Read Makhuwa-Shirima 2 Samuweli 13 Bible Online

2 Samuweli 13 - Makhuwa-Shirima bible

2 Samuweli 13

¹Eviraka ehuhu, Amenoni, mwaana mulopwana a Davide, aamusivela Tamari, murokoriye ooreeraxa a Abesalomi, munneiye a wuutiithini.

²Owo aathananiheya niwoko na murokoriye a wuutiithini Tamari, moota wooweera owo aavoreiwa, eenre akhala mwaamwali oowiikosoopa ni khaawera omwaattamela.

³Vano Amenoni aakhalano nthamwene mmoha iitthaniwa Yonadabi, mwaana mulopwana a Ximeya, munneiye Davide. Yonadabi ole aari oocendyera.

⁴Owo aamukoha Amenoni: “Heeni nyuwo, mureene mwaana mulopwana a mwene, muraanyuno ekhalelo yoothananaxa nihuku ti nihuku? Mukileele, enoovirani.” Amenoni aamwaakhula: “Kinimusivela Tamari, murokoriye munnaka, Abesalomi.”

⁵Yonadabi aamweerela: “Murowe vakaamani moothererihaka ovoreiwa. Vano atithinyu yaarwaaka wooxekurani, mwaaleele: ‘Kintthuna weera murokoraka Tamari akiruuhele yooca. Owo akirehererele yooca vamaithoniwaka weera kimooneke ni kice mmatatanimwawe kimoonaka.’”

⁶Vanonto Amenoni aahaakhulela miruku iye, aniixaatalela oothererihaka ovoreiwa. Mwene aarongwaawe omuxekura, Amenoni aamweerela: “Kintthuna weera murokoraka Tamari arweeke akireherereleke iboolu piili vamaithoniwaka weera kice mmatatanimwawe.”

⁷Davide aamurumihela mutthenga Tamari mpaani mwa mwene: “Oroweke wa empa ya acimweenaawo Amenoni, waarehererele yooca.”

⁸Vano Tamari aarowa wa empa ya acimweenaawe Amenoni, yiixaatalenle. Owo aaheetheya ephepa, anapaka iboolu vamaithoniwawe, anooxa.

⁹Vahoolowaya aakuxa yooxeriwa, anamuruuhela iboolu, mene aakhootta oca. Amenoni aalamulela weera ootheene ekhume. Vano ekhumaleene ootheene,

¹⁰aamweerela Tamari: “Mukiruuhele mukwaartunimwaka weera kice mmatatanimwanyu.” Tamari aakuxa iboolu aarehererenlaawe acimweenaawe, anaaroihela mukwaartunimwaya.

¹¹Vanonto, owo aakhuveelaawe weera amurumeele, Amenoni aamvara, aneera: “Murokoraka, mukone ni miyo!”

¹²Tamari aamwaakhula: “Hoye acimweene, muhikiverule! Khaneeriwa ola oYixrayeli! Muhipake ololoweene yoowo!

¹³Eniikeereni? Nkitapuxeye hai overuliwawaka? Eheeni eniyookhaleeni? Nyuwo enimoomorelani erisa oYixrayeli. Dyoontte, muulume ni mwene. Owo onimootthuniherani weera nithelane.”

¹⁴Wa soothesene, aakhootta omwiiwelela ni eenre alipaxa ompwaha Tamari, aamukoniha.

¹⁵Vahoolowaya Amenoni aapacera omuthanyaxa opwaha osivela otokotoko aaraaweno wopacera. Aamweerela: “Ovenye ni opwahe!”

¹⁶Owo aamwaakhula: “Muhinakoomola, niwoko yoonanara ela enootepa opwaha yeela mukipankaanyu vaanaano va.” Vaheera aakhootta omwiiwelela.

¹⁷Aamwiitthana murumeiyaawe a vaatevawe, anamulamulela: “Omukhumihere vaate muthiyana ola ni okokottele nsele!”

¹⁸Vano murumeiyaawe aamukhumihera vaate, anakokottela nsele. Tamari aawara mukaandyo wooxoraxoriwa woorakama, niwoko owo waari moota yaawaraaya anamwane asithiyana a mwene yaari asimwali oowiikosoopa.

¹⁹Tamari aahiihela ettuura mmurumwawe, anaahula mukaandyowaawe iivarenleene muru aakuxera ephiro akhuwelaka ni iinlaka.

²⁰Acimweenaawe Abesalomi yaamukoha: “Yoonanara heeni yoopankaayani acimweenaanyu Amenoni? Mmaaleke murokoraka. Awo ti acimweenaanyu. Muhipwaherere othananela.” Oothananaxeene Tamari aakhala vaate wa acimweenaawe Abesalomi.

²¹Mwene Davide iiwakaru yeeyo aanyoonyaxiwa.

²²Abesalomi khaamuulumenle etthu Amenoni yooreera hata yoonanara. Wa soothesene, aamuthanya Amenoni niwoko na omuverula murokoriye Tamari.

²³Siviraka iyaakha piili, anamamettha a ikhondoolo sa Abesalomi ereene oBahali-Hazori vakhiviru wa mwiinano wa wEfrayimi, Abesalomi aahaalattula anamwane asilopwana ootheene a mwene weera athukumaneno.

²⁴Abesalomi aarowa wa mwene, anamweerela: “Anamamettha a murumeiyaanyu aapacera mutekwaaya. Kaatthuna weera mwene ni anamalakaawe ephiye ofestaniwaka.”

²⁵Mwene aamwaakhula: “Hoye, mwanaka, nihirowe ootheene niwoko eyo enimoolemelani. Abesalomi aamundyoonttelelaru, khaarongwe ni aamureeliha.

²⁶Vano Abesalomi aamvekela: “Mwa yeeyo, dyoontte muntthunihere munnaka Amenoni weera arowe ni hiyo.” Mwene aamukoha: “Heeni ontthunaawo weera owo oroweno?”

²⁷Abesalomi annamdyoonttelela moota wooweera mwene aamutthunihera Amenoni ni anamwanaawe asilopwana akina orowano.

²⁸Abesalomi aahaalamulela asilopwanaawe: “Mwiiwe! Amenoni ahapaliwa eviinyu ni miyo kaweerelani: ‘Mmwiive Amenoni,’ vano mmwiive. Muhoove, niwoko ti miyo koolamulenleni. Mulipe ni mminye murima!”

²⁹Vano asilopwana a Abesalomi yaampakela Amenoni yeeyo Abesalomi aalamulenlaawe. Anamwane asilopwana ootheene a mwene yaavenya, enaawela aburwaaya, enatthawa.

³⁰Awosa etthawaka hiihaale, Davide aahaakhela ihaali iya: “Abesalomi oowiiva anamwane asilopwana ootheene; khahanleru.”

³¹Mwene aavenya, anaahula ikuwosawe, anuuramihela ekhovaawe vathi. Arumeiyi ootheene aaraaweno yaahaahulasatho ikuwosaya.

³²Vano Yonadabi, mwaana mulopwana a Ximeya, munneiye Davide aamweerela: “Pwiiyaaka, muhuupuwele weera owo oowiiva anamwaniinyu ootheene; iiviwe paahi Amenoni. Yaari yoovaanela ya Abesalomi okhuma nihuku nenenenne Amenomi aamukoninghaawe murokoriye Tamari.

³³Muhipwatthe ihaali sineera weera anamwaniinyu ootheene ahookhwa. Ti Amenoni paahi okhwiiye.”

³⁴Eyo eri hiiho, Abesalomi aatthawa. Vano mulopwana aari namalipelela aaweha, anawoona atthu ancipale mmuseweni mpatta ninkela nsuwa, ekhuruwaka vanttumuxani. Namalipelela ole aarowa, anamuthalihera mwene: “Koowoona asilopwana mpatta wa oHoronayimi, mukerekhere vanttumuxani.”

³⁵Yonadabi aamweerela Davide: “Moone, anamwaniinyu aaphiya. Yookhumelela ntoko murumeiyaanyu ooleenlaaweni.”

³⁶Owo amalihaka wuuluma, anamwane asilopwana a mwene yaawa ni ikuttho. Mwenetho ni arumeiyaawe ootheene yaahiinlaxa.

³⁷Abesalomi aatthawa, anarowa wa Talemayi, mwaana mulopwana a Amihudi, mwene a oGexuri. Vanonto Davide annamuthananela Mwanawe mahuku ootheene.

³⁸Abesalomi atthawenleene oGexuri, aakhalawo iyaakha tthaaru.

³⁹Vano Davide aapacera wunkheliwa ni Abesalomi, niwoko aapepeseya okhwa wa Amenoni.