Read Makhuwa-Shirima Epacerero 41 Bible Online

Epacerero 41 - Makhuwa-Shirima bible

Epacerero 41

¹Siviraleene iyaakha piili, Farawu* aaloha. Owo eera eemenleene mukerekhere wa mooloko Nilu.

²Vano saakhuma mmwe imombe ithiyana ithannapiili sooreeraxa ni sooneneva, sinapacera oca mutiilini.

³Vahoolowaya saakhumatho imombe ithiyana sikina ithannapiili soonanara ni soowoonda, sinarowa saaraayawo soopacera mukerekhere Nilu.

⁴Imombe ithiyana soowoonda ni soonanara saakhuura imombe ithiyana ithannapiili sooreera ni sooneneva. Vano vahoolowaya Farawu* aavenya mookonanimwawe.

⁵Aahokoleelatho okona, analoha moota mukina. Yaari makala mathannameeli a etrigu oowiitthwaxa ni ooreera muntathini mmoha.

⁶Woottharelana yaathapuruwa makala makina mathannameeli oopheepuwa ni oowuuma niwoko na epheyo engweela ninkhuma nsuwa.

⁷Makala makina mathannameeli oopheepuwa yaamira makala mathannameeli makina yaari oowiitthwaxa ni ooreera. Mwa yeeyo Farawu* aavenya, anoona weera waari oloha.

⁸Oxaawaya aari oohitteene, analamulela wiitthaniwa anamatthoma ni asuweli ootheene a wExipitu weera etaphulele soolohasawe, mene khaawo aawenre.

⁹Mutokweene a anamarumeela a soowura aamweerela Farawu*: “Vekhaikhai olelo kinuupuwelelaaka ohiyanyihawaka.

¹⁰Ekwaha emoha Farawu* aanyoonyeringwaawe arumeiyaawe eeli, aalamulela okitthuka vamoha ni mutokweene a anamooxa ipaawu vaate wa mutokweene a anamalipelela.

¹¹Ohiyu mmoha, hiyo ooweeli naakhalano yooloha ni khula yooloha yaakhalano etaphulelowaaya.

¹²Vano, aakhalawo vamoha ni hiyo mmiravo mmoha muHeberi aari murumeiyi a mutokweene a anamalipelela a Farawu*. Naamuthalihera soolohasahu, ni owo aanitaphulela anithaliheraka ooweeli hiyo etaphulelo ya khula yooloha.

¹³Sootheene saaheereya mooteene yoowo aanitaphulenlaawe: Farawu* ookihokoloxera mutekwaaka, vaheera mukina ootthukeleliwa. ”

¹⁴Farawu* aalamulela wiitthaniwa Yoseefe, aaruuhiwe woowaakuveya okaliposo. Ametthiwakaru, aaceendya yoowara, aniixoonihera wa Farawu*.

¹⁵Farawu* aamweerela Yoseefe: “Miyo kooloha, mene khaawo owenre okitaphulela. Miyo kohiiwa yeeriwaka wiiwa yakhalaru yooloha onoowera otaphulela.”

¹⁶Yoseefe aamwaakhula: “Iwo khoohiyono owerawaka. Ti Muluku anaavahe aFarawu* yoowaakhula yooreerela.”

¹⁷Vanonto Farawu* aamuthalihera Yoseefe yoolohaawe: “Miyo kilonghe keemenleene mukerekhere mooloko Nilu,

¹⁸sikhumakaru mmoolokoni imombe ithiyana ithannapiili sooneneva ni sooreera saapacera oca mutiilini.

¹⁹Vahoolowaya saakhuma sikina ithannapiili samarewe, soowoonda ni soonanara, moota miyo kihitonkwaaka woona wExipitu wootheene nno.

²⁰Imombe soowoonda ni soonanara ithannapiili saakhuura iye ithannapiili sooneneva saapacenre okhuma.

²¹Naari saarookhuuraru, kasaasuwanyeya weera sookhuura, niwoko sannapwaherera woonda ntoko seerenlaaya woopacera. Vahoolowaya kaavenya.

²²Kaalohatho moota mukina. Kaahoona makala mathannameeli a etrigu yoowiitthwaxa ni yooreera muntathini mmoha.

²³Woottharelana yaathapuruwatho makala makina mathannameeli oonyaala, oopheepuwa ni oowuumeene niwoko na epheyo engweela ninkhuma nsuwa.

²⁴Makala mathannaneeli makina oopheepuwa yaamira makina ale ooreera. Kohaathalihera yeeyo anamatthoma, mene khaawo aawenre otaphulela.”

²⁵Yoseefe aamweerela Farawu*: “Sooloha soopiili sa Farawu* vekahaikhai sintaphulela etthu emoharu paahi. Ti Muluku ontthuna owoonihera aFarawu* yeeyo Owo aneeraawe apake.

²⁶Imombe ithannapiili sooreera sintaphulela iyaakha ithannapiili, ni makala mathannameeli ooreera antaphulelatho iyaakha ithannapiili. Ti yooloha emohamoharu yeeyo paahi.

²⁷Imombe ithannapiili soowoonda ni soonanara, saakhumme vahoolowaya sinoolikanatho iyaakha ithannapiili, hiiho ntoko makala mathannameeli oopheepuwa yuumihiwe ni epheyo engweela ninkhuma nsuwa. Iyo siri iyaakha ithannapiili sa etala sineera siweeke.

²⁸Ti yeeyoweene ntoko kooleenlaakani aFarawu: Muluku oowoonihera aFarawu* yeeyo aneeraawe apake.

²⁹Sinimoowa iyaakha ithannapiili sa oruwera otokotoko wExipitu wootheene.

³⁰Vahoolowaya nsiwe iyaakha ithannapiili sa etala. Vano ehuhu yootheene yooruwera eniittiwaliwe hapo etala eniihele mathala elapo yootheene.

³¹Etala eniirwe eniikhale etokotoko moota wooweera iyaakha sooruweriwa sivinre khasirwa suupuweleliwa.

³²aFarawu* yaaloha imaara piili, niwoko Muluku oolakela okwanihera yeeyo ni eniyereye woowaakuveya.

³³Tivawo, mmwaase nyuwo aFarawu* mulopwana mmoha a miruku ni oosuwela weera eettihe itthu sootheene sineera sikhumelele mweelaponi ya wExipitu.

³⁴Ontthuneya waakhalihatho ahooleli mweelaponi yootheene weera elamuleke nnenesene ni ethokorore mpatta wanaathanu wa yoohepha ya wExipitu mpuwa mwa iyaakha ithannapiili sooruweriwa.

³⁵Awo ethukumanyihe sooca iyo sa iyaakha sooruweriwa sinrwa. Ethokororeketho etrigu musidadeni sootheene weera sikhale sooca sa muhoolo. Sootheene iyo silamuleliweke ni aFarawu*.

³⁶Yeeyo eneera ethokororiweke ekhale yoowiisungera wa iyaakha ithannapiili sa etala eneera eweeke wExipitu. Hiiho etala kheewa ephwata elapo.”

³⁷Yoovaanela ya Yoseefe yaamusiveliha Farawu* nitho anamalakaawe.

³⁸Farawu* aahaakoha anamalakaawe: “Weeraka nnoomphwanya mukina ntoko mulopwana ola ookhalano Munepa wa oMuluku?”

³⁹Vano aamweerela Yoseefe: “Eenre Muluku awooniheraka itthu sootheene iya, khawowo mukina a miruku ni oosuwela ntoko weyo.

⁴⁰Okhaleke mutokweene oolamula vaatewaka ni mulokwaaka wootheene wiiweleleke malamulowaawo. Miyo paahi nkikhale mutokweene oowoopwaha weyo, niwoko ti mwene.”

⁴¹Farawu* aapwaherera: “Vanonto kingwinnyerera weyo ohoolela elapo yootheene ya wExipitu.”

⁴²Ahimakaru yeeyo, Farawu* aamurula munelaawe oottittano aangwanraawe vakathani, anangwariha Yoseefe, anangwarihatho soowara sooreeraxa ni aangwariha muxikomwawe onyooro wa eyuuma yoorikaxa.

⁴³Vahoolowaya, aangweliha mukaaroni yanaaveeli ya omwene, ni atthu yannakhuwela vahoolowawe: “Muhule ephiro!” Hiiho Yoseefe aavahereriwa ohoolela elapo yootheene ya wExipitu.

⁴⁴Farawu* aamweerelatho Yoseefe: “Miyo ti Farawu*, mene weyo waahilamulela etthu, khaawo aneera apakeke yakhalaru etthu wExipitu nno.”

⁴⁵Farawu* aamutteha Zafenati-Paneya, anamvaha Asenati, mwaana muthiyana a Potifari, musaserdoti* a wOni, weera amutheleke. Vahoolowaya, Yoseefe aapacera weetteetta elapo yootheene ya wExipitu.

⁴⁶Yoseefe aarino iyaakha miloko miraru sa oyariwawawe aapacenraawe omurumeela Farawu*, mwene a wExipitu. Vahoolowaya, aamulaxera Farawu*, anapacera weetteetta elapo ya wExipitu yootheene.

⁴⁷Mweehuhuni ya iyaakha itthannapiili sa oruweriwa, elapo ya wExipitu yaaruwera soohepa soowaattaxa.

⁴⁸Hiihaawo owo aalamulela othukumanyiwa sooca saathokororiwe mweehuhuni ya iyaakha ithannapiili sooruweriwa wExipitu, analamulelatho othokororiwa musidade etrigu yaahanle mmamattani wa khula muttetthe.

⁴⁹Hiiho Yoseefe aawera othokorora etrigu yoowaattaxa, ntoko muhaava wa mphareiyani. Aathokorora etrigu yoowaattaxa moota wooweera Yoseefe aahiya ophima niwoko khaawo yeera ewere waalikela.

⁵⁰Nlelo sihinaaye ophiyera iyaakha sa etala, Asenati, mwaana muthiyana a Potifari, musaserdoti* a wOni, aamuyarela Yoseefe anamwane asilopwana eeli.

⁵¹Wa antthaara, Yoseefe aamutteha Manaxe, eeraka: “Muluku ookittiwaliha ohaawawaka wootheene, ni vaate wa atithaka wootheene.”

⁵²Wa mwaana anaaveeli, aamutteha Efrayimi, eeraka: “Muluku ookiweriha oyara mweelaponi kihaawiyaaka.”

⁵³Hiiho waaphiya ommaleloni wa iyaakha iye sooruweriwa wExipitu.

⁵⁴Vanonto saapacera iyaakha ithannapiili sa etala mooteene yoole Yoseefe aahimmaawe. Mweelaponi sootheene sikina yaakhala etala etokotoko, vaheera wExipitu yaakhalawo yooca.

⁵⁵wExipitu wootheene opacerakaru ohaaweya mwaha wa etala, muloko ole waapacera omukhuwelela Farawu* mwaha wa yooca. Owo aahaakhula ha: “Murowe wa Yoseefe ni mwapakeke yeeyo owo aneeraawe oolamulelekeni.”

⁵⁶Vanonto yaakwanenlaaya etala mweelaponi yootheene ya wExipitu, Yoseefe aalamulela ohuleliwa impa sootheene yaathokororiwe etrigu, anapacera waathumihera atthu a wExipitu.

⁵⁷Vano atthu a ilapo sootheene yannarowa wa Yoseefe weera ethume etrigu wExipitu, niwoko etaleene yeele yaatepaxa waatta mweelaponi yootheene.