Read Makhuwa-Shirima 2 Samuweli 9 Bible Online

2 Samuweli 9 - Makhuwa-Shirima bible

2 Samuweli 9

¹Davide aakoha: “Mweemusini ya Sawuli ookhala ohanle? Kintthuna omoonihera murimaaka wooreera niwoko na omusivelawaka Yonatani.”

²Vano, aakhala murumeiyi mmoha a vaate wa Sawuli, iitthaniwa Ziba. Aamwiitthana weera aphiye ohoolo wa Davide ni mwene aamukoha: “Weyo Ziba?” Owo aamwaakhula: “Ti miyo murumeiyaanyu.”

³Vanonto mwene aamukoha: “Mweemusini ya Sawuli ookhala ohanle? Kintthuna omoonihera onnene wa Muluku.” Ziba aamwaakhula mwene: “Ohaleenle ti mwaana mulopwana mmoha a Yonatani, oorakala imetto soomiili.”

⁴Mwene aamukoha: “Ori woowi?” Ziba aamwaakhula: “Ori vaate wa Makiri, mwaana mulopwana a Amiyeli oLo-Debari.”

⁵Vano mwene Davide aalamula oroweliwa oLo-Debari, vaate wa Makiri, mwaana mulopwana a Amiyeli.

⁶Vano Mefiboxeti, mwaana mulopwana a Yonatani, mwaana mulopwana a Sawuli aphiyakaru wa Davide, aahuuramihela ekhovaawe vathi. Davide aamukoha: “Mefiboxeti.” Owo aamwaakhula: “Ti yoomi, murumeiyaanyu.”

⁷Davide aamweerela: “Muhoove. Vekhaikhayini kinoowooniherani murima wooreera niwoko na waasivelawaka atithinyu Yonatani. Kinimoohokoloxerani ilapo sootheene saari sa apwiyaanyu Sawuli ni munimooca ni miyo mahuku ootheene.

⁸Mefiboxeti aahuurama, anamweerela: “Murumeiyaanyu taani weera mumpwatthe mwalapwa ookhwa ntoko miyo?”

⁹Vano mwene aamwiitthana Ziba, murumeiyi a Sawuli, anamweerela: “Koomuhokoloxera musulwaya a Sawuli apwiiyaanyu, sootheene saari sawawe ni emusaawe.

¹⁰Weyo, anamwanaawo, ni murumeiyawo olimeke emattaawe omuruuhelaka soohepha weera saatte vaate wa osuulu wa apwiyaawo. Mefiboxeti, osuulu wa pwiiyaawo, onimooca ni miyo mahuku ootheene.” Vano Ziba aakhalano anamwane asilopwana muloko naathanu ni arumeiyi miloko miili.

¹¹Ziba aamweerela mwene: “Murumeiyaanyu onoopaka sootheene pwiiyaaka mwene onlamulaawe weera apake.” Vanonto Mefiboxeti aaca ni Davide, ntoko mmoha a anamwanaawe.

¹²Mefiboxeti aakhalano mwaana mulopwana mmiravo iitthaniwa Mika ni ootheene a vaatewawe Ziba yaari arumeiyi a Mefiboxeti.

¹³Mefiboxeti aakhala oYerusaleemu niwoko aaca ni mwene. Vano aari oorakaleene imetto.