Read Makhuwa-Shirima 1 Mamwene 18 Bible Online

1 Mamwene 18 - Makhuwa-Shirima bible

1 Mamwene 18

¹Eviraleene ehuhu yincipale, vayaakhani yanaararu ehirupaka epula Yave aamweerela Eliya: “Murowe, mwiixoonihere wa Ahabi ni Miyo kinoorupiha epula mweelaponi.”

²Hiiho Eliya aarowa wiixoonihera wa Ahabi. Vano yeenre etala yaatepaxa oSamariya

³Ahabi aamwiitthana Obadiya aari namawehaweha a empa ya emwene. Vano Obadiya aamuroromela Yave ni nthiti.

⁴Yezebeli eera awiivaka maprofeeti a Yave. Obadiya aahaathukumanyiha maprofeeti ncira, anaavitha mmakhukuni meeli — miloko mithanu wa khula nikhuku, annaavaha yooca ni maahi.

⁵Emaara emoha Ahabi aamweerela Obadiya: “Nrowe mphattuwelani moothemwene ni mureyareyani mwa elapo. Apaale nnoophwanya malaxi weera nacihe ikavalu* ni abuuru. Hiiho khoontthuneya omwiiva mwaamunama.”

⁶Vano yaakawana elapo yaarowaaya oviravira — Ahabi aarongwe mpattaawe ni Obadiya mpatta mukina.

⁷Obadiya eettaka hiihaale, Eliya aamukumanano ni Obadiya aamusuwela, anuuramela vathi amukohaka: “Ti nyeenyuweene pwiiyaaka Eliya?”

⁸Eliya aamwaakhuala: “Aani, murowe, mwamuleele pwiiyaanyu: ‘Eliya ori va.’”

⁹Obadiya aamukoha: “Kootthekenleni eheeni wookiiviha wa Ahabi?

¹⁰Kinlipela mwa Nsina na Yave Mulukwaanyu weera pwiiyaaka aahaarumihela atthu wa khula muloko ni omwene weera ewaasaaseni. Khula muloko ni omwene waahimaaya weera nyuwo khamwaariwowo, owo aanyesereriha olipela weera khayaawenre woophwanyani.

¹¹Ni vano munkilamulela orowa wa yoowo kimweerelaka: ‘Eliya ori va!’

¹²Nkisuwenle woowi Munepa wa Yave oneeraaya woorongheni miyo koohiyakani. Miyo karowa omuleela yeeyo Ahabi ni owo aahoophwanyani, onookiiva. Miyo kiri murumeiyaanyu kinnamutthapela Yave okhuma emirawaaka.

¹³Pwiiyaaka weeraka khamwiiwale yeeyo kaapankaaka Yezebeli awiivaka maprofeeti a Yave? Kaahaavitha maprofeeti ncira a Yave mmakukhuni meeli, miloko mithanu wa khula nikhuku, kaavahaka yooca ni maahi.

¹⁴Ni vano munkilamulela orowa wa pwiiyaaka omuleela: ‘Eliya ori va.’ Owo onookiiva!”

¹⁵Eliya aamwaakhula: “Kinlipela mwa Nsina na Yave a ikuru sootheene, mwa Yoowo kinimurumeelaaka, vekhaikhai olelo kinimwiixoonihera wa Ahabi.”

¹⁶Vanonto Obadiya aarowa omukumanano Ahabi, anamuleela, ni Ahabi aarowa omukumanano Eliya.

¹⁷Amoonakaru Eliya, aamweerela: “Ti weyo ongwuungurimiha aYixrayeli?”

¹⁸Eliya aamwaakhula: “Nkihiyono miyo kingwuungurumiha aYixrayeli, mene ti nyuwo ni emusi ya atithinyu. Moohiya malamulo a Yave muttharaka miluku siniitthaniwa aBahali*.”

¹⁹“Vano mwawiitthane aYixrayeli a elapo yootheene weera nakumane vamwaako Karimeli. Mwaarwaaneke maprofeeti macira maxexe ni miloko mithanu a Bahali* ni maprofeeti macira maxexe a Axera, mwa yaawo anca vamoha ni Yezebeli.”

²⁰Vano Ahabi aahaalattula aYixrayeli ootheene anaathukumanyiha maprofeeti vamwaako Karimeli.

²¹Eliya aaheemela ohoolo wa muloko eeraka: “Heeni munghovelaanyu othanla? Yave aari Muluku, muntthareke; vaheera Bahali* ari Muluku, vano muntthareke!” Wa soothesene, muloko waari emaalelo.

²²Vanonto Eliya aaheera: “Variyari wa maprofeeti a Yave kihanle meekhaaka, mene Bahali* orino maprofeeti macira maxexe ni miloko mithanu.

²³Mwaaruuhe aximombe alopwana eeli. Maprofeeti ala ethanleke emoha ni ethikileleke yiikaathiki vasulu ikhuuni, mene ehipattihe mooro. Miyo kinoomureherera mwaamombe mukina vasulu ikhuuni ni nkipattihawotho mooro.

²⁴Vano nyuwosa mwiitthane nsina na mulukwaanyu ni miyo kinimwiitthana Nsina na Yave. Muluku owo anaakhule ni mooro — Muluku a ekhaikhai ti Yoowo.” Vano ootheene yaaheera: “Nohaakhulela.”

²⁵Eliya aaweerela maprofeeti a Bahali*: “Munthanle mwaamombe mmoha ni mukhale oopacera omureherera mweenre mukhala ancipale. Mwiitthane nsina na mulukwaanyu, mene muhipattihe mooro.”

²⁶Vano yaamukuxa mwaamombe yaavahiwaaya, enamureherera. Vanonto yanniitthana nsina na Bahali* okhuma oxeexelo mpaka othana. Yannakhuwela: “Ii! Bahali*, munaakhuleke.” Yaahiina yaarukureeraka altaari* yaapankaaya, mene khayaakhuliwaru.

²⁷Othana Eliya aapacera waatthebwa aweerelaka: “Mwaandyeerere okhuwelawanyu! Owo ori Muluku keera? Apaale onootthokelela, hoye hoye yookhala omvaraawe naari eettaka mmukwahani! Apaale onookona ni ontthuneya omuvenxa.”

²⁸Hiiho yannatepa okhuwela ni yiipophasaka ni ikatana ni mavaka, ntoko yaakhovelenlaaya, mpaka orapa ephome.

²⁹Nsuwa naathetemanaaya, yaapwaherera okhuwelawaya mpaka ehuhu ya yooveleela ya ohiyu. Wa soothesene, khayaakhuliwa hata khawiiwanyeyaru oruma.

³⁰Vanonto Eliya aaweerela atthu ootheene: “Mukaattameleke.” Awosa yaamwaattamela emurukureenreene ni owo aahaarasela altaari* a Yave yaaphwatingwe.

³¹Aakuxa maluku muloko ni meeli — nimoha wa khula epuumba ya aYixrayeli ya ekhapira ya Yakobe, mwa yoowo Yave aamweerenlaawe: “Nsinananyu nnikhale Yixrayeli.”

³²Aahaateka altaari* ni maluku mwa Nsina na Yave, anathipa nlitti aarukureerihaka altaari* wookwana iliitru* miloko miili.

³³Vahoolowaya aahiikaathi ikhuuni valtaarini*, anamuthikilela mwaamombe, anamwiikaathi vakhuunini, aweerelaka: “Musarihe maahi nyaapu mixexe ni muyeehere wa yooveleela ni ikhuuni.”

³⁴Owo aahaalamulela: “Muphitele.” Ni awosa yaaphitela. Aahaalamulelatho: “Mpake yeeyo emaara yanaararu.” Ni yaapaka emaara yanaararu.

³⁵Maahi yannakhwalalela valtaarini* esareyaka mulittini.

³⁶Mweehuhuni ya yooveleela mprofeeti Eliya aaheemela, anavekela ohoolo wa altaari*: “Ii! Yave, Muluku a Abrahaamu, Isaki ni Yakobe, ootheene olelo esuwelihiweke weera Nyuwo muri Muluku a oYixrayeli ni weera miyo ti murumeiyaanyu kimpaka sootthene iya niwoko na nlamulonanyu.

³⁷Mukaakhuleke Yave, mukaakhuleke, weera atthu ala esuwele weera Nyuwo, Yave, ti Muluku ni mpakihe weera mirimasaya sihokoleele wa Nyuwo.”

³⁸Vano mooro wa Yave waamora, onahisa yooveleela, ikhuuni, maluku ni mpaka etthaya, owelelihakatho maahi yaari mulittini.

³⁹Muloko woonakaru yeeyo, waahuuramihela ikhovesaya vathi okhuwelaka: “Yave ti Muluku, Yave ti Muluku!”

⁴⁰Vano Eliya aahaalamulela: “Mwaatthukase maprofeeti a Bahali*! Muhimuhiyeru naari mmoha atthawaka!” Awosa yaahaatthukasa ni Eliya aahaarongha vanreyareyani na oKixoni anawiivelawo.

⁴¹Vano Eilya aamweerela Ahabi: “Murowe, mwace ni mwawure niwoko kinniiwa oruma wa epula yincipale.”

⁴²Hiiho Ahabi aarowa oca ni owura, vaheera Eliya aawela vasulu vamwaako Karimeli anakokhora mpaka vathi ni ekhovaawe aniipapiha ni makutha.

⁴³Owo aamulamulela murumeiyaawe: “Orowe wawehe mpatta wa ophareiya.” Aarowa, anaweha, anamweerela Eliya: “Kheewo eriwo.” Eliya aamuhokoloxera oweha imaara ithannapiili.

⁴⁴Emaara yanaathannapiili murumeiyi aamuthalihera: “Kohoona mwaanihutte ntatanene nikhumaka mphareiya.” Vano Eliya aamweerela: “Oroweke wamuleele Ahabi: ‘Mureherere ekaarwaanyu ya ekavalu* ni muhokoleele owaani weera epula ehookutteleleni.’”

⁴⁵Eyo eri hiiho, erimu yaariipihana enapacera woopa epheyo etokotoko. Vanonto Ahabi aarowa woowaakuveya oYezeriyeli.

⁴⁶Ikuru sa Yave saamukhuruwela Eliya ni, aphitelenleene mukaandyowaawe ni laamba, aatthimaka ohoolo wa Ahabi ephiroweneeyo mpaka oYezeriyeli.