Read Makhuwa-Shirima 2 Samuweli 18 Bible Online

2 Samuweli 18 - Makhuwa-Shirima bible

2 Samuweli 18

¹Davide aahaawehaweha anakhotto yaari ni yoowo, anaakhaliha asitokweene a nakupa a atthu macira muloko ni a ncira.

²Vahoolowaya aahaakawanyiha anakhotto mipatta miraru: mmoha waahooleliwa ni Yowabe; mukina ni Abixai, munneiye Yowabe mwaana mulopwana a Zeruhiya ni wanaararu ni Itayi, muGiti. Mwene aaweerela anakhotto: “Vekhaikhai, miyo muneenaaka kinimoohoolelani.”

³Vanonto awosa yaamweerela: “Muhinihoole. Nakhala nintthawa, awosa kheenitthukuruwela hiyo — hata mpatta mukina wa hiyo okhwaaka, awosa kheepwattha. Wa soothesene, wa hiyo moophiyera anakhotto macira macireene muloko. Fataari nyuwo muhale musidade weera munikhavihere.”

⁴Mwene aawaakhula: “Kinoopaka yeeyo enooreerelani.” Vano mwene aaheemela vamulako, anakhotto eviraka ekhumaka oowiiwananeene a ncira ni a macira muloko.

⁵Mwene aamulamulela Yowabe, Abixai ni Itayi: “Mwakikosoopere mmiravo Abesalomi. Anakhotto ootheene yaahiiwa yeeyo mwene aalamulenlaawe asitokweene ootheene mwaha wa Abesalomi.

⁶Awosa yaarowa ntuphini weera yaawaneno aYixrayeli. Ekhotto yaawaneliwa moothakoni wEfrayimi.

⁷Anakhotto a aYixrayeli yaawiniwawo ni anakhotto a Davide. Ancipale yaahookhwa nihuku nne — wookwanaka 20 000.

⁸Ekhotto yaamwareela nthuphini moothemwene ni nihuku nne othako waawiiva ancipale opwaha ekatana.

⁹Owaniwaka hiihaale Abesalomi angwenleene buurwaawe aahaakumanano anakhotto a Davide. Buuru aviraka vathi wa iphandi sa mwiri wa ekarivalyu*, mayihaawe Abesalomi yaahaanga mphandini sa mwiri ole. Aakhala musulusulu kuleele, buurwaawe apwangheene.

¹⁰Mulopwana mmoha oonakaru yeeyo, aamuthalihera Yowabe: “Komoona vaanaanova Abesalomi aangiyeene mmwirini wa ekarivalyu*.”

¹¹Yowabe aamweerela mulopwana aamuthalihenre yeeyo: “Eya! Momoona? Muhimwiivenleni? Mwaamwiivale, kaamoovahani ixekeli* muloko ni laamba a nakhotto ooweraxa.”

¹²Vano mulopwana aamwaakhula: “Naari mweera mukivahe ixekeli* macira muloko, nkaamwiiva mwaana mulopwana a mwene. Hiyo nohiiwa nnenesene seiye mwene oolamulenlaaweni nyuwo, Abixai ni Itayi eeraka: ‘Mwakikosoopere mmiravo Abesalomi.’

¹³Vano kiilemve kinamwiiva, amwene yaamusuwela ni nyuwo khamwaakaakiha.

¹⁴Yowabe aamweerela: “Nkaase ocerewawene ni weyo.” Aakuxa mavaka mararu, anahomano murima wa Abesalomi, owo nlelo aangiyeene mmwirini wa ekarivalyu* areene ni okumi.

¹⁵Vano muloko a anamakuxa a ikaphwitthi sa Yowabe yaamurica Abesalomi, enamuluha.

¹⁶Vanonto Yowabe aahiipa nipalapatta weera anakhotto ehiye waattharelela aYixrayeli, ni hiiho awosa yaahiya.

¹⁷Yaakuxa muttembo wa Abesalomi, enavonyera munyattani etokotoko ya ntuphini, yuukelelaka maluku nduu. Eyo eri hiiho, aYixrayeli ootheene yaatthawela owaani.

¹⁸Vano Abesalomi areene nlelo ni okumi, aahiitekela eyuupuxero oNreyareyani na Mwene eeraka: “Nkirino mwaana mulopwana weera apwahererihe nsinanaka. Tivawo aattenghaawe eyuupuxero ele nsinanawe ni mpaka olelo eniitthaniwa eyuupuxero ya Abesalomi.

¹⁹Vano Ahimahazi, mwaana mulopwana a Zadoki, aaheera: “Mukihiyeke kitthimakele wa mwene Davide kaaronghelaka ihaali weera Yave ohoopakani nnene ootapuxakani mwa amwiittanaanyu.”

²⁰Yowabe aamwaakhula: “Olelo kheehiyono emaaraanyu omuronghela ihaali mwene. Apaale ehuhu ekina, mene olelo hoye, niwoko mwaana mulopwana a mwene ohookhwa.”

²¹Yowabe aamweerela muKuxi: “Orowe wamuthalihere mwene yeeyo woonnaawo.” muKuxi aahuramela vathi ohoolo wa Yowabe, anapwaha, atthimakaka weera athalihe ihaali.

²²Ahimahazi, mwaana mulopwana a Zadoki aamweerelatho Yowabe: “Yeereiye eneera yeereiyeeyo, dyoontte, kintthuna omutthimakela muKuxi.” Vanonto Yowabe aamwaakhula: “Mwanaka, ontthunela heeni omutthara? Weyo khawaakhelaru ntthuvelo wa ehaali ela.”

²³Ahimahazi aanyeserera: “Yeereiye eneera yeereiyeeyo, kintthuna orowa.” Vanonto Yowabe aamweerela: “Oroweke!” Ahimahazi aatthimaka akuxeraka ephiro ya mweelaponi yoothatawala, anamukhalela ohoolo muKuxi.

²⁴Davide aakilaathiye variyari wa milako sa mpuwa ni sa omokoni wa esidade. Vano namalipelela awelaka vataratoni ya vamulako wa exiri, aamoona mulopwana mmoha aarwa atthimakaka.

²⁵Namalipelela aamwiitthana mwene amuthaliheraka yeeyo. Mwene aaheera: “Owo aari meekhaawe, entaphulela oruuha ihaali sooreera.” Ni mulopwana ole annakhuveela.

²⁶Namalipelela aamoona mulopwana mukina aarwa atthimakaka, anamweerela namalipelela a mulako: “Mmoone, mulopwana mukina ontthimaka meekhaawe. Mwene aaheera: “Onruuhatho ihaali sooreera.”

²⁷Namalipelela aaheera: “Kinoona ntoko oopacera otthimakawawe ori ntoko Ahimahazi mwaana mulopwana a Zadoki.” Mwene aaheera: “Ti mulopwana ooreera murima. Onruuha ihaali sooreera.”

²⁸Vano Ahimahazi aamwaattamela mwene anamuulumiha. Aahuuramihela ekhovaawe vathi ohoolo wa mwene, aneera: “Atthapeliwe Yave Mulukwaanyu! Owo oowinnyerera asilopwana yoowananani amwene pwiiyaaka.”

²⁹Mwene aamukoha Ahimahazi: “Mmiravo Abesalomi ori salaama?” Ahimahazi aamwaakhula: “Kohoona orukureereya muru otokotoko Yowabe amurumihaka murumeiyi a mwene nitho miyo, murumeiyaanyu, mene nkisuwenle ekhumelenle.”

³⁰Mwene aamweerela: “Osusere iwo ni wawehererewo.” Vano Ahimahazi aaweherera.

³¹Vanonto muKuxi aaphiya, aneera: “Pwiiyaaka, mwene, mwiiwe ihaali sooreera. Olelo Yave ohootapuxani wa ootheene yoowananani.”

³²Mwene aamukoha muKuxi: “Mmiravo Abesalomi ori salaama?” MuKuxi aamwaakhula: “Amwiittana ootheene a apwiya mwene ni ootheene antthuna woopakani yoonanara emaleleke ntoko mmiravo owo onihingye olelo.”

³³Ooriipiweene, mwene aawela mukwartunimwawe wa osulu wa mulako, aniinla. Aawela iinlaka akhuwelaka: “Ii Mwanaka Abesalomi! Mwanaka, mwanaka Abesalomi! Fataari kaakhwiiye nipuronawo. Ii! Abesalomi, mwanaka, mwanaka!”