Read Makhuwa-Shirima 2 Samuweli 24 Bible Online

2 Samuweli 24 - Makhuwa-Shirima bible

2 Samuweli 24

¹Isara sa Yave saahaapattelatho aYixrayeli moota wooweera Davide aapaka yeeyo yahaareerela ni muloko, aalepelaka aYixrayeli ni aYuda.

²Vano mwene aamweerela Yowabe ni asitokweene a anakhotto yaari ni yoowo: “Mwaviravire ipuumba sa aYixrayeli okhuma oDani mpaka oBerxeba ni mwaalikele muloko wootheene weera kisuwele waattawaya.”

³Vanonto Yowabe aamwaakhula mwene: “Yave Mulukwaanyu aandyeereraxe muloko vamaithoni wa mwene, pwiiyaaka! Vano, mwene pwiiyaaka muntthunelani opaka yeeyo?”

⁴Mene mwene aanyesereriha weera muloko waalikeliwe, tivawo Yowabe ni asitokweene a anakhotto yaattimunlaayawo erowaka weera yaalikele muloko wa oYixrayeli.

⁵Yaamulapuwa Yordanu, epaceraka wAroweri, mpatta wa ohitto wa esidade eri vanreyareyani; vahoolowaya enarowasa oGadi epwahereraka oYazeri.

⁶Okhuma vaavaale yaarowa oGiliyade ni elapo ya oTatimi-Hodexi ni vahoolowaya oDani-Yahani ni elapo ya oSidoni.

⁷Vanonto, yaarowa wa esidade yoolipihiwa ya oTiro ni mittetthe sootheene sa aHivi ni aKanaani. Woomalihera yaarowa mpaka oBerxeba oNegeba, elapo ya oYuda.

⁸Vahoolo wooviravira elapo yootheene, yaahokoleela oYerusaleemu, emalingheene nyeeri mithannamixexe ni mahuku miloko miili.

⁹Yowabe aamuthalihera mwene waatta wa anakhotto oYixrayeli. Vano oYixrayeli yaari asilopwana 800 000 yaawera owanano ekatana ni oYuda asilopwana 500 000.

¹⁰Aalikenleene muloko, Davide aatondolowa, anamweerela Yave: “Kootthekaxa wa yeela kipankaaka. Vano kinoodyoonttelelani weera mulevelele yoottheka ya murumeiyaanyu niwoko koopaka ya ololo.”

¹¹Davide aavenyaawe oxeexelo, Yave eera amuulumanneene mprofeeti Gadi aari namoonihera* a Davide, amweerelaka:

¹²“Murowe mwamuleele Davide weera Yave oneera ha: ‘Kinimoovahani soolakela tthaaru. Mwaase yoothanla ni weera Miyo koottaruxelenino.’”

¹³Vano Gadi aarowa wa Davide, anamweerela: “Muthanleke: iyaakha tthaaru sa etala mweelaponimwanyu, nyeeri miraru mwaatthawaka amwiittanaanyu, awosa yoottharattharakani, hoye hoye mahuku mararu a mahooxo mweelaponimwanyu. Vanonto, muupuweleke nnenesene ni mukileele yoomwaakhula Yoole okiruminghe.”

¹⁴Davide aamwaakhula: “Koothananaxa. Fataari omorela mmatatani mwa Yave ohikhanle mwa atthu, niwoko ikhararisawe siri sitokotoko.”

¹⁵Vano Yave aahaarumihela nihooxo aYixrayeli okhuma oxeexeloweene yoole mpaka emalihero ya ehuhu yoothanliwa. Vano atthu 70 000 okhuma oDani mpaka oBerxeba yaahookhwa.

¹⁶Ndyelo aatheteyaawe ntata weera aphwate oYerusaleemu, Yave aathananaxa niwoko na nthorihelonawe, anamweerela ndyelo eera aaphwate atthu: “Paahi! Waatta!” Ehuhuweene yeele ndyelo a Yave aari vanipuroni nimveeriwa* etrigu na Arawuna, muYebusi.

¹⁷Davide amoonakaru ndyelo aaphwataka atthu, aamweerela Yave: “Kitthenke ti yoomi kipakaka yoonanara. Atthu ala ari ntoko ikhondoolo paahi. Kheewo apankaaya. Kithorihiwe miyo ni emusaaka.”

¹⁸Nihuku nenenenne Gadi aarowa wa Davide, anamweerela: “Murowe ni mwamutekele altaari* Yave vanipuroni nimveeriwa* etrigu na Arawuna, muYebusi.”

¹⁹Vano Davide aarowawo ntoko Yave aamulamulenlaawe mwa Gadi.

²⁰Arawuna amoonaka mwene ni asilopwanaawe erwaaka omukumanano, aavenya, anakokhora ohoolo wa mwene, uuramihelaka ekhovaawe vathi,

²¹anamukoha: “Pwiiyaaka mwene murweenleni wa murumeiyaanyu?” Davide aamwaakhula: “Kintthuna othuma nipuro nimveeriwa* etrigu weera kimutekelewo Yave altaari* weera nihooxo nimale eriyari ya mulokwaaka.”

²²Arawuna aamweerela Davide: “Pwiiyaaka mwene mukuxeke nipuro weera mumveleelele Yave yooveleela eniyooreereleni. Kinimoovahanitho imombe wa yooveleela yoohisa. Siri vatho ntoko ikhuuni ikaruma simvareliwa muteko ni imombe soolima.”

²³Ii! Amwene! Kinimoovahani itthu sootheene iya.” Arawuna aamweerelatho: “Yave Mulukwaanyu aakhulele yooveleelaanyu!”

²⁴Wa soothesene, mwene aamwaakhula Arawuna: “Hoye, vekhaikhai, kinimoolivani wa seiya. Nkinimveleelela Yave Mulukwaaka sooveleela soohisa sihikirinke. Vano Davide aathuma nipuro nimveeriwa* etrigu ni imombe ilopwana amulivaka Arawuna ixekeli* miloko mithanu sa eparatha*.

²⁵Davide aamutekelawo Yave altaari*, anapaka sooveleela soohisa ni sa murettele. Yave aahaakhulela mavekelo mwaha wa elapo ni naamala nihooxo naaphwata oYixrayeli.