Read Makhuwa-Shirima 2 Samuweli 15 Bible Online

2 Samuweli 15 - Makhuwa-Shirima bible

2 Samuweli 15

¹Eviraka ehuhu, Abesalomi aaphwanya ekaaro; ikavalu* ni asilopwana miloko mithanu etthimakelaka ohoolowawe.

²Owo annapeherera ovenya akhalaka mukerekhere mmuseweni onkela wa mulako wa esidade. Khula emaara mukina aaviraawewo omuthalihera mwene mulattwaawe weera alakele, Abesalomi annamwiitthana amukohaka: “Munkhuma muttetthe heeni?” Mutthu ole aakhula weera ti mmoha a ipuumba sa aYixrayeli,

³vano Abesalomi annamweerela: “Mulattwaanyu wooreera ni khoonthowa, mene khawoworu mwaakhula a mwene aniiwe.”

⁴Aapwaherera eeraka: “Ii! Waari weera kookhalihiwa mphuki a elapo! Mwa yeeyo ootheene yakhalano mulattu hoye hoye makacamiho kaamuthorihela moota wa ekhaikhai.”

⁵Imaara sootheene mukina aamwaattamelaawe weera amukokhorele ooniheraka nttittimiho, Abesalomi ookola moono avariwaka wahala ni abeeciwaka ntata.

⁶Waari mweettelo wa Abesalomi wa ootheene yaarwa wa mwene yaasaasaka opakeliwa ekhaikhai mmulattunimwaya ni hiiho aYixrayeli yaapacera omukupaleela.

⁷Simalakaru iyaakha ixexe, Abesalomi aamweerela mwene: “Mukitthunihere orowa oHeberoni weera kakwaniherewo nlipelo kaapankaaka vamaithoni wa Yave.

⁸Murumeiyaanyu aaraawe oGexuri, wArami, aalipela ha: ‘Yave akihokoloxera oYerusaleemu, kinoomulapa oHeberoni.’”

⁹Mwene aamweerela: “Murowe mmuretteleni.” Tivawo aarongwaawe oHeberoni.

¹⁰Vano Abesalomi aahaarumihela anamitthenga muxiirini atthu a ipuumba sootheene sa aYixrayeli eeraka: “Mwiiwaru oruma wa mapalapatta, vano mweere: ‘Abesalomi ti mwene oHeberoni!’”

¹¹Asilopwana macira meeli a oYerusaleemu yaamuhoola Abesalomi. Yaalattuliwa, enarowawo ehisuwelaka naari ehihovelaka sa soovaanelasawe.

¹²Abesalomi amalihaleene opaka sooveleela, aamwiitthana namalakaawe mwene, Ahitofeli, muGiloni, onkhala oGilo. Yoovaanelela yaakhala ni ikuru yaattaka yaawo yaamutthara Abesalomi.

¹³Namutthenga mmoha aarowa omuthalihera Davide: “aYixrayeli ari ni Abesalomi.”

¹⁴Vano Davide aaweerela anamalakaawe ootheene yaari oYerusaleemu: “Nrowe, nitthaweke. Naahitthawa, ootheene hiyo khanimoopowa Abesalomi ni owo onoophwata esidade yootheene!”

¹⁵Anamalakaawe yaamwaakhula: “Arumeiyaanyu aalikana opaka yeeyo pwiiyaahu mwene aneeraawe alakele.”

¹⁶Mwene aattimula vamoha ni ootheene a emusaawe. Aahiya ikuxo muloko weera siwehawehe empa ya mwene.

¹⁷Hiiho mwene aattimula, atthu ootheene emuttharaka ni yaaheemela vanipuroni nookhuveela esidade.

¹⁸Asilopwanaawe ootheene yaamvira vamoha ni aKereti ni aPeleti ootheene; ni aGiti macira mathannamosa oottheene yaamuhoonle oGati yeetta ohoolowawe.

¹⁹Mwene aamukoha Itayi, muGiti: “Onnittharelani? Ohokolowe okhaleke ni mwene Abesalomi. Weyo namarwa, oothaamihiwa mulaponimwawo.

²⁰Ophiyale vaanaano ni khoonreera woonyesereriha orowa ni hiyo, miyo kihisuwelaka ninkelaahuwo. Ohokolowe ni axunneiyo. Yave awoonihere onnene ni ororomeleya.”

²¹Wa soothesene, Itayi aamwaakhula mwene: “Mwa Nsina na Yave kinlipela mookumini mwa mwene: Weiwo munrowaanyu okhala pwiiyaaka amwene — murumeiyaanyutho anaakhalewo — akhalaka mookumini hoye hoye mookhwaani.”

²²Davide aamweerela Itayi: “Wooreera, ohooleke.” Vano Itayi, muGiti, aaheetta vamoha ni asilopwanaawe ni emusaawe aaraaweno.

²³Amaki a mittetthe sootheene yaahiinla ekhuwelaka, anakhotto eviraka. Mwene aalapuwa oreyareyani na oKideroni ni atthu ootheene yaarowa ni yoowo mpatta wa onikareni.

²⁴Zadoki aakhalawotho ni aLeevi ootheene yaari ni yoowo yaateexa Arka* a wiiraana a Muluku. Yaawiikaathi Arka* a Muluku ni Abiyatari aapaka sooveleela mpaka atthu ootheene omala okhuma musidade.

²⁵Vano mwene aamweerela Zadoki: “Mwaahokoloxere Arka* a Muluku musidadeni. Yave akoonihera onnene, Owo onookihokoloxa weera kiwoonetho Arka* ni etabernaakulu*.

²⁶Vaheera Owo akeerela: ‘Khamuhiyono oosiveleyaaka, khamwaha! Akipakele yeeyo ontthunaawe.”

²⁷Mwene aamweerelatho musaserdoti* Zadoki: “Kookhalano yoovaanela. Muhokoleele osidade mmuretteleni vamoha ni mwaninyu Ahimahazi ni Yonatani mwaana mulopwana a Abiyatari. Nyuwo ni Abiyatari mwaakuxe anamwaniinyu asilopwana eeli.

²⁸Miyo kinooweherera mmirorani onikareni mpaka kineeraaka kiiwe ihaalisanyu.”

²⁹Vano Zadoki ni Abiyatari yaahaakuxa Arka* a Muluku enaahokoloxera oYerusaleemu, enakhalawo.

³⁰Vaheera Davide aapwaherera awelaka mwaako wa sooliveira*, iinlaka mphironimwawe, iikhunenleene mmuru ni ahiwanre ikwakwatta. Atthu ootheene yaari ni yoowo yaahiikhuneelatho mmuru, eniinla ewelaka vamwaako.

³¹Vano Davide aaleeliwa: “Ahitofeli ori mpatta wa Abesalomi.” Tivawo Davide aamvekenlaawe Yave: “Ii! Yave sihivareleye muteko miruku sa Ahitofeli!”

³²Davide aphiyakaru vasulu mwaako, mwa weiwo muloko waakhovelenlaaya omulapa Muluku, aamoona aarwaaka Huxayi, ngwArki, weera amukumaneno. Soowarasawe soothaala, mmurumwawe oreene itthayaru.

³³Davide aamweerela: “Mwarowa ni miyo, munookilemelihera.

³⁴Vaheera mwahokoleela osidade ni mwamweerela Abesalomi: ‘Kinookhala murumeiyaanyu, mwene. Khalayi kaarumeela atithinyu, mene vano kinookhala murumeiyaanyu,’ hiiho munookikhavihera mwaanganyeraka miruku sa Ahitofeli.

³⁵Asaserdoti* Zadoki ni Abiyatari anookhalawotho. Mwaathalihere sootheene muneeraanyu mwasuwele mpaani mwa mwene.

³⁶Aakhalawotho anamwane asilopwana eeli — Ahimahazi, mwaana mulopwana a Zadoki ni Yonatani, mwaana mulopwana a Abiyatari. Mwa yaawo mukileele sootheene muneeraanyu mwiiwe.”

³⁷Vano Abesalomi avolowakaru musidade, Huxayi, nthamwenaawe Davide, aaphiyaawe oYerusaleemu,.