Read Makhuwa-Shirima 2 Samuweli 14 Bible Online

2 Samuweli 14 - Makhuwa-Shirima bible

2 Samuweli 14

¹Yowabe, mwaana mulopwana a Zeruha, aasuwela weera Davide ohunkheliwa ni Abesalomi.

²Vano Yowabe aalamulela oroweliwa oTekowa muthiyana a miruku. Owo aamweerela muthiyana: “Moothererihe wiinanela. Ngware ikuwo sa olalamika ni muhiixunkhelihe. Mweettelowaanyu okhale ntoko wa oviringhe ehuhu yincipale iinanelaka.

³Vano murowe wa amwene ni mwaaleele masu ala.” Ni Yowabe aamuleela masu muthiyana eeraawe athalihe.

⁴Muthiyana a oTekowa iixooniheraawe wa mwene, aahuuramihela ekhovaawe vathi ooniheraka nttittimiho, anamweerela: “Dyoontte mwene, mukikhavihere!”

⁵Mwene aamukoha: “Mulattu heeni muraanyuno?” Owo aamwaakhula: “Vekhaikhai miyo naamukhweli; aiyaka ahookhwa.

⁶Murumeiyaanyu ookhalano anamwane asilopwana eeli. Nihuku nimoha, yaangwana mmatta. Khaakhanlewo mukina weera awaanganyule. Mmoha aammana mukina, anamwiiva.

⁷Vano nihimo na atthu ootheene noomweemelela murumeiyaanyu muthiyana nimunyesereraka: “Mmwinnyerere yoole namwiiva weera nimwiive niwoko na okumi wa munneiye — owo khaphwanenle okhala namahiyeriwa. Awosa antthuna okaakha yeeyo keeraaka kiwutele maithori nihipwahereraka nsina na aiyaka hata ekhapira mweelaponi.”

⁸Mwene aamweerela muthiyana: “Murowe owaani, miyo kinoolamulela weera orehereriwe mulattwaanyu.”

⁹Vaheera muthiyana a oTekowa aamweerela: “Ii! Pwiiyaaka, mwene, ikuru sikhaleke sawaka ni sa emusi ya atithaka; mwene muhiivekelele nthowa na omwene ni na ehicaanyu.”

¹⁰Mwene aamwaakhula: “Akhala mukina aneera awoopopiheni, mukiruuhele. Owo khookacamihanitho.”

¹¹Owo aamweerela: “Dyoontte, mulipele mwa Nsina na Yave, Mulukwaanyu weera muhimutthunihere akhalaru nakukuttula ohononeliwe omwiiva. Hiiho mwanaka mulopwana khaphwatiwa.” Davide aamwaakhula: “Mwa Nsina na Yave — hata vakhaani mwaninyu owo khiiviwa.”

¹²Vanonto muthiyana aamweerela: “Muntthunihere murumeiyaanyu weera uulumetho etthu wa mwene pwiiyaawe.” Owo aamwaakhula: “Muulumeke.”

¹³Owo aamukoha mwene: “Muupuwenle hai opakela muloko wa Muluku etthu siiyeela? Amwene muulumaka hiiho, muniithoriha muneenaanyu, niwoko amwene khamuntthunihenre ohokolowa yoowo oomoliwe.

¹⁴Khoongwereya osemba okhwawahu — ntoko ohingwereyaaya wuukanya maahi ayeeherengye vathi. Wa soothesene, Muluku khaniivaru. Ohiyanawaya, onaasaasera moota wooweera oowoomoliwa ahimurakamele.

¹⁵Vano kirweenle wuuluma yeela wa nyuwo amwene pwiiyaaka, niwoko atthu aakoopopiha. Murumeiyaanyu ohuupuwela: ‘kinimuuluma ni mwene. Apaale onoopaka yeeyo murumeiyaawe omvekelaawe.

¹⁶Khuno mwene onimwaakhulela omutapuxa murumeiyaawe mmatatani mwa mulopwana ontthuna okiiva miyo ni mwanaka wa yoohiyeriwa, mwa yeeyo Muluku oonivanghaawe.’

¹⁷Vano masu a murumeiyaanyu ti ala: ‘Olakela wa apwiya, mwene okiruuhele wiitthuuwa, niwoko pwiiya, mwene ori ntoko ndyelo a Muluku ongwera okawanyiha yooreera ni yoonanara. Yave Mulukwaanyu akhale ni nyuwo.’”

¹⁸Vanonto mwene aamweerela muthiyana: “Mukaakhuleke nnenesene yeeyo kineeraaka kookoheeni.” Muthiyana aamwaakhula: “Pwiiyaaka mwene muulumeke.”

¹⁹Mwene aamukoha: “Iya miruku sa Yowabe, keera?” Muthiyana aamwaakhula: “Vekhaikhai, pwiiyaaka mwene, nkingwera okhootta moonnaanyu. Khaawo ongwera wookhuwani etthu. Aani, ti murumeiyaanyu Yowabe okilamulenle opaka yeeyo.

²⁰Owo aapaka yeeyo weera aceendye mukhalelo ola. Vaheera pwiiyaaka ti a miruku ntoko ndyelo a Muluku — munsuwela sootheene sinkhumelela mweelaponi ela.”

²¹Mwene aamweerela Yowabe: “Wooreera. Kinimwaakhulela yooveka ela. Murowe, mwamuhokoloxe mmiravo Abesalomi.”

²²Yowabe aahuramihela ekhove vathi, anamureeliha mwene amweerelaka: “Pwiiyaaka mwene, olelo murumeiyaanyu oosuwela weera moomoonihera murima wooreera, niwoko mwene ohaakhulela nivekelo na murumeiyaawe.”

²³Vanonto Yowabe aarowa oGexuri, anamuruuha Abesalomi amuhokoloxeraka oYerusaleemu.

²⁴Vano, mwene aaheera: “Owo aroweke owannyawe. Khantthuniheriwa woona ekhovaaka.” Hiiho Abesalomi aarowa owannyawe ni khoonnetho ekhove ya mwene.

²⁵Variyari wa aYixrayeli ootheene khaariworu mulopwana ooreera ni oottapaheriwa ntoko Abesalomi. Mweerutthuni yootheene khaarakhanleru.

²⁶Imaara sootheene mayihaawe yaamulemelaxaaya, owo annamettha, aphimaka olemelawaya waakhala ikiilu* piili ni vakhaani olikanaka ni olemela wa emwene.

²⁷Abesalomi aakhalano anamwane asilopwana araru ni mwaana muthiyana mmoha. Vano nsinanawe mwaana muthiyana naari Tamari ni aari ooreeraxa.

²⁸Abesalomi aakhala oYerusaleemu iyaakha piili ahoonaka ekhove ya mwene.

²⁹Vano Abesalomi aamwiitthana Yowabe weera amurumihele wa mwene, mene Yowabe aakhootta orowa. Tivawo aamwiitthannaawe emaara yanaaveeli, mene aakhoottatho.

³⁰Abesalomi aaweerela arumeiyaawe: “Moone, ematta ya Yowabe eri mukerekhere emattaaka ni kheereeremo esevada*. Murowe mwahiseke.” Vanonto arumeiyi a Abesalomi yaahisa ematta.

³¹Yowabe aarowa owannyawe Abesalomi, anamukoha: “Arumeiyaanyu ahinsenreni mmattamwaka?”

³²Abesalomi aamwaakhula: “Moone, koowiitthanani weera koorumiheni wa mwene ni mutthenga ola: Kirweenle heeni oGexuri? Fataari kaahaarwiiye!’ Vano kintthuna woona ekhove ya mwene ni miyo kaphwanela okhwa, mwene akiiveke.”

³³Yowabe aarowa wa mwene, anamuthalihera yeeyo. Davide aamwiitthana Abesalomi ni owo aavolowa, anuuramihela ekhovaawe vathi ohoolo wa mwene. Vano mwene aamuulumiha ni ebeecu.