Read Makhuwa-Shirima 2 Samuweli 21 Bible Online

2 Samuweli 21 - Makhuwa-Shirima bible

2 Samuweli 21

¹Ehuhu ekina moolamulani wa Davide, yaakhala etala yaavonle iyaakha tthaaru. Tivawo Davide aamvekenlaawe Yave. Yave aamwaakhula: “Ti niwoko na Sawuli ni emusaawe yoosareya ephome; niwoko aawiiva aGibiyoni.”

²Vano mwene aawiitthana aGibiyoni, anuuluma ni yaawo. Vanonto aGibiyoni khayaahiyono aYixrayeli, mene yaari yaale paahi yaahalahanle a awAmori. aYixrayeli yaahaaroromeliha ni nlipelo ohiwiiva, mene Sawuli aawiinlela ehace oYixrayeli ni oYuda aasaasaka owiiva.

³Davide aahaakoha aGibiyoni: “Koopakelekeni eheeni? Moota heeni kineeraka kireherere seiye sipakiwe weera mureelihe yoohiyeriwa ya Yave?”

⁴Vano aGibiyoni yaamwaakhula: “Mulattu nraahuno ni Sawuli ni emusaawe khoonuulumeya ni eparatha* hoye hoye eyuuma yoorikaxa; khanintthunaru omwiiva muYixrayeli.” Davide aamukoha: “Muntthuna koopakelekeni eheeni?”

⁵aGibiyoni yaamwaakhula: “Aari Sawuli oniphwante atthunaka onimaliha moota wooweera khaninono ikuru hata nipuro oYixrayeli.

⁶Munivahe asilopwana athanneeli a ekhapiraawe weera nawiive vamaithoni wa Yave oGibeya, esidade ya Sawuli aari oothanliwa a Yave.” Vano mwene aawaakhula: “Miyo kinoowinnyererani.”

⁷Mwene aamuurela Mefiboxeti, mwaana mulopwana a Yonatani, mwaana mulopwana a Sawuli niwoko na nlipelo naapakiwe variyari wa Davide ni Yonatani, mwaana mulopwana a Sawuli vamaithoni wa Yave.

⁸Vanonto aamukuxa Aremoni ni Mefiboxeti, mwaana mulopwana a Rizepa, mwaana muthiyana a Aya, aamuyarenlaawe Sawuli, vamoha ni asilopwana athanu a Merabi, mwaana muthiyana a Sawuli, mwa yaale aamuyanrenlaawe Aderiyeli, mwaana mulopwana a Barezilai, mMeholati.

⁹Owo aawinnyerera aGibiyoni, mwa yaawo yiiviwe vanttumuxani vamaithoni wa Yave. Athanneeli ale yaahookhwa vamoha. Yaahiiviwa mmahukuni oopacera a ohephiwa wa esevada*.

¹⁰Rizepa, mwaana muthiyana a Aya aakuxa esaakho, aniixaatalela vamwala. Okhuma epacerero ya yoohepha mpaka mittembo otthuleliwa epula, othana khaahiya ipalame sa wiirimu sitovaka mittembo naari ohiyu khaahiya eviraka axinama a ntuphini.

¹¹Davide aleeliwaka yeeyo, Rizepa mwaana muthiyana a Aya ni ekuxo ya Sawuli, aapankaawe,

¹²aalamulela oroweliwa makhuva a Sawuli ni Yonatani yaakuxiwe ni amaki a oYabexi-Giliyade. Awosa yaahiiya makhuva a nipuwa na oBeti-Xani, mwa weiwo aFilisti yaathomeiyaaya mittembosaya vahoolo woomwiiva Sawuli omwaako Gilibowa.

¹³Davide aaruuhawo makhuva a Sawuli ni mwaniye Yonatani ni aalamula weera makhuvaaya etakansiwe ni yaale yiiviwe ni aGibiyoni.

¹⁴Yaavitha makhuva a Sawuli ni Yonatani onihiyeni na Kixi, atithawe Sawuli, oZela, elapo ya Benyamini, epakaka sootheene mwene aalamulenlaawe. Vahoolowaya Yave aahaakhula mavekelo eerelaka oYixrayeli.

¹⁵Emaara ekinatho aYixrayeli yaahaawanano aFilisti. Davide ni asilopwana yaarowa waawanano aFilisti ni owo aakhulumuwaxa.

¹⁶Vano Ixebi-Benobi a ekhapira ya Rafa aaroromeliha omwiiva Davide. Vanonto ethoka ya nivakanawe na ebronze* naaleemela ixekeli* macira mararu ni aakhalanotho ekatana enyowani.

¹⁷Wa soothesene, Abixai, mwaana mulopwana a Zeruha, aamvuluxa Davide amwiivaka muFilisti. Asilopwana a Davide yaamulipelela yeeraka: “Khamurwatho munihoola mukhottoni weera waara wa oYixrayeli ohicipihiwe.”

¹⁸Emaara ekina yaakhala ekhotto ekina ni aFilisti oGobi. Ehuhuweene yeele Sibekai, muHuxati, aamwiiva Safi, mmoha a ekhapira ya Rafa.

¹⁹Mukhottoni ekina ni aFilisti oGobi Elihanani, mwaana mulopwana a Yaare-Oregamimi, muBeteleheemu aamwiiva Goliyati, muGiti. Mvittwaaya waalikana wunnuwa wa mwiri.

²⁰Mukhottoni mukinatho oGati, aakhala mulopwana oorakama aarino ikatha ithannamosa khula ntata ni khula nnaawo — sootheene iye saari ikatha miloko miili niixexe. Aaritho a ekhapira ya Rafa.

²¹Owo aahaaruwana aYixrayeli, mene Yonatani, mwaana mulopwana a Ximeya, munneiye Davide, aamwiiva.

²²Asilopwana axexe ale yaari a ekhapira ya Rafa oGati ni yaahiiviwa ni Davide ni anakhottwaawe.