Read Makhuwa-Shirima Epacerero 48 Bible Online

Epacerero 48 - Makhuwa-Shirima bible

Epacerero 48

¹Eviraka ehuhu ekina, aaheereliwa Yoseefe: “Atithinyu anoovoreiwa.” Vano aarowa owoona aakuxaka anamwanaawe eeli, Manaxe ni Efrayimi.

²Yakobe aaheereliwa: “Mwaninyu Yoseefe ohoorwa owoonani. Yixrayeli aahiilipihera, anakilaathi vakaamani.

³Yakobe aamweerela Yoseefe: “Muluku a ikuru sootheene aahiixoonihera oLuzi, mweelaponi ya oKanaani ni weiwe aakireeliha

⁴akeerelaka: “Kinimoovahani ekhapira etokotoko ni mwa nyuwo nsikhumelele miloko sincipale. Nkivahe ekhapiraanyu elapo ela ntoko yawaya wa mahuku ootheene.

⁵Vano, anamwaniinyu eeli mwaayanraanyu wExipitu kihinaaye orwa nno eniisuweliwe ntoko awaka. Efrayimi ni Manaxe eniikhale awaka ntoko araaya awaka Rubeni ni Simeyoni.

⁶Anamwane eniiyariwe vahoolowaya eniikhale awawo; awo eniyaalikeliwe mpuumbani sa Efrayimi ni Manaxe yaphiyera ehuhu yoowaakhela yoohiyeriwa.

⁷Miyo kihokolowaka oPadan, wa othananawaka Rakheli aahookhwa mweelaponi ya oKanaani, hiyo nlelo nireene ni mukwaahaahu naattamelaka wEfrata. Vano kaamvitha vaavaale, mukerekhere ephiro enkela wEfrata, eyo tiiyo oBeteleheemu.”

⁸Yakobe awoonakaru anamwane a Yoseefe, aakoha: “Alasa taani?”

⁹Yoseefe aawaakhula atithawe: “Ti anamwane Muluku okivanghaawe wenno.” Yixrayeli aaheera: “Mukiruuhele va weera kaareelihe.”

¹⁰Yixrayeli maithwaawe yaari ookotakota niwoko na wuuluvala ni khaawera woona nnenesene. Tivawo Yoseefe aawaattamihenraawe anamwanaawe, ni atithawe yaahaabeca, enaakhubaara.

¹¹Vano Yixrayeli aamweerela Yoseefe: “Nkuupuwelela weera nkoonetho ekhovaawo, ni vano Muluku ookitthunihera owoonatho anamwanaawo.”

¹²Vahoolowaya Yoseefe aahaavenxasa mmakuthanimwaya, ni aahuuramela vathi ohoolowawe.

¹³Yoseefe aahaakuxa ooweeli — Efrayimi moono mulopwana vakhiviru wa moono muthiyana wa Yixrayeli ni Manaxe moonowaawe muthiyana vakhiviru wa moono mulopwana wa Yixrayeli ni aawaattamihera.

¹⁴Wa soothesene, Yixrayeli aahookola moono woolopwana aniikaathera vamuru wa Efrayimi aarookhalaru mukhaani ni avirikanyihaka nyoono, aahiikaathera moono woothiyana vamuru wa Manaxe aarookhalaru ntthaara.

¹⁵Vano aamureeliha Yoseefe eeraka: “Muluku aareelihe anamwane ala. Makholowaaka Abrahaamu ni Isaki yaamurumeela Muluku Owo, ni Owo aari Mukukhulaaka mahuku ootheene mpaka olelo.

¹⁶Aani, ti Mulukweene Yoowo aari ndyelo okivulunxe wa soonanara sootheene. Ekhale oowiitthaniwa mwa nsinanaka ni masina a atithaka Abrahamu ni Isaki nitho ekhalaneke ekhapira etokotoko mweelaponimu.”

¹⁷Yoseefe awoonakaru atithawe emwiikaatheraka ntata na woolopwana vamuru wa Efrayimi, khaahakalanle. Tivawo aavanraawe moono wa atithawe eerelaka oceendya vamuru wa Efrayimi aronghaka wa Manaxe.

¹⁸Yoseefe aaweerela atithawe: “Hoye tiithi! Ntthaara ti nna. Mwiikaathere ntatananyu na woolopwana vamuruwawe.

¹⁹Mene atithawe yaakhootta yeeraka: “Koosuwela, mwanaka. Miyo koosuwela. Owotho anaathatuwe muloko. Anaakhaletho mutokweene mmoha. Wa soothesene, munneiye mukhaani anaakhale mutokweene ompwaha yoowo ni ekhapiraawe eniithatuwe miloko sincipale.”

²⁰Nihuku nne Yakobe aahaareeliha eeraka: “Muloko wa aYixrayeli onuuvarele muteko masinaanyu weera ereelihaneke ni masu: ‘Muluku oopakeeni nyuwo ntoko ompankaawe Efrayimi ni Manaxe.’ Hiiho aamunnuwiha Efrayimi amuhiyanyihaka Manaxe.

²¹Woottharelana Yixrayeli aamweerela Yoseefe: “Miyo kihanle vakhaani okhwa, mene Muluku anaakhale ni nyuwo ni anoohokoloxereni elapo ya makholowaanyu.

²²Weenre okhalaka muhooleli a axunneiyo, kinimoovaha elapo ya onyaakoni kaakunxaaka wa awAmori ni ekatanaaka ni nyuurasaka.