Read Makhuwa-Shirima 2 Samuweli 4 Bible Online

2 Samuweli 4 - Makhuwa-Shirima bible

2 Samuweli 4

¹Ixi-Boxeti mwaana mulopwana a Sawuli iiwakaru weera Abeneri aahookhwa oHeberoni, aatteenguwa ni aYixrayeli ootheene yaahoovaxa.

²Vano Yaakhala asilopwana eeli yaamurumeela mwaana mulopwana a Sawuli yaari asitokweene a mikuttula miili sa anamahuhula. Oopacera iitthaniwa Bahana ni anaaveeli Rekabi. Yaari anamwane a Rimoni, muBeheroti, a epuumba ya Benyamini. Vanonto esidade ya oBeheroti yaalikeleliwa oBenyamini.

³Amaki a oBeheroti yaatthawela oGitayimi ankhala weiwo ntoko anamarwa mpaka olelo.

⁴Vano Yonatani, mwaana mulopwana a Sawuli, aakhalano mwaana mulopwana aari oorakala metto. Aarino iyaakha ithanu siiwanyeyaaya ihaali oYizereyeli weera Sawuli ni Yonatani aahiiviwa. Amayawe oomphwanya yaamukuxa, enatthawano, mene yaakuveyaka hiihaale aahaamora, ni owo aahonyongowa, anarakala. Nsinanawe naari Mefiboxeti.

⁵Vanonto Rekabi ni Bahana, anamwane asilopwana a Rimoni, muBeheroti, yaavenya, erowaka wa empa ya Ixi-Boxeti, enaphiyawo ehuhu yoovihaxa nsuwa, owo eera iitthuuwaka othana.

⁶Yaavolowasa mpaani ntoko anrowela etrigu, enamuhoma nipwiipi, enatthawa.

⁷Yaavolowa mpaani owo iixaatalenleene mukwaartunimwawe. Vahoolo woomuhoma ni woomwiiva, yaamuhitasa. Ekuxaka murwaawe, yaaheettano ohiyuweene yoowo eviraka wAraba.

⁸Yaamuruuhela Davide muru wa Ixi-Boxeti, enamweerela: “Ola muru wa Ixi-Boxeti, mwaana mulopwana a Sawuli, mwiittanaanyu, aatthuna owiivani. Olelo Yave oomwiinlela ikukuttula mwenaahu ni pwiiyaahu, Sawuli ni ekhapiraaweene.”

⁹Davide aamwaakhula Rekabi ni Bahana, anamwane asilopwana a Rimoni, muBeheroti: “Kinlipela mwa Nsina na Yave, mwa Yoowo okooponle mwa sookacamiha sootheene:

¹⁰Mukina akileelakaru: ‘Sawuli ohookhwa,’ uupuwelaka weera onkiruuhela ihaali sooreera, kaamvara, kinamwiiva oZikalagi. Naari ntthuvelo na ihaali aaruuhalaawe!

¹¹Wootepaxa anamatakhala amwiivale mulopwana oohinthowa mpaani ni vakaamaniwawe. Vekhaikhai kinimwaattaruxasa kaamalamalihaka mweelaponi niwoko na ovuuviha ephomaawe!”

¹²Vano aahaalamulela anakhottwaawe ni awosa yaawiivasa ooweeli. Vahoolowaya yaakutula matataaya ni inaawosaya enatthukelela mittembosaya orattani na oHeberoni. Vaheera yaakuxa muru wa Ixi-Boxeti, enavitha munihiyeni na Abeneri oHeberoni.