Read Makhuwa-Shirima 1 Mamwene 3 Bible Online

1 Mamwene 3 - Makhuwa-Shirima bible

1 Mamwene 3

¹Salomoni aahiixiiraanyiha ni Farawu*, mwene a wExipitu, amuthelaka mwaniye. Owo aamuruuha musidade ya Davide mpaka omalihiwa otekiwa empa ya mwene, Empa ya Yave ni exiri erukureenre oYerusaleemu.

²Wa soothesene, muloko nlelo wannapaka sooveleela mmapuroni ootteelihiwa yeenre yahitekiwa Empa ya Muluku ettittimihereliwaka Nsina na Yave.

³Salomoni aahoonihera omusivelawawe Yave ngwiiwelelani ikano sa atithawe Davide, mene aapaka sooveleela ni aahisa erubani* mmapuroni ootteela vasulu mattumuxa.

⁴Mwene aarowa oGibiyoni, niwoko naakhalawo Nipuro Nootteela* vasulu nttumuxa noottittimiheyaxa ni Salomoni aaveleelawo sooveleela soohisa macira muloko valtaarini* ale.

⁵Yave aahiixoonihera wa Salomoni oGibiyoni ohiyu mmoha moolohani, anamweerela: “Mukivekele yakhalaru etthu muntthunaanyu ni kinimoovahani.”

⁶Salomoni aamwaakhula: “Mwaamoonihera murima wooreeraxa murumeiyaanyu, atithaka Davide niwoko owo aari oororomeleyaanyu, a murima wooreera ni a ekhaikhai. Mwaapwaherera omoonihera murima wooreera mumvahaka mwaana mulopwana, mwa yoowo okilaathiye vahiceniwawe olelo.

⁷Vano Yave Mulukwaaka, moomukhaliha murumeiyaanyu mwene vanipuroni na atithaka Davide. Wa soothesene, miyo mmiravo mukhaanene kihisuwelaka yooweera.

⁸Murumeiyaanyu ori va eriyari ya muloko muthanlaalaanyu — muloko woohaalikeleya.

⁹Vano mumvahe murumeiyaanyu murima wa miruku weera kilamule mulokwaanyu kisuwelaka okawanyiha yooreera ni yoonanara. Waahikhala hiiho, moota heeni kineeraka kilamule mulokwaanyu mutokotoko ola?”

¹⁰Nivekelo nne na Salomoni naamuhakalalihaxa Yave.

¹¹Muluku aamweerela: “Mweenre muvekelaka yeeyo, muhivekelaka okhala ni okumi wa mahuku mancipale, naari mihakhu hata okhwa wa amwiittanaanyu, mene aani miruku soolamulano nnene,

¹²kinoopaka yeeyo muvekenlaanyu. Kinimoovahani murima wa miruku onsuwela okawanyiha yoonanara ni yooreera moota wooweera khanakhale hata khakhala ntoko nyuwo.

¹³Ohiya toko yeeyo, kinimoovahani yeeyo muhivekenlaanyu — mihakhu ni epili — weera mookumunimwanyu mukhale oohilikanxereya ni mamwene makina.

¹⁴Ni mweetta mphironimwaka ni mwiiwelela ikanosaka ni malamulowaaka ntoko atithinyu Davide yaapankaaya, kinimoovahani okumi wa mahuku mancipale.”

¹⁵Vano Salomoni aavenya mookonani, anasuwela weera aamuloha. Aahokoleela oYerusaleemu, aneemela ohoolo wa Arka* a wiiraana a Yave, anaveleela sooveleela soohisa ni sa murettele. Vahoolowaya aahaapakela efesta arumeiyaawe ootheene.

¹⁶Nihuku nimoha mapuuta meeli yaahiixoonihera ohoolo wa mwene.

¹⁷Mmoha a yaale aamweerela: “Ii! Pwiiyaaka, muthiyana ola ni miyo ninkhala empa emoha. Kaamuyara mwaana mulopwana, nreenemo hiyo ooweeli.

¹⁸Eviraleene mahuku mararu a oyariwa wa mwanaka, olatho aamuyara mwaana mulopwana. Nreeli, khaariworu mukina mpaani.

¹⁹Ohiyu omoha muthiyana ola aamukonela mwaniye, anakhwa.

²⁰Vano, ola aavenya ohiyu eriyari, anamukuxa mwanaka, miyo murumeiyaanyu kikonaka. Vahoolowaya aamwaatalela ohoolowawe. Vaheera mwaniye ookhweene aamwiikaathi ohoolowaka.

²¹Kipeherenreene ovenya weera kimwaamwihe mwanaka, kaahoona weera ohookhwa! Wa soothesene, kingwehexexaka nnenesene, kaahoona weera khahiyono mwanaka kimuyanraaka.”

²²Vaheera muthiyana mukina aaheera: “Hoye, mwaana mukumi ti awaka ni ookhwa ti awinyu.” Wa soothesene, oopacera aanyeserera: “Hoye, ookhwa ti awinyu ni mukumi awaka.” Vano yaakhulana hiihaale ohoolo wa mwene.

²³Mwene aaheera: “Ola oneera: ‘Mwanaka mukumi ni mwaninyu ohookhwa,’ ni mukina oneera: ‘Hoye! Mwaninyu ohookhwa ni awaka mukumi.’”

²⁴Vano mwene aalamula: “Mukiruuheleke ekatana.” Yaamuruuhela mwene ekatana.

²⁵Vanonto aalamula: Munkakatthanye mwaana mukumi eriyariru ni mpatta mmoha mumvahe muthiyana mmoha ni mpatta mukinoowo mukhwaawe.

²⁶Amayawe mwaana mukumi emuthananelaxaka mwanaya yaamudyoonttelela mwene: “Dyoontte pwiiyaaka, mumvahe ola mwaana mukumi. Muhimwiive!” Wa soothesene, muthiyana mukina aaheera: “Hata nyuwo naari miyo nihimukuxe. Munkakatthanye eriyariru!”

²⁷Vano mwene aalakela ha: “Mumvahe mwaana mukumi muthiyana oopacera. Muhimwiive. Amayawe ti yaala.”

²⁸aYixrayeli ootheene yiiwakaru yoolakela ya mwene, yaamuttittimihaxa mwene, niwoko yaahoona weera aarino miruku sa Muluku wookwanihera ekhaikhai.