Read Makhuwa-Shirima Epacerero 50 Bible Online

Epacerero 50 - Makhuwa-Shirima bible

Epacerero 50

¹Yoseefe aawuuramela atithawe awiinlelaka, anaabeca.

²Vahoolowaya Yoseefe aahaalamulela mameediku yeemenle muteko nihuku nenenenne weera ettikitthele murette woopisiha wuntta muttembo wa atithawe Yixrayeli, enapaka yeeyo.

³Yaavira mahuku miloko mixexe ookwaneleene, niwoko eyo yaari ehuhu yoottikitthela murette woohunttiha. Ni awExipitu yaahiinla okhwawawe Yakobe mahuku miloko mithannamiili.

⁴Eviraka mahuku oolalamika, Yoseefe aahuuluma ni atthu a vaate wa Farawu* aweerelaka: “Mwatthuna okoonihera murima wooreera, mwamuleeleke Farawu* mukeerelaka miyo:

⁵‘Atithaka yaakilipeliha yeeraka: ‘Kihanle vakhaani okhwa. Mwakivitheke munihiyeni kiirehererenlaaka mweelaponi ya oKanaani.’ Vano, dyoontte mukitthunihere orowa waavitha atithaka ni kamaliha, kinoohokolowa.’”

⁶Farawu* aaheera: “Murowe, mwaavithe atithinyu ntoko yoolipelinghaayani.”

⁷Hiiho Yoseefe aapwaha waavitha atithawe ni anamalaka ootheene a Farawu* vamoha ni asitokweene ootheene a vaate wa Farawu* ni a wExipitu yaamuhoola.

⁸Waahiya yaawosa, emusi yootheene ya Yoseefe, axunneiye ni ootheene a vaate wa atithawe yaarowatho. Paahi anamwane, imombe ni ikhondoolo saahanle oGoxeni.

⁹Ikaaro ni anamweettiha a ikavalu* yaamuhoolatho. Aari nakupa.

¹⁰Yaaphiyalaaya nipuro nimveeriwa* etrigu na wAtadi, mukerekhere mwa Yordanu, yaahiikhupanyera ni ekuttho etokweene ya malatta. Yoseefe aawiinlela atithawe ekuttho ya mahuku mathannameeli.

¹¹Akanaani yaamankewo yiiwakaru ekuttho ele vanipuroni nimveeriwa* etrigu na wAtadi, yaaheera: “awExipitu antthara ekhovelelo ya ekuttho ya malatta. Tiwawo nniitthaniwaaya nipuro nne vakhiviru wa Yordanu Abeli-Mizerayimi.

¹²Hiiho anamwane a Yakobe yaapaka yeeyo aalamulenlaawe:

¹³Yaamurongha oKanaani, enamvitha munikhukuni nri mmatta mwa Makipela, vakhiviru wa oMamre — nikhuku nne Abrahaamu aathummaawe wa muHiti Efroni weera nikhale nawaya noovithanamo.

¹⁴Aavithakaru atithawe, Yoseefe aahokoleela wExipitu vamoha ni axunneiye ni ootheene yaale yaamuhoonle.

¹⁵Vano, axunneiye Yoseefe yoonaka weera atithaya ahookhwa, yaaheerelana: “Ankha Yoseefe nlelo anithanya, uupuwelelaka ikukuttula mwa sootheene seiye naampankaahu?”

¹⁶Yaamurumihela Yoseefe mutthenga ola: “Atithinyu ehinaaye okhwa yaanilamulela

¹⁷weera nooleeleni ha: ‘Kinoovekani weera mulevelele soohiyanyiha ni soottheka sa axunninyu yoopankaayani moota woonanara! Vano mulevelele soottheka sa arumeiyi a Muluku a atithinyu.’” Aleeliwakaru, Yoseefe aahiinla.

¹⁸Vahoolowaya yaahoorwa axunneiye, yaamukokhorela ohoolowawe, enamweerela: “Hiyo va ti ipotthasanyu.”

¹⁹Wa soothesene, Yoseefe aawaakhula: “Muhoove. Nkikhanle vanipuroni na Muluku!

²⁰Nyuwosa mwaakivaanelela yoonanara, mene Muluku ootatuxa yooreera moota wooweera olelo wuureliwe okumi wa atthu ancipale.

²¹Tivawo, muhoove. Miyo nkoocihaseni nyuwosa ni anamwaniinyu.” Ni hiiho aahaakurunuxa ni aawuulumela moosivelani.

²²Yoseefe aapwaherera okhala wExipitu vamoha ni emusi yootheene ya atithawe. Aakhala ni okumi iyaakha ncira ni muloko mmoha

²³ni aahoona osuulu wa Efrayimi. Ohiya hiiho, aawaakhela ntoko awawe anamwane a Makiri, mwaana a Manaxe.

²⁴Ahinaaye okhwa, Yoseefe aaweerela axunneiye: “Miyo kihanle vakhaani okhwa. Vekhaikhai, Muluku anookhavihereni ni anoovenxeni mweelaponi ela, ooronghakani elapo aamuroromelinghaawe ni nlipelo Abrahaamu, Isaki ni Yakobe.

²⁵Yoseefe aahaalipeliha anamwane a Yixrayeli eeraka: “Vekhaikhai, Muluku anookhavihereni okhuma ni ehuhuweene yeeyo mukuxe makhuvaaka nno.

²⁶Yoseefe okhwiiye areereno iyaakha ncira ni muloko mmoha. Ni attikittheliwakaru murette woohunttiha, aaheliwa munipokosini wExipitu.