Read Makhuwa-Shirima Epacerero 44 Bible Online

Epacerero 44 - Makhuwa-Shirima bible

Epacerero 44

¹Yoseefe aamulamulela mutokweene a vaatewawe: “Osarihe etrigu musaakhoni sa asilopwana ale, ni ohokoloxere musurukhu wa khula mutthu owanoni wa esaakhwaawe.

²Vahoolowaya ohele ekoomixaaka ela ya eyuuma yoorikaxa owanoni wa esaakho ya neetthaako, vamoha ni musurukhu owo olimvaaweno etrigu.” Mulopwana ole aapaka sootheene ntoko Yoseefe aamulamulenlaawe.

³Oxaawaya, axunna ale ni abuurwaaya yaaraxeliwa.

⁴Hiiho, nlelo ehinaaye orakamela esidade, Yoseefe aamweerela mutokweene a vaatevawe: “Waatthimakele woowaakuveya asilopwana ale ni waaphwanya, waweerele: “Heeni mwaakakhanyihalaanyu yooreera ni yoonanara?

⁵Mohiiya ekoomixi ya apwiyaaka, mwa yeeyo yaawurelaaya ni yaatthomaayano. Nyuwosa moopaka etthu yoonanaraxa!”

⁶Mulopwana ole aaphwanyakaru, aaphitela masu ale.

⁷Ale yaamwaakhula: “Heeni apwiya aneeraaya hiiho? Ottai wa arumeiyaaya opaka etthweene yeela.

⁸Moone, musurukhu hiyo naaphwannyaahu musaakhonimwahu, nohoohokoloxerani mweelaponi ya oKanaani. Ongwereya hayi wiiya itthu sa iyuuma soorikaxa sa vaate wa apwiyaanyu?

⁹Mmoha a hiyo aphwanyaniwa yeeyo, anaakhwe. Vano hiyo ootheene akina nnikhale ipottha sa Yoseefe.”

¹⁰Mulopwana ole aawaakhula: “Kinimwaakhulela. Nneere ha: Yoowo kineeraaka kimpwanyane ekoomixi, anaakhale epotthaaka, mene wa akina kheekhalano mulattu.”

¹¹Khula mutthu a yaawo aakuruxa esaakhwaawe, anataphula.

¹²Mulopwana ole aakungura apaceraka wa mutokweene mpaka wa mukhaani, anaphwanya ekoomixi musaakhoni ya Benyamini.

¹³Vahoolowaya awosa yaahaahula soowarasaya, enawelihatho isaakho mwaabuurunimwaya, enahokoleela osidade.

¹⁴Yuda ni axunneiye yaaphiyaaya vaate wa Yoseefe, owo nlelo aari weiwo. Vano awosa yaahiikuhera vathi ohoolowawe.

¹⁵Yoseefe aahaakoha: “Mukipanke eheeni? Khamusuwenle weera miyo kinoowera oloha?”

¹⁶Yuda aamwaakhula: “Nneereke hai wa apwiyaaka? Nnihimekeni? Moota heeni nneeraahu nooviriyeleni weera hiyo khaninono nthowa? Muluku oomwaleela nthowa na arumeiyaanyu. Vano noolikana weera nikhale ipotthasanyu vamoha ni yoowo ophwanyaningwe ekoomixaanyu.”

¹⁷Wa soothesene, Yoseefe aawaakhula: “Hata vakhaani nkimpaka etthweene yeeyo. Paahi yoowo ophwanyaningwe ekoomixaaka aneera akhale epotthaaka, mene nyuwosa muhokoleeleke vaate wa atithinyu mmuretteleni.”

¹⁸Yuda aamwaattamela anamweerela: “Dyoontte apwiyaaka. Muntthunihere murumeiyaanyu ola weera uulume nsu nimoha vamaithoniwanyu, ni muhikinyoonyeriwe muroolikanaru ni Farawu*.

¹⁹Apwiyaaka mwaanikoha weera nookhalano atithihu ni munnihu mukina.

²⁰Hiyo naawaakhulani weera nlelo nookhalano atithihu oowuuluvaleene, mwanaya neetthaako amuyanre yuuluvanleene. Vano amunnawaawe a amayawe amoharu ahookhwa ni ola ohanle meekhaawe ni atithawe, annamusivela vancipale.

²¹Apwiyaaka mwaaweerela arummeyaanyu ala: ‘Mwakiruuhele wenno weera kimoone.’

²²Vano hiyo naawaakhulani apwiyaaka, weera mmiravo owo khawaawereya waahiya atithawe, niwoko aahiya, atithawe animookhwa.

²³Apwiyaaka mwaanyeserera mweeraka: ‘Mwaahimuruuha munninyu neetthaako, khamungwera ohokoleela wenno.

²⁴Nihokoleelakaru wa murumeiyaanyu, atithihu, naahaathalihera yeeyo apwiyaaka mwaahimalaanyu.

²⁵Atithihu yaanirummaaya ohokoleelatho wExipitu weera nithume etrigu,

²⁶hiyo naawaakhula: ‘Nnihokoleelewo paahi namukuxa munnihu neetthaako. Vano khoongwereya ophiya ohoolo wa mulopwana ole munnihu neetthaako aahikhala ni hiyo.

²⁷Tthiri, murumeiyaanyu, atithihu, aneerenle: ‘Moosuwelasa nnenesene weera amwaaraka kaayaranne anamwane eeli paahi.

²⁸Mmoha a yaawo oottakaneela ni kaaheera: ‘Vekhaikhai oonyaanyiwa ni mpaka olelo nkimmoona.

²⁹Vano nyuwosa mwakaakha Benyamini olatho ni yamukhumelela erisa, namuuluvala ola anaakhwe moothananani.’

³⁰Tivawo, nahokoleela wa murumeiyaanyu, atithihu, nihimurowanne munnihu, yanoonaru atithihu, ehireere osiveliwa ni yoowo,

³¹yoona weera munnihu khakhanle ni hiyo, vano arumeiyaanyu eniyaatannyere atithaya okhwa moothananani.

³²Ohiya hiiho, murumeiyaanyu ohaaroromeliha atithawe omulipano mmiravo aweerelaka: ‘Kaahooruuhelani ola, miyo nkikhaleno nthowa wa mmiravo ola mookuminimwaka wootheene.’

³³Tivawo kinoovekelaakani, dyoontte munghiye murumeiyaanyu akhale ntoko epotthaanyu vanipuroni na mmiravo ni mutthunihere weera owo ahokolowe ni axunneiye.

³⁴Khoongwereya ohokoleela wa atithaka kihimukuxale mmiravo. Hoye, kihoone erisa eneera yaarweele atithaka.”