Read Makhuwa-Shirima 1 Mamwene 16 Bible Online

1 Mamwene 16 - Makhuwa-Shirima bible

1 Mamwene 16

¹Masu a Yave mwaha wa Bahaxa yaamurweela Yehu, mwaana mulopwana a Hanani:

²“Kohootathani ntthupi, kookhalihakani muhooleli a mulokwaaka aYixrayeli, mene mootthara ephiro ya Yerobowami, munatthekiha mulokwaaka mutannyaka isarasaka niwoko na sootthekasaya.

³Tivawo kineeraaka kimphwate Bahaxa ni ekhapiraawe kipakelaka emusaawe yeeyo kaapakenlaaka emusi ya Yerobowami, mwaana mulopwana a Nebati.

⁴Yaawo ari a Bahaxa anookhuuriwa ni alapwa eniikhwele musidade ni ipalame sa wiirimu sinimwaaca, eniikhwele mutuphini.”

⁵Mwaha wa sookhumelela sikina sa olamula wa Bahaxa — sootheene aapankaawe — silempwale mulivuruni ya nyaha sa mamwene a oYixrayeli.

⁶Bahaxa aahookhwa, anavithiwa ni makholowaawe oTireza. Mwanawe mulopwana Ela ti aamurandenle.

⁷Masu a Yave mwaha wa Bahaxa ni emusaawe yaarwiiye mwa mprofeeti Yehu, mwaana mulopwana a Hanani niwoko na soonanara aapankaawe vamaithoni wa Yave. Hiiho aatannya isarasawe Yave athatuwaka ntoko emusi ya Yerobowami, nitho niwoko na ophwatawawe emusi ya Yerobowami.

⁸Vayaakhani yanaamiloko miili ni iyaakha ithannamosa moolamulani mwa Asa, mwene a oYuda, Ela, mwaana mulopwana a Bahaxa, aathatuwa mwene a oYixrayeli. Aalamula oTireza iyaakha piili.

⁹Mutokweenaawe mmoha iitthaniwa Zinri aalamula eriyari ya ikaarosawe sa ikavalu* sa ekhotto, aamvaanelela Ela. Ehuhuweene yeele Ela aari oTireza oohapaliweene mpaani mwa Areza, mutokweene a empa ya emwene ya oTireza.

¹⁰Vayaakhani yanaamiloko miili ni iyaakha ithannapiili moolamulani mwa Asa, mwene a oYuda, Zinri aavolowa, anammana, anamwiiva Ela, anamurandela.

¹¹Apacerakaru olamula akilaathiyeene vahiceni ya emwene, aawiiva ootheene a emusi ya Bahaxa. Khaamuurenleru naari mmoha a wuulopwanani, akhalaka mmusi hoye hoye nthamwene.

¹²Hiiho Zinri aaphwata emusi yootheene ya Bahaxa, ntoko Yave aahimmaawe mwa mprofeeti Yehu, mwaha wa Bahaxa.

¹³Yeereenle niwoko na soottheka sootheene Bahaxa ni mwanawe mulopwana Ela yaapankaaya yaatthekihaka aYixrayeli. Hiiho yaatannya isara sa Yave, Muluku a aYixrayeli niwoko na milukusaya soolokottha soohimuteko.

¹⁴Mwaha wa sookhumelela sikina sa olamula wa Ela — sootheene aapankaawe — silempwale mulivuruni ya nyaha sa mamwene a oYixrayeli.

¹⁵Vayaakhani yanaamiloko miili ni iyaakha ithannapiili moolamulani mwa Asa, mwene a oYuda, Zinri aalamula oTireza mahuku mathannameeli. Anakhotto yaakonenle vakhiviru wa oGibetoni, muttetthe mmoha wa aFilisti.

¹⁶aYixrayeli yaakonenlewo, yiiwakaru weera Zinri aamvaanelela mwene, amwiivaka, nihuku nenenenne waakonelingwe iwe, yaamvara omwe Omeri, mutokweene a anakhotto.

¹⁷Vano Omeri ni anakhottwaawe ootheene yaari ni yoowo aavenya oGibetoni, anawanano oTireza.

¹⁸Zinri oonakaru weera esidade yookuxiwa, aatthawela munipuroni noolipaxa na empa ya emwene, aniihiseramo, anakhwa.

¹⁹Yeereenle niwoko na soottheka aapankaawe, apakaka soonanara vamaithoni wa Yave ni eettaka mphironi mwa Yerobowami ni soottheka aapankaawe aatthekihakatho aYixrayeli.

²⁰Mwaha wa sookhumelela sikina sa olamula wa Zinri — sootheene aapankaawe ni ovaanelelawawe — silempwale mulivuruni ya nyaha sa mamwene a oYixrayeli.

²¹Vano atthu a oYixrayeli yaakawanyeya mipatta miili. Mpatta mmoha waatthuna weera Tibeni, mwaana mulopwana a Ginati avariwe omwene ni mukinoowo waamutthuna Omeri.

²²Wa soothesene, yaale yaamutthuna Omeri yaalipaxa waapwaha anamatthara a Tibeni, mwaana mulopwana a Ginati. Tibeni aahookhwa ni Omeri aavariwa omwene.

²³Vayaakhani yanaamiloko miraru ni eyaakha emoha sa moolamulani mwa Asa, mwene a oYuda, Omeri aathatuwa mwene a oYixrayeli. Aalamula iyaakha muloko ni piili — iyaakha ithannamosa iye oTireza.

²⁴Aathuma nttumuxa na oSamariya wa Xemeri, amulivaka italentu* piili sa eparatha*, anatekawo esidade vanttumuxani, mwa yeeyo aattenghaawe Samariya, niwoko na Xemeri, nsina na muneene a khalayi.

²⁵Wa soothesene, Omeri aapaka soonanara vamaithoni wa Yave waapwaha yaawo yaalamula owo ahinaaye.

²⁶Aaheetta mphironi mwa Yerobowami, mwaana mulopwana a Nebati, apakaka sootthekasawe mwa seiye aatthekihalaaweno aYixrayeli. Hiiho aatannya isara sa Yave, Muluku a aYixrayeli niwoko na milukusaya soolokottha soohimuteko.

²⁷Mwaha wa sookhumelela sikina sa olamula wa Omeri — sootheene aapankaawe ni aawenraawe — silempwale mulivuruni ya nyaha sa mamwene a oYixrayeli.

²⁸Omeri aahookhwa, anavithiwa ni makholowaawe oSamariya. Mwanawe mulopwana, Ahabi, ti aamurandenle.

²⁹Vayaakhani yanaamiloko miraru ni iyaakha ithannatthaaru moolamulani mwa Asa, mwene a oYuda, Ahabi, mwaana mulopwana a Omeri aathatuwa mwene a oYixrayeli. Aalamula oSamariya iyaakha miloko miili ni iyaakha piili.

³⁰Ahabi, mwaana mulopwana a Omeri, aapaka soonanara vamaithoni wa Yave ompwaha akhalaru mutthu aalamula owo ahinaaye.

³¹Aatthara soottheka sa Yerobowami ni wootepaxa aamuthelatho Yezebeli, mwaana muthiyana a Etibahali, mwene a aSidoni, anapacera omurumeela ni omulapa Bahali*.

³²Aamutekela Bahali* altaari* mpaani mwa Bahali* mwa yeeyo aatenkaawe oSamariya.

³³Ahabi aaheemexatho mwiri wootteeliheriwa atannyaka isara sa Yave, Muluku a oYixrayeli waapwaha mamwene ootheene a oYixrayeli yaalamula owo ahinaaye.

³⁴Mweehuhuni ya Ahabi, Hiyeli a oBeteli aarasela oYeriko. Apakaka mathipelowaaya, ntthaaranawe Abirami naahookhwa, ni araselaka maselaaya, etthaakwaawe Segubi yaahookhwatho, ntoko Yave aahimalaawe mwa Yoxuwa, mwaana mulopwana a Nuni.