Read Makhuwa-Shirima 2 Samuweli 20 Bible Online

2 Samuweli 20 - Makhuwa-Shirima bible

2 Samuweli 20

¹Vanonto aakhalawo mulopwana mmoha ookukureya iitthaniwa Xeba, mwaana mulopwana a Bikeri, muBenyamini. Aahiipa nipalapatta akhuwelaka: “Khaninono mpatta wa Davide! Mwaana mulopwana a Yixai khannimpwattha! Khula muYixrayeli aroweke owaani!”

²Vano asilopwana ootheene a oYixrayeli yaamuhiya Davide emuttharaka Xeba, mwaana mulopwana a Bikeri. Vaheera asilopwana a oYuda yaapwaherera ni mwenaaya mmuseweni wootheene okhuma oYordanu mpaka oYerusaleemu.

³Davide ahokoleenleene empaawe ya emwene, aakuxa ikuxo muloko aahiyenraawe oreherera empa ya mwene, aniikaathi mpaani mwaalipeleliwa ni anamalipelela. Aaciha, mene khaakonneno. Sootheene saakhala ntoko asinaamukhweli mpaka okhwawaya.

⁴Vano Davide aamulamulela Amasa: “Ngwiitthane anakhotto a oYuda weera yiixoonihere va mmahukuni marararu ni nyuwo.”

⁵Wa soothesene, Amasa aaviriha ehuhu yincipale woowiitthana aYuda, apwahihaka ehuhu aavahiwaawe ni mwene.

⁶Davide aamweerela Abixai: “Xeba, mwaana mulopwana a Bikeri, anaanitepelaxe ompwaha Abesalomi. Mwaakuxe anakhottwaaka ni mwamuttharatthare weera ahiphwanye esidade yoolipiheriwa, anitthawaka.”

⁷Vanonto anakhotto a Yowabe vamoha ni aKereti ni aPeleti yaavenya oYerusaleemu emuttharattharaka Xeba mwaana mulopwana a Bikeri.

⁸Ereene vamwala mutokotoko wa oGibiyoni, Amasa aahaakumanano. Yowabe aagwara mukaandyo wa ekhotto ni laamba mmoha mwa yoowo aarino nluwo ohuleeliweenemo mwaalo. Yowabe amwaattamelaka Amasa, aahulula mwaalwaawe muxiirini.

⁹Yowabe aamukoha Amasa: “Muri salaama munnaka?” Aamvara Amasa ni ntatanawe noolopwana ettwattwara weera amubeece.

¹⁰Amasa khoonne mwaalo waari muntatani noothiyana mwa Yowabe. Yowabe aamuhoma vamirimani ni marupwaawe yaamorela vathi, anakhwa. Yowabe aamuhomme vamoharu paahi woohimuuluulelatho. Vanonto Yowabe ni munneiye Abixai yaapwaherera omuttharatthara Xeba, mwaana mulopwana a Bikeri.

¹¹Mmoha a anakhotto a Yowabe eemenle mukerekhere wa muttembo wa Amasa, aaheera: “Yaale animuthanla Yowabe ni Davide, emutthareke Yowabe!”

¹²Amasa aari pindya mmuseweni areene ephomeru. Aaviraru aamweemela omoona. Tivawo mulopwana ole aapurulenlaawe muttembo okerekhere musewe, anakhuneelano mukaandyo.

¹³Ovenxiweene muttembo mmuseweni, anakhotto ootheene yaamutthara Yowabe emuttharattharaka Xeba, mwaana mulopwana a Bikeri.

¹⁴Xeba aaviravira ipuumba sootheene sa aYixrayeli, anaphiya wAbeli-Beti-Mahaka ni aBeri ootheene yaathukumana weera ekhale ni yoowo.

¹⁵Anakhotto ootheene a Yowabe yaaphiya, enarica wAbeli-Beti-Mahaka. Yaapaka ekaaro yookurumulela exiri enapacera ottiitta exiri ya omokoni. Ettiittaka hiihaale exiri weera epwexe,

¹⁶muthiyana a miruku aakhuwela musidadeni: “Mwiiwe, mwiiwe! Mwamuleele Yowabe weera arwe wenno. Kintthuna wuuluma ni yoowo.”

¹⁷Owo amwaattamelaka, muthiyana aamukoha: “Nyuwo Yowabe?” Owo aamwaakhula: “Ti yoomi.” Vano muthiyana aamweerela: “Mwiiwe masu a murumeiyaanyu muthiyana.” Yowabe aamwaakhula: “Kinimwiiwa.”

¹⁸Muthiyana aaheera: “Khalayi yeeriwa: ‘Mvekele miruku musidade ya wAbeli’ ni mulattu wuulummwa hiiho.

¹⁹Hiyo anamurettele ni oororomeleya oYixrayeli. Nyuwo munaasaasera heeni ophwata esidade eri maayi mmoha a oYixrayeli? Heeni muntthunaanyu ohela nthala yoohiyera ya Yave?”

²⁰Yowabe aamwakahula: “Hoye, nkintthuna hata vakhaani ohela nthala naari ophwata esidade ela!

²¹Kheehiyono yeeyo. Mulopwana mmoha iitthaniwa Xeba, mwaana mulopwana a Bikeri a elapo ya mmanyaakoni wEfrayimi aamvaanelela mwene Davide. Muninnyerere mulopwana owo ni kinoohiya esidade.” Muthiyana aamweerela Yowabe: “Wooreera. Hiyo ninoovonyera murwaawe vaxirini.”

²²Vano muthiyana aarowa wuuluma ni amaki ootheene aasuwelihaka mirukusawe ni awosa yaamuhita Xeba, mwaana mulopwana a Bikeri, enamvonyera murwaawe Yowabe. Vano owo aahiipa nipalapatta ni anakhotto yaahiya esidade, khula mutthu ahokoleelaka owannyawe. Yowabe aahokoleela wa mwene oYerusaleemu.

²³Yowabe aari mutokweene a anakhotto ootheene a oYixrayeli; Benaiya, mwaana mulopwana a Yoiyada, aari mutokweene a aKeriti ni aPeliti;

²⁴Adonirami aari mutokweene a miteko soonyesereriwa; Yehoxafati, mwaana mulopwana a Alihudi, aari mutokweene a ilivuru sa nyaha;

²⁵Xeva aari namalepa; Zadoki ni Abiyatari yaari asaserdoti*

²⁶ni Ira, muYayiri, aari musaserdoti* a Davide.