Read Makhuwa-Shirima Epacerero 49 Bible Online

Epacerero 49 - Makhuwa-Shirima bible

Epacerero 49

¹Vano Yakobe aawiitthana anamwanaawe aweerelaka: “Mukisuseerelase va weera koothalihereni yeeyo eneera yookhumelelaseni mmahukuni a muhoolo.

²Muthukumane ni mwiiwe, anamwane a Yakobe; ngwiiwelele atithinyu Yixrayeli!

³Rubeni, weyo ntthaaranaka, ikurusaka ni eneneero yoopacera ya olopwanaaka — mutokweene munttittimihoni ni moowerani.

⁴Oowuupa ntoko maahi, khookhalatho mutokweene, niwoko woowela ekaama ya atithawo vankonaakawo ni khawuumaanle.

⁵Simeyoni ni Leevi ti axunna. Ikatanasaya ti ikapwiitthi sa nipuhero.

⁶Nkintthuna ovolowa anthukumanaayawo! Kihiyeke weera kihikhale mpatta wa ediyanxaaya, niwoko musaranimwaya yaawiiva atthu ni yaahintaka mapita a imombe mwayiini.

⁷Soolaphiwa sikhale isarasaya sootepaxa ni onyoonyiwawaya woonanaraxa! Kinimwaakawanyiha mweelaponi ya Yakobe ni kinimwaamwaramwaxa mwa Yixrayeli.

⁸Yuda, axunnawo animoottottopela. Ntatanawo nnikhale vaxiko wa amwiittanaawo ni anamwane a atithawo ammookokhorela oholowaawo.

⁹Yuda, weyo ti mwaaxaana a mwatto; aani mwanaka, ntoko mwatto ahokolowaka woolupatthani. Oniireherera otuphela ntoko mwatto; oniixaatalela ntoko mwatto muthiyana. Taani ongwera ongwanano?

¹⁰Ekopo kheerwa ekuxiwa wa Yuda, aani ekopo yoolamula eniikhale eriyari ya nyettosawe mpaka aneeraawe arwe yoowo ori muneene a ekopweene yeeyo. Ni miloko nsimwiiwelele yoowo.

¹¹Owo anaamutthukelele buurwaawe vamwirini wa iwuuva*; aani mwaaxaana a buuru muthiyana vaphandini yooreeraxa ya evideira*. Anaakatthe soowarasawe vaviinyuni; mukaandyowaawe musuumuni mwa iwuuva*.

¹²Maithwaawe eniikhale ooriipa opwaha eviinyu ni mainwaawe ootteela opwaha mukaka.

¹³Zebuloni anaamake mukerekhere wa ephareiya ni anaathatuwe nipuro nooweemela makula matokotoko. Nyiinaanosawe nsiphiye mpaka oSidoni.

¹⁴Isakari ti buuru oolipaxa iixaatalenleene vamirittiniwawe.

¹⁵Oonaka weera nipuronawe na wiitthuuwa ni elapwaawe ti yooreera, anuurame vathi wa yoolemela ni anaavilele miteko soonyesererihiwa.

¹⁶Dani anaakihe yoophwanela ya mulokwaawe hiiho ntoko empakaaya yakhalaru epuumba ya aYixrayeli.

¹⁷Dani anaakhale ntoko enowa mukerekhere musewe, ntoko evili mukerekhere ephiro enluma etthottobwa ya ekavalu* ni enimmoroxa nttulittuli namweettiha.

¹⁸Ii! Yave, miyo kingweherera woopolawanyu!

¹⁹Gadi anaakaraweliwe ni alavilavi, mene ti yoowo aneera aakarawele ni aattharelele.

²⁰Meesa a Axeri sinisaatte sooca ni owo anaareherere sooca sa emwene.

²¹Nafitali ti naahe ootaphuwa. Owo onlaleiya masu ooreeraxa.

²²Yoseefe ti mwiri woowiimaxa; wusa wusa wusa mukerekhere naattuuttu. Iphandisaya sinrambela vasulu wa exiri.

²³Alipa oolatha nyuupa yaangwanano, yaamvonya nyuupa moota woomwiitta.

²⁴Mene muupaawe waahaanya nnenesene ni nyoonosawe saari soohithukumela niwoko na ntata na Namawera a Yakobe ori Mukukhuli ni Mwala a Yixrayeli.

²⁵Aani ti Mulukweene Yoowo a atithawo onookhavihera; Muluku a ikuru sootheene onooreeliha ni mareeliho a wiirimu, a moowiixera, a mapele ni a oyara.

²⁶Mareeliho a atithawo ti oowaatta, woopwaha mareeliho a nyaako soohimala, woopwaha samahala soowaattaxa sa mattumuxa oohimala. Mareelihowaaka ootheene ekhale vamuru wa Yoseefe, vayuuci ya oothanliwa variyari wa axunneiye.

²⁷Benyamini ti mwiici oxeexelo onkhuura yoolupatthiwa ni wiilaka onkawa ovanraaya.”

²⁸Ti seiya ipuumba muloko ni piili sa Yixrayeli ni ti seiya atithaya yaaleelansaaya yaareelihaka, emvahaka khula mutthu nreeliho naamwaattama.

²⁹Vano Yakobe aahaalamulela eeraka: “Kihanle vakhaani othukumanyiwa ni atthwaaka. Mwakivithe vamoha ni makholowaaka munikhukuni nri mmatta ya muHiti Efroni.

³⁰Ti nikhuku nne nri mmatta ya Makipela, vakhiviru wa oMamre, elapo ya oKanaani. Abrahaamu aathuma ni muHiti Efroni ntoko yawayeene weera evithaneke.

³¹Weiwe oovithiwa Abrahaamu ni Sara, mwaariye; Isaki ni Rebeka, mwaariye. Weiwetho koomvitha Leya.

³²Ematta ni nikhuku nri mwemmo yaathumiheriwe ni aHiti.”

³³Yakobe amalihakaru waalamulela anamwanaawe, aahiixaatalela, anakhwa ni aathukumanyihiwa ni atthwaawe.