Read Makhuwa-Shirima 2 Samuweli 16 Bible Online

2 Samuweli 16 - Makhuwa-Shirima bible

2 Samuweli 16

¹Davide arongweene wooxuurakamela vamwaako, aamphwanyawo Ziba, murumeiyi a Mefiboxeti, angwehereraka. Aarino abuuru akina ootthukiweene ni ekuxaleene ipaawu macira meeli, iboolu ncira sa iwuuva* soowaarikiwa; iboolu ncira sa efiigu* ni kacikhi oosareya eviinyu.

²Mwene aamukoha Ziba: “Oruuhenleni itthu iya?” Ziba aamwaakhula: “Abuuru eweliweke emusi ya mwene; ipaawu ni soowiima ecaaseke asilopwana ni eviinyu yaaruuheleke ikuru yaale ankhulumuwa munikareni.”

³Mwene aamukoha: “Ori woowi osuulu wa pwiiyaanyu?” Ziba aamwaakhula: “Ori oYerusaleemu niwoko onuupuwela: ‘Olelo aYixrayeli anookihokoloxera omwene wa nikholonaka.’”

⁴Vano mwene aamweerela Ziba: “Sootheene saari sa Mefiboxeti ti sawinyu.” Ziba aamweerela: “Oowiiyeviheene kinkokhora weera amwene pwiiyaaka mukihakalalele!”

⁵Davide amwaattamelaka Bahurimi, mulopwana mmoha a nihimo na Sawuli aakhumamo. Nsinanawe naari Ximei, mwaana mulopwana a Gera ni akhumaka, aamunyohola.

⁶Aamvonya maluku Davide ni asitokweene ootheene a mwene yaaroomurukureeraru anakhotto ni anamalipelela.

⁷Anyoholaka hiihaale, Ximei aaheera: “Okivenyere va, okivenyere va, weyo mulopwana a ephome, muhuurei!”

⁸Yave ohoohokoloxera ephome yootheene eyeehiwe mweemusini ya Sawuli, nipuro nenenenno olamulenlaawo. Yave ohinnyerera omwene mmatatani mwa mwaniyo mulopwana Abesalomi. Weyo woophwatiwa niwoko ori mulopwana a ephome.”

⁹Vano Abixai, mwaana mulopwana a Zeruha, aamweerela Davide: “Khoontthuniheriwa weera mwalapwa ookhwa ola omunyohola mwene! Mukihiyeke kirowe kamuhite!”

¹⁰Wa soothesene, mwene aamwaakhula: “Mumpwatthela heeni yeeyo anamwane a Zeruha? Aari Yave omulamulenle okinyohola, vano nyuwo taani oomuhiiha?”

¹¹Vanonto Davide aamweerela Abixai ni asitokweenaawe ootheene: “Moona, mwanaka mulopwana xaxaxa aasaasaka okiiva, ankha mulopwana ola ori a emusi ya Sawuli! Munghiyeke! Owo akinyoholeke, niwoko Yave oomulamulela.”

¹²Apaale Yave onimoona ohaawawaka olelo ni onimwaakakhanyiha yooreera ni onyohola kaakhenlaaka olelo.

¹³Davide ni anakhottwaawe yaapwaherera mphironi, Ximei aviraka mukerekhere mwaako aluluwanakano, anyoholaka mphironi ni amvonyaka maluku ni makottomola.

¹⁴Mwene ni atthu ootheene yaamuhoonle yaaphiya mukerekhere Yordanu ookhulumuweene. Iwo yaahiitthuuwawo.

¹⁵Eyo eri hiiho, Abesalomi ni asilopwana a aYixrayeli yaavolowasa oYerusaleemu ni Ahitofeli aari ni yoowo.

¹⁶Vano Huxayi, ngwArki, nthamwenaawe Davide, aamwaattamela Abesalomi, anamweerela: “Mwene wooyee! Mwene wooyee!”

¹⁷Abesalomi aamukoha Huxayi: “Ororomeleyawene ti wuuwu ni nthamwenaanyu? Muhimuttharenleni?”

¹⁸Huxayi aamwaakhula Abesalomi: “Kinoomurumeela yoowo oothanliwa ni Yave ni asilopwana ala ni aYixrayeli ootheene. Kinoopwaherera okhala ni yoowo.

¹⁹Ohiya toko yeeyo — olakela omuthanla omurumeela ti wawaka. Mooteene yoowo kaarumeenlaaka atithinyu, hiihotho kinimoorumeelani.

²⁰Abesalomi aamweerela Ahitofeli: “Munivahe mirukusanyu: Nipakekeni?”

²¹Ahitofeli aamwaakhula: “Mukoneno ikuxo sa atithinyu mwa seiyo ahiyenraaya oreherera empa ya mwene. Vano aYixrayeli ootheene anoosuwela weera mwiitothela manyaanya wa atithinyu ni ootheene ari ni nyuwo onoolipihaxa murima.”

²²Yaamukungela eheema Abesalomi vataratoni, anakonano ikuxo sa atithawe woohikhuwanyeya.

²³Vano mmahukuni ale miruku sa Ahitofeli saalikana ntoko miruku saarweela wa Muluku. Davide ni Abesalomi ooweeli yiiwelela mirukusawe.