Read Makhuwa-Shirima 1 Mamwene 15 Bible Online

1 Mamwene 15 - Makhuwa-Shirima bible

1 Mamwene 15

¹Vayaakhani yanaamuloko niithannatthaaru moolamulani mwa Yerobowami, mwaana mulopwana a Nebati, Abiya aathatuwa mwene a oYuda,

²analamula oYerusaleemu iyaakha tthaaru. Nsina na amayawe naari Mahaka, mwaana muthiyana a Abisalomi.

³Aapaka soottheka sootheene asitithawe yaapankaaya. Murimaawe khawaaroromeleiye wa Yave Mulukwaawe, ntoko waraaya murima wa nikholonawe Davide.

⁴Hata hiiho, niwoko na omusivelawawe Davide Yave Mulukwaawe aamvaha waara wa oYerusaleemu amukhalihaka mwaana mulopwana weera amurandele, alipihaka oYerusaleemu.

⁵Vano Davide aapaka yeeyo eri yooreera vamaithoni wa Yave, aniiwelela malamulo ootheene a Yave mahuku ootheene a okumaawe, ohikhanle paahi mwaha wa Uriya, muHiti.

⁶Waakhala owanawana variyari wa Rehobowami ni Yerobowami mmahukuni ootheene a okumaawe Abiya.

⁷Mwaha wa sookhumelela sikina sa olamula wa Abiya — sootheene aapankaawe — silempwale mulivuruni ya nyaha sa mamwene a oYuda. Waakhalatho owanawana variyari wa Abiya ni Yerobowami.

⁸Abiya aahookhwa, anavithiwa ni makholowaawe musidadeni ya Davide. Vano mwanawe mulopwana Asa, ti aamurandenle.

⁹Vayaakhani yanaamiloko miili moolamulani mwa Yerobowami, mwene a oYixrayeli, Asa aathatuwa mwene a oYuda,

¹⁰analamula oYerusaleemu wa iyaakha miloko mixexe ni eyaakha emoha. Nsina na amunne naari Mahaka, mwaana muthiyana a Abisalomi.

¹¹Asa aapaka yeeyo eri yooreera vamaithoni wa Yave, ntoko nikholonawe Davide naapankaaya.

¹²Aawoomola mapuuta asilopwana a miluku sikina mweelaponi ni aaphwata miluku soolokottha atithawe yaapankaaya.

¹³Mpaka aalamula weera amunne Mahaka ehisuweliwetho ntoko naangolo pwiyamwene, niwoko awo yaampakela mwiri wootteeliheriwa Axera wa mwiikho. Asa aathikila mwiri ole, anahisa vanreyareyani na oKideroni.

¹⁴Yaaroohimalamalihiwaru mapuro ootteela a miluku sikina mmattumuxani, murimaawe Asa waaroromeleya wa Yave mookumunimwawe wootheene.

¹⁵Aaruuhela Mpaani mwa Yave eyuuma yoorikaxa, eparatha* ni ikaruma aatteelinghaawe owo ni atithawe.

¹⁶Waakhala owanawana variyari wa Asa ni Bahaxa, mwene a oYixrayeli moolamulanimwaya wootheene.

¹⁷Bahaxa aarowa owanano oYuda analipiha oRama weera ahikhale anaavolowe naari anaakhume mweelaponi mwa Asa, mwene a oYuda.

¹⁸Vano Asa aakuxa eyuuma yoorikaxa ni eparatha* yootheene yaahanle mukwartuni wa mihakhu sa Empa ya Yave nitho wa empaawe ya emwene. Sootheene iye aawinnyerera asitokweenaawe, anarumihela wa Beni-Hadadi, mwaana mulopwana a Taberimoni, mwaana mulopwana a Hezeyoni, mwene a awArami aalamula oDamasku.

¹⁹Owo aamweerela: “Okhaleke wiiwanana variyariwahu, ntoko waaraaya variyari wa asitithihu. Moone, kinoorumihelani soovaha sa eyuuma yoorikaxa ni eparatha*. Vano mmalihe wiiwananawanyu ni Bahaxa, mwene a oYixrayeli weera owo akhume mweelaponimwaka.”

²⁰Beni-Hadadi aahaakhulela, anaarumiha asitokweene a anakhottwaawe weera yawaneno mittetthe sa oYixrayeli. Yaakuxa wIyoni, oDani, wAbeli-Beti-Mahaka ni elapo yootheene ya oKineroti nitho oNafitali.

²¹Bahaxa iiwakaru yeeyo, aahiya oteka ixiri sa oRama, anahokoleela oTireza.

²²Vanonto, mwene Asa aahaathukumanyiha atthu ootheene a oYuda — khaawo aahanle — ni awosa yaavenxa oRama maluku ni itthaabwa Bahaxa aavarelaawe muteko. Mwene Asa aavarela muteko itthu iye weera alipihe oGeba, mweelaponi ya oBenyamini, nitho oMizepa.

²³Mwaha wa sookhumelela sikina sa olamula wa Asa — sootheene aapankaawe ni isidade aatenkaawe — silempwale mulivuruni ya nyaha sa mamwene a oYuda. Ngwuuluvalani, Asa aahaawa ni eretta ya inaawo.

²⁴Asa aahookhwa, anavithiwa ni makholowaawe musidadeni ya Davide. Mwanawe mulopwana Yehoxafati ti aamurandenle.

²⁵Vayaakhani yanaaveeli moolamulani mwa Asa, mwene a oYuda, Nadabi, mwaana mulopwana a Yerobowami, aathatuwa mwene a oYixrayeli. Aalamula oYixrayeli iyaakha piili.

²⁶Aapaka yoonanara vamaithoni wa Yave attharaka soottheka sa atithawe aatthekihaka aYixrayeli.

²⁷Bahaxa, mwaana mulopwana a Ahiya a epuumba ya Isakari, aamvaanelela, anamwiivela Nadabi oGibetoni, muttetthe wa aFilisti, owo ni aYixrayeli ewanakawo.

²⁸Bahaxa aamwiivale Nadabi vayaakhani yanaararu moolamulani mwa Asa, mwene a oYuda, anamurandela.

²⁹Apacerakaru olamula, aawiiva ootheene a emusi ya Yerobowami. Yaawo yaari a Yerobowami, khaamuhingyeru mukumi. Aahaaphwata ootheene ntoko Yave aahimmaawe mwa murumeiyaawe Ahiya, muXiloni.

³⁰Eyo yeereenle niwoko na soottheka Yerobowami aapankaawe aatthekihakatho aYixrayeli. Hiiho aatannya isara sa Yave, Muluku a aYixrayeli.

³¹Mwaha wa sookhumelela sikina sa olamula wa Nadabi — sootheene aapankaawe — silempwale mulivuruni ya nyaha sa mamwene a oYixrayeli.

³²Waakhala owanawana variyari wa Asa ni Bahaxa, mwene a oYixrayeli, moolamulanimwaya wootheene.

³³Vayaakhani yanaararu moolamulani mwa Asa, mwene a oYuda, Bahaxa, mwaana mulopwana a Ahiya, aathatuwa mwene a oYixrayeli oTireza, analamula iyaakha miloko miili ni iyaakha ixexe.

³⁴Aapaka yoonanara vamaithoni wa Yave attharaka soottheka sa Yerobowami, mwa seiye Yerobowami aatthekihalaaweno aYixrayeli.