Read Makhuwa-Shirima Epacerero 42 Bible Online

Epacerero 42 - Makhuwa-Shirima bible

Epacerero 42

¹Yakobe, oonaka weera yaakhala yooca wExipitu, aaweerela anamwanaawe: “Heeni muraanyu xiixee ngwehanaka mukina ni mukhwaawe?”

²Aaheeratho: “Kohiiwa weera yookhala etrigu wExipitu. Murowewo weera mwathume etrigu weera nihikhwe etala.”

³Hiiho axuneiye Yoseefe yaarowa wExipitu weera yathume etrigu.

⁴Yakobe khaamuhiyale Benyamini, munneiye Yoseefe, arowaka ni yaawo, oovaka weera eniimukhumelele etthu yoonanara.

⁵Anamwane a Yixrayeli yaarowa othuma etrigu yaatakansana vamoha ni akina yaarowelatho etthweene yeeyo, niwoko etala yaakwanela elapo yootheene ya oKanaani.

⁶Yoseefe aari ti yoowo aahoolela elapo yootheene ya wExipitu nitho aari ti yoowo aathumihera etrigu miloko sootheene sa mweelaponi. Tivawo, ephiyakaru axunneiye Yoseefe, yaamukokhorenlaaya ohoolowawe.

⁷Awoonaka axunneiye, Yoseefe aahaasuwela, mene iixeera weera khaasuwenle ni aawuulumela ni owali: “Mungweela woowi nyuwosa?” Awo yaamwaakhula: “Ningweela oKanaani weera nithume yooca.”

⁸Yoseefe aahaasuwela axunneiye, mene awosa khayaamusuwenle.

⁹Yoseefe aahuupuwelela soolohasawe mwaha wa yaale, aneera: “Nyuwosa anamahottela! Murweenle woona mipatta heeni sa elapo ela sihikhapeleleiyaayawo!”

¹⁰Awosa yaamweerela: “Hata vakhaani apwiya! Arumeiyaanyu ala arweenle paahi othuma yooca.

¹¹Ootheene hiyo ti anamwane a tiithi mmoharu. Arumeiyaanyu ti atthu oororomeleya, khaahiyono anamahottela!”

¹²Yoseefe aanyesera: “Hoye! Nyuwo murweenle paahi woona mipatta heeni sa elapo sihikhapeleleiyaayawo.”

¹³Awo yaanyesereratho: “Arumeiyaanyu yaari axunna muloko neeli, ootheene anamwane a tiithi mmoharu onkhala elapo ya oKanaani. Vano neetthaako ohanle owaani ni atiithi ni mukina ohookhwa.”

¹⁴Wa soothesene, Yoseefe aaheera: “Ti yeele miyo kooleenlaakani. Nyuwo anamahottela!

¹⁵Miyo kinoowootani murima. Kinlipela mwa okumi wa Farawu* weera khamurwa mvenyasa mweelaponimu ahinaaye orwa munninyu neetthaako.

¹⁶Mmoha a nyuwo arowe amukuxe munninyu neetthaako akinaawo engwehereraka okaliposo. Hiiho onookupaleya maswaanyu yaareene a ekhaikhai naari hoye. Vano yaahikhala ekhaikhai kinlipela mwa okumi wa Farawu* weera onimooneya weera nyuwosa anamahottela.”

¹⁷Yoseefe aahaawalela mukaliposo mwemmo mahuku mararu.

¹⁸Ommaleloni wa mahuku mararu ale Yoseefe aweerela: “Miyo kimmoova Muluku. Tivawo mwatthuna wuurela okumaanyu, mweereke ha:

¹⁹Nyuwosa mwaareene atthu oororomeleya, munghiye munninyu mmoha mukaliposo mu. Vanonto muhokoloweke, mukuxaleene etrigu weera mwiive etala mweemusinimwanyu.

²⁰Wa soothesene, mwakiruuhele nno munninyu neetthaako ekupaleeleye maswaanyu ni muhikhwe.” Vano ale yaahiireherera weera epake yeeyo.

²¹Yaaheerelana: “Vekhaikhai ninttaruxeliwa yeeyo nimpankaahu munnihu, niwoko naamoona moota owo aakacamiheiyaawe aanidyoonttelelaawe mwa okumaawe, mene khanaamwiiwelenle. Tivawo aniweenlaaya makacamiho ala.”

²²Rubeni aaweerela: “Miyo kaahooleelani nnenesene weera muhimpakele etthu yoonanara mmiravo ole, mene khamwaakiiwelenle. Vanonto okhwawawe munnihu wooniphwanya.”

²³Vano ale khayaasuwela weera Yoseefe aamwiiwexexa yeele yuulumaaya, hapo yuuluma ni Yoseefe emvarelaka muteko namataphulela.

²⁴Yoseefe aavenya vaavaale, anapacera wiinla ni, amalihakaru wiinla, aahokololeela wuuluma ni yaawo. Aamuthanla Simeyoni, analamulela otthukiwa ni onyooro vamaithoniwaya.

²⁵Vano Yoseefe aalamulela weera esarihiwe etrigu musaakhonimwaya, ni ahokoloxeriwe khula mutthu musurukhwaawe. Aalamulelatho weera evahiwe booso a munkwahani, ni hiiho waahereya.

²⁶Awo yaatthukelela isaakho sa etrigu mwaabuurunimwaya, enapwaha.

²⁷Vanipuroni yeemenlaaya weera ekonele, mmoha a yaawo aataphula esaakhwaawe weera amvahe yooca buurwaawe, anoona musurukhu owanoni wa esaakho ele.

²⁸Aahaathalihera axunneiye: “Aakihokoloxera musurukhu! Mooneke musaakhonimwaka mu!” Awosa yaatuthuwa ni ethukumelasaka, yaaheerelana: “Eheeni yeela Muluku onipankaawe?”

²⁹Ephiyakaru vaate wa atithaya, Yakobe, elapo ya oKanaani, yaahaathalihera sootheene seiye saakhumelenle, yeeraka:

³⁰“Mulopwana ole onghoolela elapo ele oonuulumela ni owali, mpaka oneerela hiyo anamahottela a elapo.

³¹Vano hiyo noomuroromeliha weera nri atthu oororomeleya ni khanihiyono anamahottela.

³²Noomuleelatho weera naari axunna muloko neeli, anamwane a tiithi mmoha, ni weera mmoha ohookhwa, ni neetthaako ohanle ni atiithi oKanaani.

³³Mulopwana onghoolela elapo ele ooneerela: ‘Nnoone nyuwosa mwaareene atthu oororomeleya: Mmoha a axunninyu ahaleke wenno ni miyo. Akinaawo eroweke ni ekuxeke yooca weera yiive etala mweemusinimwanyu.

³⁴Vahoolowaya mwakiruuhele munninyu neetthaako. Hiiho kinoosuwela weera khamuhiyono anamhottela, mene atthu oororomeleya. Vahoolowaya kinimoohokoloxerani munninyu ni munoowera ompaka nakoso mweelaponimu.’”

³⁵Woowiittha esaakho ya khula mutthu waakhalamo murupa woosareya musurukhu. Vano awosa ni atithaya yoonaka mirupa soosareya musurukhu, yaahoova.

³⁶Yakobe aaweerela: “Nyuwosa munoovira mukimaliheraka anamwanaaka. Yoseefe ohookhwa, Simeyoni khakhanle vaava, vano nlelo muntthuna okaakha Benyamini! Olatta wookikhuruwela.”

³⁷Rubeni aawaakhula atithawe: “Ngwiiveke anamwanaaka eeli miyo kaahimuhokoloxa Benyamini. Kinoomulipano ni miyo nkimuhokoloxe.”

³⁸Yakobe aamwaakhula: “Mwanaka kharowa vamoha ni nyuwo, niwoko amunnawaawe ahookhwa, ni ohanle yoola paahi. Yamukhumelela erisa munkwahani muneeraanyu mweette, nthowa nnikhale nawinyu weera namuuluvala ola akhwe moothananani.”