Read Makhuwa-Shirima 2 Samuweli 22 Bible Online

2 Samuweli 22 - Makhuwa-Shirima bible

2 Samuweli 22

¹Davide aamwiipela Yave ecipo ela Yave amooponleene mmatatani mwa amwiittanaawe ootheene ni mwa Sawuli.

²Aahiipa ha: “Yave ori Mwalaaka, Wootthawelawaka ni Mvuluxaaka.

³Mulukwaaka ti Mwalaaka mwa weiwo kintthawelaakawo; Exikudwaaka yoowiixaakihera ni Nnyaka na ovuluxiwawaka. Owo ti nipuronaka noolipaxa ni etoore* yootthawelaawo. Nyuwo Yave ti Mvuluxaaka, mwa Yoowo onkoopola mwa anamapuhera.

⁴Kinimwiitthana Yave ophwanenle ottottopeliwa ni koovuluwa mwa amwiittanaaka.

⁵Mitekuteku sa okhwa saakikhuneela; nyooloko sa ophwata sookoopopiha.

⁶Mikhoyi sa munihiyeni sookivitikelela; matapha a okhwa aakireya.

⁷Ngwoovanimwaka kaamwiitthana Yave; kaamukhuwelela Mulukwaaka. Mpaanimwawe aahiiwa nsunaka; okhuwelawaka ohiiwa.

⁸Elapo ya vathi yaatetereya vancipalexa; mathipelo a wiirimu yaattikinyeya. Saattikinyeenre niwoko Owo aanyoonyiwa.

⁹Mphulanimwawe waakhuma mwiixi; mmwaano waakhuma mooro woolaliha. Mwa Yoowo ankhuma makhala evarelaka.

¹⁰Aahula wiirimu, anakhuruwa; mahutte ooriipihana yaari vathi wa inaawosawe.

¹¹Aangwela kerubini*, anavava; aavava vamapuphani a epheyo.

¹²Aahiikuttelela ni epiphi ni aahiikhuneela ni mahutte a epula.

¹³Ngwaarani wa okhalawawe yaavarela makhala a mooro.

¹⁴Yave aakukutteya wiirimu; nsu na Musulusulu naaruma.

¹⁵Owo aalatha nyuumpa anaamwaraxa amwiittana; aaverunyiha mipatta sootheene awoomolaka.

¹⁶Moohiihani wa Yave ni wiiselelawawe wa mphulani, wiixera wa ephareiya waahooneya ni mathipelo a elapo ya vathi yaakhala vanlakani.

¹⁷Musulu aahookola ntata, anakivarela; aakikhumiha mmaahini moowiixera.

¹⁸Aakivuluxa mwa mwiittanaaka ooweraxa; mwa awananaaka yaari ookivikana.

¹⁹Awosa yaakiwanano vanihukuni na othananawaka, mene Yave aari Ekhaviherowaaka

²⁰Aakikhumiha mwa soowoopiha; aakoopola niwoko onnakitthuna nnenesene.

²¹Yave aakipakela yeeyo niwoko na olokawaka; aakitthuvela attharihaka mweettelowaaka woohinthowa.

²²Miyo koheettela ephiro ya Yave; nkitapannye kimuhiyaka Mulukwaaka.

²³Malamulowaawe ootheene ari ohoolowaka; nkihingye ikanosawe.

²⁴Nkipahunle etthu vamaithoniwawe; kaasemba soottheka.

²⁵Yave ookitthuvela niwoko na olokawaka ni na mweettelowaaka woohinthowa.

²⁶Nyuwo muniixoonihera Oororomeleya wa yaale anroromeleya; ni Ookwanela wa yaale oohinthowa.

²⁷Muniixoonihera Ootteela wa yaale antteela, vaheera muri mwiittana a alavilavi.

²⁸Munaavuluxa oowiiyeviha, mene maitwaanyu anaaweha oowiixoona weera mwaayevihe.

²⁹Nyuwo, Yave, ti Onyaaraaka; Yave onkimwaleela mpiphini.

³⁰Mukurunimwanyu kinoowera waawina anakhotto ancipale; ni ekhavihero ya Mulukwaaka kinoowera otupha exiri.

³¹Ephiro ya Muluku ti yookwanela; masu a Yave ti oophwanela ororomela. Owo ti yoowiixaakihera wa ootheene animuroromela.

³²Khoowowo muluku mukina ahikhanle Yave; Mulukwaaka ti Mwala Mmoharu.

³³Ti Muluku onkivaha ikuru ni ontatuxa ephirowaaka yookwanela.

³⁴Onkitthimakiha woowaaluwa ntoko naahe; onkeettiha oolipeene mmanyaakoni soorakamela.

³⁵Onxuttiha matataaka owana; onkivareliha muupa wa ebronze*.

³⁶Nyuwo munkivaha yoowiixaakiheraanyu yoowina; enkilipiha ti ekhaviherowaanyu.

³⁷Mununnuwiha ephirowaaka weera inaawosaka sihiserenguwe.

³⁸Kaahaattharatthara amwiittanaaka kinaawinaxa. Nkaahokolongwe ehiphwatingwe.

³⁹Kaahaanyanyaxa ni khayaawenre weemelatho; yaamorela vathi wa inaawosaka.

⁴⁰Nyuwo mwaakivaha ikuru soowanano; mwaahaamoroxela amwiittanaaka mmanaawonimwaka.

⁴¹Mwaapakiha weera amwiittanaaka ekitthawe; kohaaphwata yaale yaakithanya

⁴²Awosa yaakhuwela evekelaka ekhavihero, mene khaariwo oowaavuluxa; yaamvekelaxa Yave, mene Owo khaawaakhunle.

⁴³Kohaaxila ntoko ntthupi na vathi; kohaavotta ntoko ittoko sa mmuseweni.

⁴⁴Mookoopola moowananiwani mulokwaaka; mookikhaliha muhooleli a miloko; muloko wahaakisuwenle wookirumeela.

⁴⁵Anamarwa ankittittimihaxa; yakiiwaru, animwiiwelela khuluwi.

⁴⁶Ootheenaawo amporora; ankhuma moolipamwaya ethukumelaka.

⁴⁷Yave onkhala ni okumi! Otthapeliwe Mwalaaka. Avuvihiwe Muluku, Mwala ni Mvuluxaaka!

⁴⁸Owo ti Muluku onkiinlela ikukuttula; Owo onlamulela miloko weera sikirumeele.

⁴⁹Ti Nyuwo munkoopola mwa amwiittanaaka; mookikhaliha vasulu wa awananaaka. Mookivuluxa mwa asilopwana oopuhera.

⁵⁰Tivawo kineeraaka kitthapele Nsinananyu, Yave, variyari wa miloko. Kinimwiipela soottottopela Nsinananyu.

⁵¹Owo oongwinihaxa mwenaawe; ommoonihera onnene oottikittheliwaawe Davide ni ekhapiraawe wa mahuku ootheene!”