Read Makhuwa-Shirima 2 Samuweli 2 Bible Online

2 Samuweli 2 - Makhuwa-Shirima bible

2 Samuweli 2

¹Eviraleene ehuhu ekina, Davide aamukoha Yave: “Kiroweke esidade emoha emoha ya isidade sa oYuda?” Yave aamwaakhula: “Muroweke.” Davide aamukoha: “Esidade heeni?” Yave aamwakhula: “oHeberoni.”

²Tivawo Davide aarongwaawe oHeberoni vamoha ni axaarawe ooweeli — Ahinowami oYizereyeli ni Abigayili, naamukhweli a Nabali oKarameli.

³Davide aahaakuxatho asilopwana yaari ni yoowo vamoha ni imusisaya, eniitekiha oHeberoni ni mittetthesaya.

⁴Vano asilopwana a oYuda yaaphiya oHeberoni, enamuttikitthelawo Davide ntoko mwene a epuumba ya Yuda. Davide iiwakaru weera asilopwana a oYabexi-Giliyade yaamvitha Sawuli,

⁵aahaarumihelasa anamitthenga aweerelaka: “Yave ooreeliheni niwoko na ororomeleyawanyu woomvitha mwenaanyu Sawuli.

⁶Yave awooniheraseni murimaawe wooreera ni miyotho kinoowiiraananani niwoko na yeeyo mpankaanyu.

⁷Vaheera mukhaleke oolipa ni oominya murima, niwoko Sawuli, pwiiyaanyu, ohookhwa ni epuumba ya Yuda yookittikitthela ntoko mwenaaya.”

⁸Eyo eri hiiho, Abeneri, mwaana mulopwana a Neri, mutokweene a anakhotto a Sawuli, aamukuxa Ixi-Boxeti, mwaana mulopwana a Sawuli, amurowanaka oMahanayimi.

⁹Aamukhalihawo mwene a oGiliyade, wAxuri, oYizereyeli, wEfrayimi, oBenyamini ni oYixrayeli wootheene.

¹⁰Ixi-Boxeti, mwaana mulopwana a Sawuli, aarino iyaakha miloko mixexe sa okumaawe aapaceraawe olamula oYixrayeli, alamulaka iyaakha piili. Vaheera epuumba ya Yuda yaamutthara Davide.

¹¹Areene oHeberoni Davide aalamula oYuda iyaakha ithannapiili ni nyeeri mithannamosa.

¹²Abeneri, mwaana mulopwana a Neri, vamoha ni asilopwana a Ixi-Boxeti, mwaana mulopwana a Sawuli, yaavenya oMahanayimi, erowaka oGibiyoni.

¹³Yowabi, mwaana mulopwana a Zeruha, vamoha ni asilopwana a Davide yaavenya, enaakumanano vanrattani na oGibiyoni. Mukuttula mmoha waari ekhopela ela nno ni mukina ekhopela ele.

¹⁴Vano Abeneri aamweerela Yowabi: “Nrowe naawanihe anakhotto akina akina ohoolowahu.” Yowabi aamwaakhula: “Nrowe.”

¹⁵Hiiho anakhotto muloko neeli a aBenyamini ni a Ixi-Boxeti, mwaana mulopwana a Sawuli yaalapuwa weera yaawaneno asilopwana muloko neeli a Davide.

¹⁶Vanonto khula mulopwana aamvara mwiittanaawe muruwaawe, enahomana mpararini moota wooweera ootheenaawo yaahookhwa. Tivawo nipuro nne oGibiyoni niitthaniwaaya Heleka-Hazurimi.

¹⁷Nihuku nenenenne ekhotto yaakukumaxa ni asilopwana a Davide yaahaawina Abeneri ni asilopwana a aYixrayeli.

¹⁸Anamwane asilopwana araru a Zeruha yaariwo: Yowabi, Asaheli ni Abixai. Vano Asaheli munsaatalani aatthimaka ntoko naahe.

¹⁹Aamuttharelela Abeneri, ahihapuwakaru.

²⁰Abeneri aaweha ottuli anamukoha: “Ti nyuwo Asaheli?” Owo aamwaakhula: “Ti yoomi.”

²¹Vano Abeneri aamweerela: “Fataari ohapuwela moono mulopwana hoye hoye muthiyana, mumvaraka nakhooto mmoha mmwaakhaka ikapwitthisawe.” Vaheera Asaheli khaahingye omuttharelela.

²²Emaara yanaaveeli Abeneri aamooperera: “Muhikittharelele! Nkintthuna owiivani. Moota heeni kineeraka kingwehe munninyu Yowabi vahoolo woowiivani?”

²³Wa soothesene, Asaheli khaatthunne ohiya omuttharelela, tivawo Abeneri amuhommaawe nipwiipwi ni nivaka mpaka ophuttula ottuli. Aamora, anakhwela vaavaale. Khula mulopwana aavinrewo, aaheemela vanipuroni Asaheli aamorenlaawe ookhweene.

²⁴Vaheera Yowabi ni Abixai yaamuttharelela Abeneri ni wiilaka, yaaphiyasa vanttumuxani na Ama, vakhiviru oGiya mphironi enrowa onikareni na oGibiyoni.

²⁵Vano anakhotto a aBenyamini yaathukumana emukhaviheraka Abeneri. Yaahiirehererela mukuttula mmoha, enaakamelasa vasulu nttumuxa.

²⁶Abeneri aamweerela Yowabi: “Khoontthuneya weera niivanane. Ommaleloni onuukhale othananaxa. Yaakhani muneeraanyu mwaalamule asilopwanaanyu ohiya waattharelela axunnaya?”

²⁷Yowabi aamwaakhula: “Kinlipela mwa Nsina na Yave — nyuwo mwahuulumme, anakhottwaaka yaampwaherera waattharelela axunnaya mpaka oxa.”

²⁸Vanonto Yowabi aahiipa nipalapatta, ni asilopwana ootheene yaahiya waattharelela aYixrayeli ni owana.

²⁹Ohiyu ole wootheene Abeneri ni asilopwanaawe yaaheetta eviraka wAraba. Yaamulapuwa Yordanu eviraka elapo yootheene ya oBiteroni, enaphiya oMahanayimi oxeexeloweene yoole.

³⁰Yowabi ahokolowakaru vahoolo woomuttharelela Abeneri, aahaathukumanyiha asilopwanaawe ootheene. Yaahoona weera yaahaleela anakhotto muloko ni athannaaxexe omuhiya Asaheli.

³¹Vaheera anakhotto a Davide yaawiiva aBenyamini macira mararu ni miloko mithannamosa yaari ni Abeneri.

³²Yaamukuxa Asaheli, enamvitha munihiyeni na atithawe oBeteleheemu. Vahoolowaya Yowabi ni asilopwanaawe yaaheettasa ohiyu wootheene, enaphiya oHeberoni oxaaka.