Read Makhuwa-Shirima Epacerero 46 Bible Online

Epacerero 46 - Makhuwa-Shirima bible

Epacerero 46

¹Yixrayeli aattimula ni soorelasawe sootheene. Aaphiyaawe oBerxeba, aampakela yooveleela Muluku a atithawe Isaki.

²Vano Muluku aamuulumano Yixrayeli mmooneloni moohiyuni: “Yakobe, Yakobe!” Owo aamwaakhula: “Miyo kiri va.”

³Owo aamweerela: “Miyo ti Muluku, aani, Muluku a atithinyu. Muhoove orowa wExipitu, niwoko kinimookhalihaniwo muloko mutokotoko.

⁴Miyo Yoomeene kinimoohoolani wExipitu ni vekhaikhai kinimoohokoloxani. Vano ntata na Yoseefe nniwale maithwaanyu.”

⁵Yakobe aattimula oBerxeba. Anamwane a Yixrayeli yaahaakuxa atithaya Yakobe, anamwanaaya ni axaaraya mukaaroni Farawu* aaruminghaawe.

⁶Yaakuxatho mihuwosaya ni sooreela yaaphwannyaaya oKanaani. Hiiho Yakobe aarowa wExipitu ni ekhapiraawe yootheene.

⁷Aahaarowano wExipitu anamwanaawe, asilopwana ni asithiyana ni axisulwaawe asilopwana ni asithiyana, eyo tiiyo ekhapiraawe yootheene.

⁸Vano masina a anamwane a Yixrayeli (eyo tiiyo Yakobe ni anamwanaawe) yaarongwe wExipitu ti ala: Rubeni, ntthaara na Yakobe.

⁹Anamwanaawe Rubeni yaari ala: Hanokhi, Palu, Hezironi ni Karimi.

¹⁰Anamwane a Simeyoni yaari ala: Yemuyeli, Yamini, Ohadi, Yaki, Zowari ni Xawuli, mwaana a muthiyana muKanaani.

¹¹Anamwane a Leevi yaari ala: Gerxono, Kohathi ni Merari.

¹²Anamwane a Yuda yaari ala: Eri, Onani, Xela, Perezi ni Zera. Eri ni Onanitho yaahookhwa mweelaponi ya oKanaani. Anamwane a Perezi yaari ala: Hezironi ni Hamula.

¹³Anamwane a Isakari yaari ala: Tola, Puwa, Yope ni Ximeroni.

¹⁴Anamwane a Zebuloni yaari ala: Serede, Eloni ni Yaleyeli.

¹⁵Yaari yaala anamwane Leya aamuyarannaawe Yakobe oPadan-Arami omuhiya mwanawe muthiyana, Dina. Vano ekhapiraawe yootheene yaari miloko miraru naararu.

¹⁶Anamwane a Gadi yaari ala: Zifeyoni, Hagi, Xuni, Ezeboni, Eri, Arodi ni Ariyeli.

¹⁷Anamwane a Axeri yaari ala: Yimena, Yixeva, Yixevi ni Beriya. Vano murokoriye aari Sera. Anamwane a Beriya yaari ala: Heberi ni Malekiyeli.

¹⁸Ela yaari ekhapira Zilipa aamuyarannawe Yakobe. Vano aari Zilipa Labani aamvanghaawe mwanawe muthiyana, Leya, ntoko murumeiyi. Zilipa aahaayara wookwana anamwane muloko ni athannamosa.

¹⁹Anamwane a Rakheli, mwaariye Yakobe yaari ala: Yoseefe ni Benyamini.

²⁰wExipitu, Asenati, mwaana muthiyana a Potifari musaserdoti* mmoha a wOni, aamuyarano Yoseefe anamwane eeli ala: Manaxe ni Efrayimi.

²¹Anamwane a Benyamini yaari ala: Bela, Bekeri, Axebeli, Gera, Nahamani, Ehi, Roxi, Mupimi, Hupimi ni Arede.

²²Ala yaari anamwane Rakheli aamuyarannaawe Yakobe — muloko ni axexe.

²³Mwaana a Dani aari Huximi.

²⁴Anamwane a Nafitali yaari ala: Yakhezeyeli, Guni, Yezeri ni Xileme.

²⁵Ala yaari anamwane Biliya aamuyarannaawe Yakobe. Vano aari Biliya yoowo Labani aamvanghaawe mwanawe muthiyana, Rakheli, ntoko murumeiyi. Biliya aahaayara anamwane athanneeli.

²⁶Ootheene yaale yaarongwe wExipitu ni Yakobe — ekhapiraawe yootheene waahiya axaaraya anamwanaawe waapwexerera yaari atthweene miloko mithannamosa ni athannamosa.

²⁷Navetho, yaalikeleliwa anamwane eeli Yoseefe aayanraawe wExipitu, epuumba ya emusi ya Yakobe yaarongwe wExipitu yaaphiyera miloko mithannamiili.

²⁸Vano Yakobe aamuhooliha Yuda wa Yoseefe weera asuwele moota woorowa oGoxeni, enaphiya elapo ya oGoxeni.

²⁹Yoseefe aawela ekaaro, anarowa oGoxeni weera aakumaneno atithawe Yakobe. Akumanakaru ni atithawe, aatthimaka weera aakhubaare, ni aakhubaaraka yaawo, aahiinla vancipale apisaka omaala.

³⁰Yakobe aamweerela Yoseefe: “Vano kikhweeke hapo kohoona ekhovaawo ni koosuwela weera weyo nlelo mukumi!”

³¹Yoseefe aaweerela axunneiye ni emusi yootheene ya atithawe: “Kinoorowa kaaleele aFarawu* weera axunnaka ni emusi yootheene ya atithaka yaamanke mweelaponi ya oKanaani, ahoorwa wenno.

³²Nkeere weera asilopwanaawo akukhuli ankosoopa mihuwo ni aarwaano mihuwosaya ni sootheene arinaaya.’

³³Vano Farawu* alamula owiitthanani ni ookohani: ‘Mumvara mutekoni?,’

³⁴mwamwaakhule ha: ‘Arumeiyaanyu anghuwa muhuwo okhuma enamwanaaya ntokotho yaapakaaya makholowaaya.’ Hiiho munootthuniheriwa omaka mweelaponi ya oGoxeni, niwoko akukhuli ootheene ari oonyoosiwa ni awExipitu.”