera: “Hoye! Mwatthuna okoonihera murima wooreera, mwaakhelele yoovahaaka. Vano, woona ekhovaanyu onlikana ntoko woona ekhove ya Muluku ni, ohiya toko yeeyo, nyuwo mookaakhela nnenesene.

¹¹Mwaakhelele yoovaha muruuheliwaanyu. Muluku ookiruweriha mpaka miyo kookhalano, sootheene kintthunaaka.” Yakobe aamunyeserera mpaka Esawu aahaakhelela.

¹²Esawu aaheera: “Nrowe nipwaheke ni miyo kinimoohoola.

¹³Wa soothesene, Yakobe aamweerela: “Apwiyaaka moosuwela weera asinamwane ala aakhulumuwa ni ontthuneya wuupuwelela ikhondoolo ni imombe singwaamwiha axaanaaya. Nanyeserihaxa weetta hata nikhalaka nihuku nimoha paahi, onookikhwela muhuwaaka wootheene.

¹⁴Tivawo, apwiyaaka, muroweke ohoolo wa murumeiyaanyu ni miyo kinimoottharani ottuli, keettaka vakhaani vakhaani vamoha ni muhuwaaka nitho anamwane mpaka kineeraaka kiphiye wa apwiyaaka oSeyiri.”

¹⁵Esawu aaheera: “Vanonto, okitthunihere woohiyera asilopwana akina.” Yakobe aamukoha: “Aheeni apwiyaaka? Waakheleliwawaka nnenesene, wookikwana.”

¹⁶Nihuku nenenenne, Esawu aahokoleela oSeyiri.

¹⁷Wa soothesene, Yakobe aarowa oSukota, weiwo aatenkaawe empaawe ni nikhoola na muhuwaawe. Tivawo, nipuro nne nniitthaniwaaya Sukota.

¹⁸Ahokolowaka oPadan-Arami, Yakobe aaphiya oowoopoweene oXekhemi oKanaani ni aakonenle vakhiviru wa esidade.

¹⁹Aathuma mpatta wa ematta weiwo aakungaawe iheemasawe ni makhoobiri ncira a eparatha*, aathumiheriwe ni anamwane a Hamori, atithawe Xekhemi.

²⁰Vano vaavaale aahaateka altaari* ni aahaatteha Eli Elohe* Yixrayeli.