Read Makhuwa-Shirima 1 Mamwene 19 Bible Online

1 Mamwene 19 - Makhuwa-Shirima bible

1 Mamwene 19

¹Vano Ahabi aamuthalihera Yezebeli sootheene seiye Eliya aapankaawe ni moota aawiivalaawe maprofeeti ootheene ni ekatana.

²Tivawo Yezebeli aamurumihenlaawe Eliya namutthenga, amweerelaka: “Miluku sikittaruxaxe omaalo ehuhuweene yeela kaahipakela okumaanyu yeeyo mwaapakenlaanyu maprofeeti.”

³Eliya aahoova, anatthawa uurelaka okumaawe. Aphiyakaru oBerxeba, elapo ya oYuda, aamuhiyawo murumeiyaawe.

⁴Owo aavolowa munikareni eettaka wa nihuku nenenno. Aaphiya wa mwiri mmoha, anakilaathi vathi avekelaka weera akhwe. Aamweerela Yave: “Ii Yave, wookwana! Mukuxe okumaaka niwoko nkihiyono ooreerela waapwaha makholowaaka.”

⁵Vano aahiixaatalela vathi wa mwiri, anakona. Wootutuxereya ndyelo aamutava, anamweerela: “Mvenye, muce.”

⁶Aaweha mukhwipimwawe, anoona wamuruwawe eboolu yoowooxiwa wamakhalani oovihaxa, nitho mwaapu wa maahi. Aahooca, anawura, anakonatho.

⁷Ndyelo aahokolowatho, anamutava, anamweerela: “Mvenye, muceeke, niwoko mwaahica mukwahaanyu onimootepelani.”

⁸Aavenya, anaca, anawura. Oolipihiweene ni yooca, aaheetta othana miloko mixexe ni ohiyu miloko mixexe mpaka aaphiya oHorebi, mwaako wa Muluku.

⁹Aavolowawo munikhukuni, anavirihawo ohiyu. Vano Yave aamukoha: “Eliya, mumpakani wenno?”

¹⁰Aamwaakhula: “Kinnamurumeela ni nthiti Yave, Muluku a ikuru sootheene. aYixrayeli aakhootta wiiraanawanyu ni ahaapwexa altaaraanyu*, ewiivaka maprofeetaanyu ni ekatana. Vano ti miyo paahi kihanle ni awo anaasaasa okiivatho.”

¹¹Yave aamweerela: Mukhume ni mweemele vamwaako vamaithoni wa Yave, niwoko Yave onoovira. Vanonto yaahoopaxa epheyo enamwalamwaxa nyaako enyaanyaka nyala ohoolo wa Yave, mene Yave khaakhanle mpheyoni. Vahoolo wa epheyo waakhala otetereya, mene Yave khaakhanle mootetereyani.

¹²Vahoolo wa otetereya waakhala mooro, mene Yave khaakhanle mmooroni. Ni vahoolo wa mooro yaakhala epheyo yoomaaleleya ni yooriirela.

¹³Eliya iiwakaru yeeyo, aahiikhuneela ekhovaawe ni mukaandyo, anavenya, eemelaka vamulako wa nikhuku. Vano aahiiwa nsu: “Mumpakani wenno, Eliya?”

¹⁴Aamwaakhula: “Kinnamurumeela ni nthiti Yave, Muluku a ikuru sootheene. aYixrayeli aakhootta wiiraanawanyu ni ahaapwexa altaaraanyu*, ewiivaka maprofeetaanyu ni ekatana. Vano ti miyo paahi kinhanle ni awo anaasaasa okiivatho.”

¹⁵Yave aamweerela: “Muhokoleele ephiro murweenlaanyu ni murowe onikareni na oDamasku. Mwaaphiyakawo, mwamuttikitthele Hazayeli ntoko mwene a awArami.

¹⁶Mwamuttikittheletho Yehu, mwaana mulopwana a Nimexi ntoko mwene a aYixrayeli ni Elixa, mwaana mulopwana a Xafati wAbeli-Mehola ntoko namarandelaanyu.

¹⁷Yehu anaawiive ootheene eniyoopowe ekatana ya Hazayeli ni Elixa anaawiive ootheene eniyoopowe ekatana ya Yehu.

¹⁸Kohaakhalanotho atthu akina macira miloko mithannamiili oYixrayeli, mwa yaawo yahaakokhorenle ohoolo wa Bahali* hata yaahaambeence.”

¹⁹Vano Eliya aattimulawo, anamphwanya Elixa, mwaana mulopwana a Xafati. Owo eera alimaka ni imombe miloko miili niixexe sootthukiwa piili-piili ni owo muneenaawe eettiha sanaamuloko ni piili. Eliya aamwaattamela, anamuthateliha mukaandyowaawe.

²⁰Elixa aahiya imombe, anamutthimakela Eliya, amweerelaka: “Mukihiye kaalaxera atithaka ni amayaka ni ebeecu ni vano kinimoohoolani.” Eliya aamwaakhula: “Muroweke. Koopankeni eheeni?”

²¹Vano Elixa aahokolowa, anakuxa imombesawe, aniiva, atetheerelaka ikaruma aalimanaaweno. Aahaapeya enama, anaavaha atthu yaari vaavaale ni awosa yaakhuura. Vahoolowaya aapwaha vamoha ni Eliya, anamurumeela.