Read Makhuwa-Shirima 1 Mamwene 21 Bible Online

1 Mamwene 21 - Makhuwa-Shirima bible

1 Mamwene 21

¹Vano aakhala mulopwana iitthaniwa Naboti, muYizereyeli, aarino ematta ya iwuuva* oYizereyeli, vakhiviru wa empa ya Ahabi, mwene a oSamariya.

²Ahabi aamweerela Naboti: “Okivahe emattaawo ya iwuuva* weera kipakele nttimbe yeenre ekhuveela empaaka ya emwene. Vanipuroniwaya, kinimoovaha ematta ekina yooreerela, hoye hoye, watthuna, kinimooliva musurukhu woophwanela.”

³Wa soothesene, Naboti aamwaakhula: “Mwa Nsina na Yave — nkingwera woovahani yoohiyeriwa ya makholowaaka.”

⁴Hiiho Ahabi aarowa owaani oonyoonyiweene ni ooriipiweene murima niwoko Naboti aamweerenlaawe: “Nkingwera woovahani yoohiyeriwa ya makholowaaka.” Aahiixaatalela vabeettinivawe atthunkeene eyano, ahuluwenleene okina, akhoottaka oca.

⁵Mwaarawe Yezebeli aavolowa, anamukoha: “Munyoonyeringwe heeni? Muhincelani?”

⁶Owo aamwaakhula: “Niwoko kaamweerela Naboti muYizereyeli: ‘Okithumihere emattaawo ya iwuuva* hoye hoye, watthuna kinimoovaha ematta ya iwuuva* ekina kaakakhanyihaka ni yeela.’ Vaheera aakeerela: ‘Nkingwera woovahani emattaaka ya iwuuva*.’”

⁷Mwaarawe Yezebeli aamweerela: “Nyuwo muri mwene a oYixrayeli keera? Mvenye, muceeke ni muhakalale. Kinoowinnyererani ematta ya iwuuva* ya Naboti, muYizereyeli.”

⁸Vano Yezebeli aalepa ikaratta mwa nsina na Ahabi, aattittelano munela woottittelano a mwene, anaarumihela asitokweene ni maneethi a esidade ya Naboti vamoha ni yoowo.

⁹Mukarattani mmwe aalepa: “Mulaleiyeke nihuku na otthuka ni munkilaathihe Naboti vanipuroni noottittimiheyaxa variyari wa atthu.

¹⁰Vano mwaakilaathihe anamoona oowootha eeli mukhwipimwawe emootheraka weera owo oomulapha Muluku nitho mwene. Vahoolowaya mwamukhumihere okerekhere wa esidade mumvonyaka maluku mpaka okhwa.”

¹¹Vano asitokweene ni maneethi a esidade ya Naboti yaapaka ntoko Yezebeli aalamulenlaawe mukarattani aalepenlaawe.

¹²Yaalaleiya nihuku na otthuka enamukilaathiha Naboti vanipuroni noottittimiheya variyari wa atthu.

¹³Vano anamoona oowootha eeli yaahoorwa, enakilaathi mukhwipimwawe, enamoothera Naboti vamaithoni wa atthu yeeraka: “Naboti aamulapha Muluku nitho mwene.” Woowaakuveya atthu yaamukhumihera okerekhere esidade, enamvonya maluku mpaka okhwa.

¹⁴Vahoolowaya yaamurumihela mutthenga Yezebeli: “Naboti oovonyiwa maluku mpaka okhwa.”

¹⁵Iiwakaru weera Naboti ohookhwa, Yezebeli aamweerela Ahabi: “Mvenye, mwakuxe ematta ya iwuuva* ya Naboti, muYizereyeli, mwa yeele owo ookhoottihenraaweni woothumiherani. Vano Naboti khakhanle — ohookhwa.”

¹⁶Iiwakaru Ahabi weera Naboti ohookhwa, aavenya, anakuxa ematta ya iwuuva* ya Naboti.

¹⁷Vano Yave aamweerela Eliya, muTixebi:

¹⁸“Murowe weera mwamukumaneno Ahabi mwene a oYixrayeli onlamula oSamariya. Ori mmatta mwa iwuuva* ya Naboti, mwa yeeyo okunxaawe ntoko yawawe.

¹⁹Mwamuleele: ‘Yave oneera ha: ‘Moomwiiva mulopwana mukuxaka emattaawe.’ Vano mwamuleeletho: ‘Yave oneera ha: Vanipuroni alapwa alantaaya ephome ya Naboti, anoolatatho yawinyu — aani, ephomaanyu!’”

²⁰Ahabi aamweerela Eliya: “Vano mookiphwanya, mwiittanaaka.” Eliya aamwaakhula: “Kohoophwanyani, niwoko mohiithumiha mpakaka yoonanara vamaithoni wa Yave.

²¹Yave oneera ha: ‘Kinimooruuhelani erisa! Kinoophwata ekhapiraanyu ya wuulopwanani oYixrayeli — ekhalaka epottha hoye hoye neethi.

²²Kinoopakela emusaanyu ntoko kaapakenlaaka emusi ya Yerobowami, mwaana mulopwana a Nebati, nitho emusi ya Bahaxa, mwaana mulopwana a Ahiya, niwoko mootannya isarasaka mwaatthekihaka aYixrayeli.’

²³Mwaha wa Yezebeli Yave oneeratho: ‘Alapwa anoomukhuurela Yezebeli vaxirini ya oYizereyeli.’

²⁴Yaawo ari a Ahabi anookhuuriwa ni alapwa eniikhwele musidade ni ipalame sa wiirimu sinimwaaca eniikhwele mutuphini.”

²⁵Khanakhale mukina ntoko Ahabi, mwa yoowo, aaviriyeliwe ni mwaariye Yezebeli, iithuminghe weera apake yoonanara vamaithoni wa Yave.

²⁶Aatthekaxa alapaka miluku sikina, ntoko awAmori yaapankaaya, mwa yaale Yave aawoomonlaawe ohoolo wa aYixrayeli.

²⁷Iiwakaru Ahabi masu ale, aahaahula soowarasawe, anawara isaakho, anatthuka. Aahiixaatalela vasaakhoni, akhalaka oowiiyeviheene.

²⁸Vano Yave aamweerela Eliya, muTixebi:

²⁹“Mohoona moota Ahabi iiyevinghaawe ohoolowaka? Eenre iiyeviha, nkirwa kimuruuhela erisa ela moolamulanimwawe, mene aani alamulaka mwaniye.”