Read Makhuwa-Shirima Epacerero 43 Bible Online

Epacerero 43 - Makhuwa-Shirima bible

Epacerero 43

¹Etala yaawirima mulaponi.

²Emalihakaru etrigu anamwane a Yakobe yaaruuhalaaya wExipitu, atithaya yaaweerela: “Muhokoleeletho wExipitu weera mwathumetho yooca.”

³Yuda aawaakhula: “Mulopwana ole aanoopereraxa weera nihihokoleelewotho nihimukuxale munnihu ola.

⁴Mwanivaherera munnihu, nnirowe ni nnoothumeleni yooca.

⁵Mwaahinivaherera, khanirowa, niwoko mulopwana ole eenre ha: ‘Muhihokoleele kiraaka muhikiruuhenle neetthaako.”

⁶Yixrayeli aahaakoha: “Heeni munkithananihaanyu munleelaka mulopwana owo weera ookhalatho munna mukinatho?”

⁷Awo yaawaakhula: “Ti mulopwana owo aanikohakonghe sa emusaahu. Aanikoha: ‘Atithinyu nlelo akumi? Nyuwosa mookhalano munninyu mukina? Vano hiyo naakhunle paahi yeeyo owo aanikonghaawe. Naarowa osuwela hai weera ole aarowa oninyesereriha omukuxa munnihu?”

⁸Yuda aahaavekela atithawe, Yixrayeli: “Munghiye mmiravo arowe ni miyo. Hiiho nnipwahe woowaakuveya weera hiyo ootheene nikhale ni okumi, nihikhwaaka etala.

⁹Miyo kohiipereka muneenaaka, kinoomulipano mukiweheke miyo kineera kingwehawehe. Miyo kaahimuhokoloxa, ni kaahimwiikaathi nnenesene va, nkikhale ni nthowa ohoolowanyu mookuminimwaka wootheene.

¹⁰Ori woowooneyawene, nahaapinse, sano nirongweene ni nihokolongweene imaara piili.”

¹¹Atithaya, Yixrayeli, yaaweerela: “Hapo yoheereya hiiho, nneere ha: Muhele musaakhonimwanyu itthu soottittikala nraahuno mweelaponi ni mwamvahe mulopwaneene yoowo. Mukuxeke ebalsamu*, oravo, itthu sooreerela, emiira* ni mutteesa a epistasiyo* ni a emandoweira*.

¹²Mukuxeke musurukhu woopwaha yoowo muhokoloxeringwaanyu weera muhokoloxe yoowo waaheliwe musaakhonimwanyu ni mwathumetho yooca. Apaale waari otapanya.

¹³Munkuxeketho munninyu, ni muhokoleele wa mulopwana owo.

¹⁴Muluku a ikuru sootheene oomoreliweni ikharari vamaithoni wa mulopwaneene yoowo weera owo atthunihere omuhokoloxa munninyu ni Benyamini vamoha ni nyuwosa. Vano, kaahikhalano anamwane, kheewo yooweera.”

¹⁵Asilopwana ale yaarowa wExipitu ekuxaka soovaha, musurukhu woopwaha ni Benyamini. Ephiyakaru, yaahiixoonihera wa Yoseefe.

¹⁶Yoseefe amoonakaru Benyamini areene ni yaale, aamweerela mutokweene a vaatewawe: “Waaronghe asilopwana ala owannyaka, wiive enama emoha, wareherere, niwoko eniice ni miyo othana eriyari.”

¹⁷Mulopwana ole aapaka yeeyo Yoseefe aamulamulenlaawe, anaaroiha asilopwana ale owannyawe Yoseefe.

¹⁸Yoonaka weera yaaroihiwa owannyawe Yoseefe, yaapacera woova yeerelanaka: “Ti niwoko na musurukhu hiyo naaphwannyaahu musaakhoni emaara yoopacera. Owo onooniwanano, aninyesereraka weera nikhale ipotthasawe ni onoowaakamelatho abuurwaahu.”

¹⁹Evolowaka vaate wa Yoseefe, yaamwaattamela mulopwana aakunxe, enamweerela:

²⁰“Mwiiwe apwiya! Emaara yoopacera hiyo naarwiiyaahu wExipitu nno, vekhaikhai naatthuna othuma etrigu paahi.

²¹Vano, nihokoleelaka owaani, naaheemela mphironi ni naaphwanya musaakhonimwahu musurukhu wa khula mutthu aaruuhalaawe mpaka wookwaneleene. Tivawo nihokolonxaahu musurukhu ole.

²²Nooruuha musurukhu mukinatho weera nithume etrigu. Khanimusuwenle taani aahenle musurukhu ole musaakhonimwahu.”

²³Mulopwana ole aawaakhula: “Mukakamuwe. Mulukwaanyu ni Muluku a atithinyu, ti Yoowo aahenle muhakhu musaakhonimwanyu, niwoko musurukhwaanyu kaahaakhelela.” Mulopwana ole aamutaphula Simeyoni, anamuroiha vaavaale yaaraayawo.

²⁴Vahoolowaya aahaaroiha vaate wa Yoseefe, anaavaha maahi weera erapiheke inaawosaya, anaavahatho yooca abuurwaaya.

²⁵Awosa yaareherera soovahasaya, ewehereraka orwa wa Yoseefe othana eriyari, niwoko yaasuwela weera yaarowa oca vaavaale.

²⁶Yoseefe aphiyakaru vaatewawe, awosa yaamvaha soovaha yaaruuhalaaya, enuuramela ohoolowawe.

²⁷Awuulumihakaru, aahaakoha: “Ari salaama atithinyu, mulopwana oowuuluvala mwaakileenlaanyu? Nlelo ori ni okumi?”

²⁸Awosa yaamwaakhula: “Murumeiyaanyu, atithihu, nlelo akumi ni aneetta ni salaama. Vahoolowaya yaahuuramatho emooniheraka nttittimiho.”

²⁹Awehaka mukhwipimwawe, Yoseefe aamoona munneiye Benyamini aayariwe ni amayaya amoharu, anaakoha: “Ti yoola munninyu neetthaako mwaakileenlaanyu?” Vahoolowaya aamweerela: “Muluku oovahe mahala, mwanaka.”

³⁰Yoseefe waamuumaxa owanoni mwaha wa munneiye ole moota wooweera aatthuna wiinla. Tivawo aavennyaawe woowaakuveya, anavolowa mukwaartunimwawe, aniinla.

³¹Asuusulakaru ni omukhurunuwaka murima, aahokolowa, aneera: “Niceeke.”

³²Yaamvahera wawawe emwalamwaxaka ni axunneiye mpakatho awExipitu yaaca ni yoowo, niwoko khawaatthunihereya oca ni aHeberi. Wa yaawo ocano ti mwiikhowaaya

³³Axunneiye Yoseefe yaakilaathiye ohoolowawe ethataanneene nnenesene okhuma mutokweene mpaka mukhaani, ni yaawehana ncerekhule.

³⁴Yoseefe aalamulela weera eceeke vameesa vamoharu ni yoowo, ni waatta wa yooca ya Benyamini waari wookwana miceco mithanu waapwaha asikhwaawe. Vano, awosa yaapaka efesta, enawura yaatthunelaaya.