Read Makhuwa-Shirima 1 Mamwene 11 Bible Online

1 Mamwene 11 - Makhuwa-Shirima bible

1 Mamwene 11

¹Wa soothesene, mwene Salomoni aahaasivela asithiyana anamarwa ancipale omuhiya mwaana muthiyana a Farawu* — aMowabi, awAmoni, awEdomi, aSidoni ni aHiti.

²Awo yaari a miloko mwa seiye Yave aaweerenlaawe aYixrayeli: “Nyuwo muhaatheleru anamwanaaya niwoko awo animoohuluxani muttharaka milukusaya.” Hata hiiho Salomoni annanyeserera waasivela asithiyana ale.

³Aahaathela anamwane asithiyana macira mathannameeli a mamwene, nitho ikuxo macira mararu. Vano axaarawe yaamuhapuxa mphironi mwa Yave.

⁴Ehuhu uuluvalaawe Salomoni, axaarawe yaamuhuluxeriha miluku sikina ni murimaawe khawaamukhalela nthiti Yave Mulukwaawe, ntoko waaraaya murima wa atithawe Davide.

⁵Aamutthara Axeteroti, muluku muthiyana a aSidoni ni Moloki, muluku a mwiikho a awAmoni.

⁶Hiiho Salomoni aapaka yoonanara vamaithoni wa Yave ahimuttharaka Yave ni murima wootheene ntoko atithawe Davide yaamutthanraaya.

⁷Vanttumuxani mpatta ninkhuma nsuwa wa oYerusaleemu Salomoni aamutekelawo nipuro na osulu Kemoxi, muluku a mwiikho a aMowabi ni wa Moloki, muluku a mwiikho a awAmoni.

⁸Mooteene yoowo aahaapakela altaari* axaarawe ootheene anamarwa, mwa yaawosa yaahiseraayawo erubani*, eveleelelaka milukusaya.

⁹Yave aamunyoonyeriwa Salomoni, niwoko na murimaawe omuhiya Yave Muluku a aYixrayeli, mwa Yoowo iixoonihenre wa yoowo imaara piili.

¹⁰Yave aaroomukhoottiharu Salomoni otthara miluku sikina, owo khaamwiiwelenle.

¹¹Vano Yave aamweerela Salomoni: “Weenre ola okhala mweettelowaanyu muhiiwelelaka wiiraanawaka naari ikanosaka koolamulenlaakani, vekhaikhai kinoowaakhani omwene kimvahaka mmoha a murumeiyaanyu.

¹²Wa soothesene, niwoko woomusivelani Davide atithinyu nkirwa kipaka yeeyo mureene ni okumi. Kinaakha alamulaka mwaninyu mulopwana.

¹³Hata hiiho, nkirwa kaakha omwenaawe wootheene. Kinoomuhiyera epuumba emoha niwoko na omusivela Davide murumeiyaaka ni oYerusaleemu, esidade kithanlalaaka.”

¹⁴Vano Yave aampakiha Hadadi, ngwEdomi a ekhapira ya emwene ya wEdomi, mwiittana a Salomoni.

¹⁵Khalayeene, Davide awananaka omwene wa awEdomi, Yowabe, mutokweene a anakhotto a Davide aarowa waavitha anamakhwaawe, anawiiva asilopwana ootheene a wEdomi.

¹⁶Yowabe ni anakhotto a aYixrayeli ootheene yaakhalawo nyeeri mithannamosa mpaka owiiva awEdomi ootheene.

¹⁷Vaheera Hadadi, areene mmiravo paahi, aatthawela wExipitu vamoha ni arumeiyi awEdomi akina yaarumeela atithawe.

¹⁸Yaattimula oMidiyani, enarowa oParani. Vano yaakuxaka asilopwana a oParani, yaarowa wa Farawu*, mwene a wExipitu, mwa yoowo aamuvanghaawe Hadadi empa, sooca ni ematta.

¹⁹Farawu* aamwaakhela nnenesene Hadadi moota wooweera aamutheliha munnaya amwaariye, pwiyamwene Tapenesi.

²⁰Munneiye Tapenesi aamuyarano mwaana mulopwana iitthaniwa Genubati ni Tapenesi muneene aamuhuwa vaate wa mwene. Genubati aakhalano vamoha ni anamwane a Farawu*.

²¹Hadadi areene wExipitu, aahiiwa weera mwene Davide nitho Yowabe, mutokweene a anakhotto, yaahookhwa. Vano Hadadi aamweerela Farawu*: “Mukihiyeke kihokoleele elapwaaka.”

²²Farawu* aamukoha: “Yookhala enoohaleelani wootthuna nyuwo ohokoleela elapwaanyu?” Hadadi aamwaakhula: “Kheewo enkihaleela, mene mukihiye kirowe.”

²³Muluku aampakiha Rezoni, mwaana mulopwana a Eliyada, mwiittana mukina a Salomoni. Owo aatthawa wa pwiiyaawe Hadadezeri, mwene a oZoba.

²⁴Davide aaphwanteene anakhotto a oZoba, Rezoni aahaathukumanyiha asilopwana akina akina, anathatuwa mutokweene a anamavaanya. Awosa yaarowa oDamasku, enakuxa, eniitekihawo.

²⁵Rezoni aari mwiittana a aYixrayeli mmahukuni ootheene a Salomoni aaruuhelaka milattu sincipale ohiya iye sa Hadadi. Rezoni aalamula awArami anakhala mwiittana a aYixrayeli.

²⁶Yerobowami, mwaana mulopwana a Nebati, aamvaanelelatho mwene. Aari murumeiyi mmoha a mwene, ngwEfrayimi oZereda ni amayawe yaari naamukhweli iitthaniwa Zeruwa.

²⁷Ti ha owo aamurukunuwenlaawe mwene: Salomoni aateka oMilo* anakhuneela mulakwaaya vaxirini ya esidade ya atithawe Davide.

²⁸Vano Yerobowami aari mulopwana ooweraxa ni Salomoni oonnaawe weera annavara mutekwaawe nnenese, aamukhaliha mutokweene a ootheene yaavara miteko sooviha yaari a epuumba ya Yoseefe.

²⁹Ehuhuweene yeele Yerobowami aavenya oYerusaleemu ni Ahiya, mprofeeti a oXilo, aamukumanano mphironi awanreene mukaandyo munyowani.

³⁰Ooweeli yaari meekhaaya mutuphini ni Ahiya aakuxa mukaandyo munyowani aawanraawe, anaahula mipatta muloko ni miili.

³¹Vano aamweerela Yerobowami: “Mwiittottele mipatta muloko, niwoko Yave Muluku a aYixrayeli eenre ha: ‘Moone, kinoomwaakha omwene Salomoni koovahakani nyuwo ipuumba muloko.

³²Vaheera niwoko na omusivela murumeiyaaka Davide ni esidade ya oYerusaleemu mwa yeeyo kithanlalaaka variyari wa ipuumba sootheene sa aYixrayeli, Salomoni onoohalano epuumba emoha.

³³Kinoopaka yeeyo niwoko na okihiyawaya, emulapaka Axeteroti, muluku muthiyana a aSidoni, Kemoxi, muluku a aMowabe ni Moleki, muluku a awAmoni. Khayeentte mphironimwaka, naari khaapanke yeeyo kintthunaaka, hata khayiiwelenle ikanosaka ni malamulowaaka ntoko aapankaawe Davide, atithawe Salomoni.

³⁴Vaheera nkirwa kaakha omwene wootheene mmatatani mwa Salomoni. Koomukhaliha mwene wa mahuku ootheene a okumaawe niwoko na omusivelawaka murumeiyaaka Davide, mwa yoowo kimuthanlalaaka ni iiwelenle malamulowaaka ni ikanosaka.

³⁵Kinoomwaakha omwene mwaniye ni wa nyuwo Yerobowami kinimoovahani ipuumba muloko.

³⁶Kinoomvaha mwaniye epuumba emoha weera murumeiyaaka Davide akhalane mahuku ootheene namarandela vahiceni ya emwene oYerusaleemu, esidade kithanlalaaka ohelawo Nsinanaka.

³⁷Vaheera mwaha wa nyuwo — kinimookhalihani mwene a aYixrayeli ni munoolamula sootheene muntthunaanyu.

³⁸Mwapaka yeeyo kineeraaka koolamuleleni ni mweetta mphironimwaka mwemmo Miyo kintthunaaka mwiiwelelaka ikanosaka ni malamulowaaka ntoko aapankaawe murumeiyaaka Davide, kinookhala ni nyuwo. Kinimoovahani omwene wa mahuku ootheene ntoko kaampakenlaaka Davide ni kinimoovahanitho oYixrayeli.

³⁹Kinooyeviha ekhapira ya Davide niwoko na yeeyo, mene khoohiyono wa mahuku ootheene.’ ”

⁴⁰Salomoni aaheerera omwiiva Yerobowami, mene owo aatthawela wExipitu, wa mwene Xixaki, anakhalawo mpaka okhwa wa Salomoni.

⁴¹Vano, mwaha wa sookhumelela sikina iyo sa olamula wa Salomoni — sootheene aapankaawe ni miruku aaraaweno — silempwale mulivuruni ya nyaha sa Salomoni.

⁴²Salomoni aahaalamula aYixrayeli oYerusaleemu wa iyaakha miloko mixexe.

⁴³Aahookhwa ni aavithiwa musidadeni ya atithawe Davide. Vanonto Rehobowami, mwanawe mulopwana ti aamurandenle.