Read Makhuwa-Shirima 2 Samuweli 17 Bible Online

2 Samuweli 17 - Makhuwa-Shirima bible

2 Samuweli 17

¹Ahitofeli aamweerela Abesalomi: “Mirukusaka ti iya: Mukitthunihere waathanla anakhotto 12 000 weera kittimule ohiyuweene yoola kimuttarattharaka Davide.

²Miyo kinoongwanano owo akhulumungweene ni ahilimpe. Kinoomurukureeriha muru ni anakhottwaawe anootthawa. Vahoolowaya kinoomwiiva mwene paahi

³koohokoloxerakani anakhottwaawe. Mummwaasa omwiiva mutthu mmoha paahi. Hiiho anakhotto ootheene anookhala mmuretteleni.”

⁴Abesalomi ni asitokweene ootheene a aYixrayeli saahaareera miruku iye.

⁵Vanonto Abesalomi aaheera: “Mmwiitthanetho Huxayi, ngwArki, weera niiwe mirukusawe.”

⁶Huxayi aphiyakaru, Abesalomi aamweerela: “Ahitofeli oonivaha mirukusawe. Vano nipakeke yeeyo ohimmaawe hoye hoye mookhalano miruku sikina?”

⁷Huxayi aamwaakhula Abesalomi: “Emaara ela miruku sa Ahitofeli khasireenre.

⁸Moosuwela weera atithinyu ni asilopwana araayano ti anakhotto ni aanyoonyiwa ntoko mwaamunama oowali iiyeriweene axaana. Ohiya toko yeeyo atithinyu ti nakhotto a miruku. Khaankona ni anakhottwaaya.

⁹Vano awo okhalaka oowiipitheene munikhukuni hoye hoye nipuro nikina. Anakhottwaanyu akina akina yiiviwa owana woopacera, yaawo eniisuwele yeeyo eniyeere: ‘Ancipale a anakhotto a Abesalomi aahiiviwa.’

¹⁰Hiiho mpaka nakhotto oolipa murima ntoko mwatto, onooporora, niwoko aYixrayeli ootheene aasuwela weera atithinyu ti nakhotto ooweraxa ni yaawo ari ni atithinyu ti oolipaxa murima.

¹¹Tivawo kinoovahaakani miruku iya: Mwaathukumanyihe aYixrayeli ootheene okhuma oDani mpaka oBerxeba — ancipalexa ntoko mihaava sa mphareiya. Ni nyuwo muneenaanyu mwaahooleleke mukhottoni.

¹²Vano nimmwaawanano mapuro ootheene eneeraaya ephwanyaneyemo naamorelaka yaawo ntoko nikame nimmorelaaya vathi. Owo ni anakhottwaawe ootheene khayoopowa.

¹³Owo avolowa esidade emoha, aYixrayeli ootheene anoorowanowo mikhoyi ni eniipurulele esidade ele oreyareyani, woohihiyaru etthu.”

¹⁴Abesalomi ni asilopwana a oYixrayeli yaaheera: “Miruku sa Huxayi, ngwArki, sooreerela soopwaha sa Ahitofeli.” Vano Yave oolakela ohonona miruku sa Ahitofeli eerelaka omphwata Abesalomi.

¹⁵Huxayi aahaathalihera asaserdoti* Zadoki ni Abiyatari: “Miruku sa Ahitofeli wa Abesalomi saari seiye, mene koomulaka Abesalomi opaka moota mukina.

¹⁶Vano munrumihele woowaakuveya mutthenga ola Davide: ‘Muhivirihe ohiyu mmirorani onikareni; mulapuwe mooloko woohihovela weera mwene ni atthu ootheene ari ni yoowo ehiiviwe.’”

¹⁷Yonatani ni Ahimahaxi yaakhala wEni-Rogeli. Epottha ethiyana yannaaleelasa imaara sootheene niwoko khayaawera wiileva yiixooniheraka musidade. Awosa yaarowa omuleela mwene Davide yeeyo yiiwaaya.

¹⁸Wa soothesene, mmiravo mmoha aawoona, anamuthalihera Abesalomi. Vano awosa yaattimula woowaakuveya, enarowa wa empa wa mmaki mmoha a oBahurimi. Aarino ehime vaatevawe ni awosa yaakhuruwelamo.

¹⁹Mwaariye aakhuneela ehime, anamwaraxelawo irooro weera ehooneye.

²⁰Asilopwana a Abesalomi yaaphiya vaate wa muthiyana enamukoha: “Ari woowi Ahimahazi ni Yonatani?” Owo aawaakhula: “Aalapuwa nxaapwa.” Asilopwana ale yaawaasaasa woohaaphwanya, enahokoleela oYerusaleemu.

²¹Asilopwana epwahanseene, eeli ale yaakhuma muhimeni, enarowa omuthalihera mwene Davide. Yaamuleela: “Muttimuleke woowaakuveya ni mwamulapuwe Yordanu. Ahitofeli ohoovaanelelani.”

²²Vano Davide ni ootheene yaari ni yoowo yaarowa oYordanu. Nsuwa naakhuma, ootheene elapungweene.

²³Ahitofeli oonakaru weera mirukusawe khasaakhuleliwe, aangwela buurwaawe, anarowa owaani esidade aayareliwaawe. Aareherera itthusawe sootheene, aniitthukelela. Vano aavithiwa onihiyeni na atithawe.

²⁴Abesalomi ni anakhottwaawe ootheene a oYixrayeli yaamulapuwaaya Yordanu, Davide eera aphiyaleene oMahanayimi.

²⁵Abesalomi aamukhaliha Amasa ntoko mutokweene a anakhotto vanipuroni na Yowabe. Amasa aari mwaana mulopwana a Yeteri, muYixrayeli mwa yoowo aamuthenle Abigayili, mwaana muthiyana a Nahaxi ni murokoriye Zeruha, amayawe Yowabe.

²⁶aYixrayeli ni Abesalomi yaakonela mweelaponi ya oGiliyade.

²⁷Davide aphiyaleene oMahanayimi, Xobi, mwaana mulopwana a Nahaxi a oRaba, elapo ya awAmoni, ni Makiri, mwaana mulopwana a Amiyeli oLo-Debari, ni Barezilai, muGiliyade a oRogelimi,

²⁸yaamuruuhela Davide ni anakhottwaawe soowaatala vakaamani, ibasiya ni ikaruma sa oloko. Yaamuruuhelatho etrigu, esevada* ni ephepa; inuku sowaarikiwa, ttaangare ni iroro;

²⁹oravo ni manteiga, ikhondoolo ni ekeixu* ni mukaka wa emombe. Yaamuruuhela iye Davide ni anakhottwaawe weera ece, “Niwoko yaasuwela weera yaahaakhulumula etala ni ntthona munikareni.”