Read Makhuwa-Shirima 2 Samuweli 1 Bible Online

2 Samuweli 1 - Makhuwa-Shirima bible

2 Samuweli 1

¹Akhwiyeene Sawuli, Davide aahokolowa vahoolo woowaawina awAmaleki, anakhala oZikalagi mahuku meeli.

²Vanihukuni nanaararu aaphiya mulopwana mmoha akhumaka aakonenlaawewo Sawuli, soowarasawe saahungweene ni areene itthayaru mmuru. Amwaattamelaka Davide aamuuramela ooniheraka nttittimiho.

³Davide aamukoha: “Onkhumelela woowi?” Mulopwana ole aamwaakhula: “Kitthangwe yaakonenlaayawo aYixrayeli.”

⁴Davide aamukohatho: “Okithalihere yeereiye.” Owo aamwaakhula: “Anakhottwaahu yaatthawa okhottoni. Ancipale ahiiviwa — hiihotho Sawuli ni mwanawe Yonatani.”

⁵Vano Davide aamukoha mmiravo aamuruuhenle ihaali iye: “Osuwenle hai weera Sawuli ni mwanawe Yonatani ohookhwa?”

⁶Mmiravo ole aamwaakhula: “Yeereya kiri vamwaako oGilibowa. Aariwo Sawuli iivonyeraawe vanivakaniwawe, ikaaro sa ikavalu* ni anamweettihaaya ehaleelaka omphwanya.

⁷Owo arukunuwakaru aakoona, anakiitthana akhuwelaka ni miyo kineera: ‘Miyo kiri va?’

⁸Owo aakikoha: ‘Weyo taani?’ Kaamwaakhula: ‘Miyo ngwAmaleki’

⁹Vano aakilamulela: ‘Orwe va, okiive! Kihanle vakhaani okhwa.’

¹⁰Tivawo kaamwaattamenlaaka, kinamwiiva, niwoko kaasuwela weera ovulala eenraawe khaakhala. Kaakuxa ecireemba yaari mmurumwawe ni nikosanawe kinooruuhelani nyuwo, pwiiyaaka.”

¹¹Vano Davide ni asilopwanaawe ootheene ni yoowo yaahaahula soowarasaya.

¹²Awosa yaatthuka, eniinla mpaka wiila, emulalamikelaka Sawuli, mwanawe Yonatani, anakhotto a Yave ni muloko wa oYixrayeli, niwoko yaahiiviwa ancipale.

¹³Davide aamukoha mmiravo aamuruuhenle ihaali: “Weyo a woowi?” Owo aamwaakhula: “Miyo mwaana a namarwa, ngwAmaleki.”

¹⁴Davide aamukoha: “Ohoovenle heeni omwiiva oottikittheliwa a Yave?”

¹⁵Vano Davide aamwiitthana mmoha a asilopwanaawe, anamulamulela: “Orwe, omwiive.” Vanonto nakhotto ole aamvulaliha anamwiiva.

¹⁶Ahinaaye Davide aamweerela: “Nthowa na okhwawawo ti nawawo. Eyanweene yeeyo yohookhalela onamoona weenraawo: ‘Koomwiiva oottikittheliwa a Yave.’”

¹⁷Davide aahiipa ecipo yoolalamika ela mwaha wa Sawuli ni mwanawe Yonatani,

¹⁸alamulelaka weera yaxuttihiwe asilopwana ootheene a epuumba ya Yuda. Ecipo ela yoolalamika esuweliwe ntoko ecipo ya Nyuura ni yoolempwa mulivuruni ya Yaxari:

¹⁹Ii! aYixrayeli! Ovuwawanyu woowiniwa vanttumuxani. Ii! Moone moota akhwiiyaaya anakhotto!

²⁰Muhilaleiye yeeyo oGati hata muhithalihere mmiseweni sa wAxekeloni weera anamwane asithiyana a aFilisti oohiineliwa ehihakalalaxe.

²¹Ii! Nyaako sa oGilibowa — weera sihikhalenotho nikame hata epula naari imatta sinruwera etrigu ya sooveleela, niwoko wuuwu exikudu* ya ooweraxa yooveihiwa; exikudu* ya Sawuli kheettikittheliwatho makhura

²²ehikhanle ni ephome ya mittembo ni makhura a anakhotto. Muupa wa Yonatani khawaakuza ni ekatana ya Sawuli khayaahululiwa mahala.

²³Sawuli ni Yonatani — mookuminimwaya yaari oosiveleya ni mookhwaanimwaya khayaamwalamwaxiwe. Yaari oowaaluwaxa waapwaha axaaka ni oolipaxa oowaapwaha amwatto.

²⁴Ii! Anamwane asithiyana a aYixrayeli — mmwiinlele Sawuli, mwa yoowo oowarihani ikuwo sooxeera ni eyuuma yoorikaxa.

²⁵Moone moota akhwiiyaaya anakhotto mukhottoni! Yonatani okhwenle vamwaakoni.

²⁶Moota kinoothananelaaka munnaka, Yonatani! Moota kootthunaxaaka! Okisivelawawo waari wooreeraxa opwaha osivela wa asithiyana.

²⁷Moone moota akhwiiyaaya anakhotto! Ikapwitthisaya soomala ophwatiwa!